شلونكم يا ذويقات
اليوم يايبة لكم أكلة لذيذة و خفيفة مع سلطة ألذ
واااي أموت بهالأكلة و لازم يكون مزاجي رايق عشان أسويها
مقاديرها بسيطة و معروفة للكل
عيش بسمتي مشخول
دياي مسلوق و مسحوب من العظم و اليلد
بطاط مقطع شرايح مدورة
فلفل أخضر بارد مقطع شرايح
بصل مقطع شرايح
ثوم و زنجبيل مدقوقين (آنا أقطعهم شرايح)
فلفل حار مقطع
بهار و ملح
الطريقة:
نحمس البصل لما يتحمر بعدين نحط البطاط و الفلفل البارد و نحط البهار
لما يستوي البطاط نضيف الدياي المسلوق و المسحب و الملح
آخر شي نضيف الثوم و الزنجبيل
و نغطي الجدر و نقصر عليه و نخليه لما كل شي يندمج و يتنهنه
تالي نضيف العيش المشخول فوق الحمسة و نحط على الويه صبغة الزعفران
عند التقديم نقلب الطبخة على الماعون بحيث تصير الحمسة فوق على الويه
و استمتعوا بالنكهة اللذيذة
أما مقادير و طريقة السلطة فهي:
جرجير مقصص
طماط مقطع صغار
مشروم مقطع صغار
بصل مقطع صغار
أفوكادو مقطع
فلفل حار مقطع
عصير ليمون و خل تفاح
زيت زيتون و ملح
و نخلطهم و نقدم السلطة
جربوا الطبقين أتمنى يعجبونكم
تسلم ايديك