أهلين قلبي نوني والله الملف منور بوجودك ياالغلا
الله يسعدك يارب
ورد أهلين باحلى وردة
الصفحة الأخيرة
عندي مشوار انا واخويه مع الاعتذار لها عن التأخير ..
" طريقة المرقوق "
اولا سوي كشنه عادية زي كشنة الكبسة وانا طريقتي فيها كالتالي :
تحمرين البصل في الزيت شويه وبعدين تضيفيله بهارات صحيحة يعني مهي مطحونه (فلفل اسود -
كمون - شوية بصل ناشف - شيبة - خولنجان -كزبرة ناشفة - قرفة - عويدي اللي هو
مسمار او زر حسب التسمية - ورق غار - هيل ) بس ماتكثرين تاخذين شويه من كل نوع ..
وتحمرينها مع البصل وبعدين تضيفين نصف مقدار البهارات المطحونه اللي تفضلينها مع الثوم
وحبة ماجي وتقلبنها مره وحده بس وتضيفين اللحم أو الدجاج حسب رغبتك وتقلبنه شويه وتخلينه
يتحمر وكل شويه قلبي عشان ما ينحرق لمدة 3 أو 4 دقايق بس مع نار متوسطه ..
وبعدين أضيفي صلصة الطماطم وقلبيها شويه ثم اضيفي الطماطم وتكون مطحونه افضل
وزودي عليها المويه الحاره وخليها تغلي طبعا انا استخدم قدر الضغط اخلي اللحمه فيه حوالي
نص ساعة وقبل ماتستوي اللحمة بشويه بس اضيفيلها خضار مقطعه مكعبات متوسطة او حسب
رغبتك في التقطيع مثل فلفل رومي جزر بطاطس كوسه وفيه ناس تحط باذنجان بس انا ما احبه
مع المرقوق ومو شرط الخضار تري حسب الرغبة انا اهلي مايحطو خضار ابدا بس انا احطها..
طبعا تخلين اللحمة لين تستوي بس مو تنهرس لأنها راح تطبخ مع العجين شويه كمان
في اثناء طبخ اللحمة اعجني العجينة وهي عباره عن دقيق دبي ساده بدون اي اضافات هو اطعم
شي مع المرقوق وحطي معاها زيت وشوية ملح فقط بدون خميره ابدا واعجنيها لين يصير قوامها
متماسك بس لين وطري وسيبيها ترتاح كذا كم دقيقة وعلى طول افرديها ..
طريقتي في رق العجينة : طبعا بعد تنظيف الرخام اللي افرد عليه ارش شوية دقيق
على الرخام وبعدين اخذ قطعة من العجين قد الكف وافردها بالنشابة لين توصل لسمك من2 الى
3 مل ما احبها تكون سميكة العجينة وبعدين اقطعها مربعات متوسطة الحجم بقطاعة
السمبوسة اللي اطرافها متعرجة او حتى بالسكين عادي وعلى طول حطيها في القدر وتكون النار
والعه ومتوسطة وعلى نفس الطريقة هذي لين تخلص كمية العجين وبين كل دفعه ودفعه رشي
شوية دقيق في القدر وحركي عشان المرقة اللي عليه تكون رايبه وثقيلة شويه مو زي اليدام سايلة
وخلية يغلي شويه لين يستوي العجين تماما مع التحريك كل شويه وبألف هنا وعافية ان شاء الله ..
على فكره فيه عجين مفرود جاهز للمرقوق في السوبر ماركت لكن ما جربته ولا راح اجربه ما احب الشي
الجاهز ابدا سواء مرقوق او غيره احب اسوي كل شي في البيت احسن بس قلت يمكن مافيكي حيل
للعجن والرق..