رأيكم الله يسعدكم هالموضوع تعبني حيل

ما أحلل أي وحده تنقل قصتي برا المنتدى ...
سبق وذكرت مشكلتي اللي هي إن زوجي علاقتة ببنت أخته غير مريحة أبدا ...
يتراسلوا بنكت جنسية فيديوهات رقص حريم ونوعا ما إباحية ...
هي في بداية الثلاثينات زوجها فوق الستين وهي الزوجة الثالثة زوجي دايم ينصحها تصبر ع زوجها لأنه كبير وغني فممكن تورث من وراه ملايين ..
علاقتها بزوجي غريبة جدا .. هو خالها بس كأنه زوجها ... تحكي له أدق التفاصيل بينها وبين زوجها .. وأحيان ترسل له صور وهي حاضنة زوجها ..
الكلام اللي بينها وبين زوجي حب وغراميات ... وتبادل بوسات ..
أهلها ساكنين في قرية برا الرياض إذا جات يصير يطلع من دوامه يروح عندهم لين تسافر لبيتها .. ولا تسافر هي لين تشوفه ..
قبل كذا صارت بيننا مشكلة لأنها طاحت وصار فخذها أزرق ومصوره فخذها ومرسلته واتساب ..
وقام زوجي جاب لها هدية جوال آيفون وسلسال رغم إنه حتى صرفته ع البيت قليلة بحجة الديون
وصارت بيننا مشكلة وطلقني عشانها ...
وبعدها حلف يقطع علاقته فيها .. لكن أكتشفته مخزن رقمها بإسم ولد ويراسلها ويكلمها ...
وكلمته في الموضوع قام زعل وهاوش وقال طز فيك إنتي المهم هي بنت أختي ماراح أخليها ...وطردني من البيت ..


سكتت وبلعت الموس وجلست شهور مطنشة .. أكتشفته مخزن رقمها في السناب بإسم ثاني ويراسلها دايم ..
اللي قهرني يابنات إنه طول اليوم يصرخ على عياله ويضاربهم وقدامها خروف وهادي ويتكلم بكل أساليب الحب ..
إذا سويت شي ماعجبه ولا أحد من عياله وسخ شي مثلا في البيت .. يصارخ علينا يابهايم ياغجر يايايا
لكن هو رسايله لها كلها حب وإحترام ياقلبي ياعمري وحشتيني
كان عندي موعد يوم الأحد عشاني حامل .. أتوقعت إني بعد ما أروح الموعد يتصل علي ويتطمن علي أنا والبيبي ..
اللي صدمني إنه اتصل عليها هي يترجاها تروح المستشفى عشانها مزكمة .. وخايف عليها ...
بصراحة زعلت واتنرفزت وقلت له ع الأقل عاملنا مثل ماتعاملها ... قال والله لأتزوج عليك وأخليها تفرح فيك ..


كلمت أهلي أبوي متزوج وحده ثانية ومايبي وجع راس .. وأخواني يقولون مالنا شغل ...
دلوني يابنات على حل ... رجاء لاتجي وحدة تقول إنتي شكاكة ومسوسة .. أنا ماذكرت تفاصيل الأمور بينهم ...
لكن متأكدة السالفة كلها كلام وصور بس مافي أكبر من كذا ..
هذا غير إنها دايم تحرشه يعرس علي .. وتمدح الحريم عنده ...
أنا وإياه إلحين متزاعلين ... وهو حالف يمين إنه يتزوج ويشمت الناس فيني على قولته ...
أنا ماني مقصره معاه أبد بشهادته هو وشهادة أهله كلهم ...
بس محتارة جدا ماني عارفة أتصرف .