ذلك فضل الله يؤتيه من يشاء.الله يكفينا شر عيونكم يالحوائيات

مو عارفة من وين أبدأ موضوعي من قهري منكم يا بعض عضوات عالم حواء
المعروف ان الحسد مذموم شرعاوعرفا ومنهي عنه والله سبحانه وتعالى أنزل سورة للتعوذ من الحسد

أبغى أعرف ليش تحسدوا بعضكم على اللقمة أعوذ بالله ياجماعة ليش كل ماصارت في دولة حروب وفتن ومجاعات جيتوا وقارنتوا بيننا وبينهم ،بين حربهم وأمننا .بين فقرهم وغنانا .بين مرضهم وصحتنا .بين جوعهم وشبعنا
ليش مستنكرين نعمة الله علينا. ذلك فضل الله يؤتيه من يشاء
قبل دخول رمضان سابقتم الناس بالحسد على مقاضي رمضان .ليش ما تبغوا الناس تاكل بعد الصيام? لا تيجي وحدة منطلقة تقوللي عربات التسوق مليانة وهذا إسراف
ممكن يكون فيه تبذير من بعض الأهالي ما أقول لأ .لكن والله أكثر الناس بيشتروا للشهر الفضيل كامل الأغراض علشان وقت يدخل الشهر يتفرغوا للعبادة والاجتماع العائلي
وبعدين وش دراكي انهم يبذروا ? ثلاث أرباع العوائل السعودية أعداد أفرادها كبير من مختلف الأعمار غير الخدامة والسواق أكيد إنهم ما يبالغوا أكيد آنهم بيملوا عربة التسوق اللي بعضكم ما تروح البقالات إلا علشان تبقق عيونها في عربات الناس .يا جماعة خافوا الله
وش دراكم انهم يزيدوا في أنواع الأكل لدرجة يخلوها إكسسوار على الطاولة ? ليش دخلتم بيوت الناس وشوفتوا موائدهم
المعروف دائما وأبدا اللي ما ينوكل على الفطور بينوكل على السحور
وبعدين أمانة مو شايفين الغلاء اللي شامل كل أنواع المواد الغذائية والأغراض الاستهلاكية .مين اللي له مقدرة مالية إنه يبذر مع هذا الغلا .والله حتى اللي راتبه زين والله انه صاير يحاسب على الريال
أحنا مثلا والحمد لله وضعنا المادي متوسط. لكن والله العظيم إني مستغنية عن أصناف كثييييييير من الأكلات لأن أغراض طبخها مكلفة أو كثيرة. ووالله ما أشتري إلا الضروووووووري ورغم كذا تجي فاتورة الشراء عالية وأجي البيت أحسب وأحسب وأشيل هم إذا المصروف خلص قبل نهاية الشهر وش أسوي عندي عيالي صغار يحتاجون حليب وحفايظ أكرمكن الله

وأكيد كثيييييييير منكم مثلي
بس فيه عوائل مرة دخلهم قلييييييل .والله أعرف وحدة عندها ثلاث أطفال صغار ومنهم رضيع تعطيهم حليب وادي فاطمة كلهم. حتى الرضيع تقول مسكينة حليب الأطفال مرة غالي.
ووحدة من قرايبنا عندها أربع أطفال بيموتوا من النحف تقول كل يوم أطبخ نص دجاجة ونقعد عليها أنا وزوجي وعيالي الأربع ونقوم من السفرة محد فينا شبعان وطول عمرهم عشاهم شابورة وشاهي. الحمد لله انهم عندهم أكل صح ? ماهم في مجاعة زي الصومال صح?
وأكيد اللي تيجي تتكلم عن الآسراف أكيد إنتي في بيتك أشياء أفضل من الشابورة والشاهي تتعشوا عليها. أكيد عيالك عندهم حلويات وعصيرات وبسكويتات ما هي عند غيرهم من السعوديين مو عاد من الصومال .والله آلاف العوائل على قد حالهم ومايقدروا يوفروا طلبات الأسرة كاملة. إلا مايكون فيهم واحد أو اثنين خاطره مكسور يبغي شئ ومو لا قيه
خلاص إذن ليش مستنكرة نعمة الله على عبيده. ليش حاسدة الناس على أكلهم علشان فيه جماعة بتموت من الجوع الله يغنيهم من فضله ويرزقهم .والله ما أتوقع إنك مجوعة عيالك في البيت وشادين إنتي وزوجك الحزام على بطونكم ،خلاص إذن صرنا متعادلين
والله كلنا بندعيلهم والحمد لله بنخرج الزكاة والصدقات اللهم لارياء ولا سمعة وأكثر من كذا مانقدر نسوي. الله يرفع عننا وعنهم البلاء
ما أقول ان كل السعوديين ملتزمين بس فيه كثييييييييير منا الحمد لله على الدين الحق صلاة وعبادة وخوف من الله ودعاء .وإيمان الإنسان يحفظه من شرور الدنيا ومصائبها. انتي لما تكوني قريبة من الله وترفعي يدك في ساعة استجابة تدعي لنفسك وعيلتك بالأمن والصحة والخير وربي يستجيب لك دعوتك تستنكري بعدها نعمة الله عليك .تتضايقي إذا صرتي آمنة وعيالك بصحة وعافية وزوجك عنده خير. أمانة تتضايقي?
إذا تبغي الخير لنفسك وعيلتك أتمنيه لكل الناس مو بس نفسك والصومال أوغيرها تحديدا .لأ أتمني الخير لكل الناس أجمعين والمسرف الله يهديه. مع إني أشك مع الغلا أحد يقدر يسرف إلا الطبقات العليا. أما غالبيتنا والله نخاف الله على قرص العيش


عموما الكلام ما يخلص حبيت أبين وجهة نظري اللي أكيد فيكم كثييييييير معايا فيها

واللي تيجي تنصح غيرها بعدم الإسراف والتبذير ربي يجزاها كل خير ويرزقها الفردوس الأعلى من الجنة. أما اللي تحسد الناس على ما آتاهم الله من فضله فحسبي الله ونعم الوكيل
ونصيحة لما تنزلوا تشتروا مقاضي رمضان غضوا بصركم عن عربات الناس لأن العين حق. حرام أطفال وكبار بياكلو من ذا الأكل لا يجيهم بلا أو شئ مو زين. لا تتدخلي في خصوصيات غيرك. اذكري الله علشان ماتضري أحد بعين أونفس والرسول صلى الله عليه وسلم نهانا عن الحسد .وتذكري دائما إن الناس يتجمعوا كثير في رمضان علشان كذا مقضاهم كثيرة. لا تكرهي الخير لغيرك أبدا.

ولا حول ولا قوة إلا بالله