السلام عليكم ورحمة الله وبركاته
مساء الخير عالجميع
عالنساء الفاضلات المهتمات بجمالهم وصحتهم وحياتهم مساء الخير عاللي مشاركاتهم لازالت محفوظه ف عالم حواء وتفيد اجيال واجيال من بعدهم
مساء الخير عالناس الطاهره النظيفه البسيطه
مساء الخير للناس اللي من زمان شاركوا فالمنتدى وكان لهم بصمه ، عاللي لازالو متواصلين ومواصلين ف نشر الخير والتجارب والاستشارات وعاللي انقطعو وبقي اثرهم
من فترة طويله كل م احتاج اسأل سوال او استفسر من حاجه افتح ف قوقل او سفاري واكتب استفساري وكان دائما يطلع لي اول جواب ف عالم حواء واحن للذكريات والابتوبات القديمه وسوالف المنتديات عام ٢٠٠٢ و٢٠٠٩ و٢٠١٠ وقبل وبعد والسهر للفجر عالتعليقات والرفع والسوالف
ي الله قد ايش كانت ايام حلوه وبسيطه وجميله
كانت م تنزل خلطة الا ونجربها ونقوم نشتري من العطار صابونة الغار والدلكه والكريمات
ولاتنزل طريقة كيكه او حلى او طبخه الا ونسوي استنفار للبقاله ونوفر طلباتها ونسويها ونقدمها لاهلنا ومجتمعين ع سفره وفوق كيذا يجلسون يطقطقون علينا ونضحك
مساء الورد عالامهات الطيبات اللي كانو يكتبون تجاربهم ف عالم حواء عن حملهم والحبوب اللي تنصرف لهم والادويه وتجاربهم معها ولحد الحين تجاربهم تنفعنا
مريت بازمات كثيره واسئله كثيره وخصوصاً من يوم تزوجت زاد اطلاعي عالمنتدى والقى نساء يشبهوني من سنة ٢٠٠٢ و٢٠٠٤ و و ونفس مشاكلي الحين والقى حلولهم وردود المشاركات وطبطبتهم ع بعض اقول ي الله وينهم الحين؟ الله اعلم انحلت مشاكلهم اللي كانو يفضفضون بها فالمنتدى! ووقتها اقعد افكر فيهم وادعي لهم واقول انت ي رب اعلم بحالهم الحين! واتمنى اني وقتها قريب منهم واحضنهم لاني الحين قاعده تصير لي نفس مشاكلهم من خوف اول يوم زواج وبعده كيف افهم الزوج وبعده مشاكل الدوره وبعده مشاكل تاخر الحمل والادويه اللي تنصرف لي ومااقدر اشكي لحد ولااحكي لحد لاننا ف زمن يخوف وادخل عالمنتدى والقى القلوب الحلوه القديمه كاتبين تجاربهم مفصله وردود المشاركات عليهم احسهم حواليني ويشورون علي ويطبطبون علي ويعطوني حلول!
كلام كثير ف صدري ومشاعر كثيره ف قلبي وحب عظيم لكم ، ان كنتم حاضرين لليوم وتقرؤن كلامي ادخلو ! وعلقو واكتبولي
احتاج اشكركم وحده وحده وقفتو معاي وشرتو علي ونصحتوني وانتو م تدرون
احبكم كثير وشكراً لكم وللسنين الماضيه الحلوه الطيبه النظيفه الهادفه اللي جعلتكم تكتبون فالمنتدى وتنفعون اجيال من بعدكم …
الحمدلله 35 @alhmdllh_35_1
عضوة جديدة
يلزم عليك تسجيل الدخول أولًا لكتابة تعليق.
خليك أول من تشارك برأيها 💁🏻♀️