السلام عليكم ورحمة الله و بركاته..
كيفكم ياعسولات
في موضوع لافتني كتير دي الايام
تلقي البنت متزوجة و بتروح تبات عند اهلها باليومين والثلاثة وتاركة زوجها في البيت لوحده
وفي بعض البنات تجلس بالاسابيع كمان
ودا كله بحجه انها طفشانة او انه بتحاول تفك من مشاكلها مع زوجها حاسة انها حاتنفجر وماتستحمل
وفي بعضهم بحجة انه اولادها طفشانين وتلقوها هي اللي طفشانة
انا استغرب من دا كله احس الزوجة بالطريقة دي انانية ماتفكر غير في نفسها وراحتها و لا كأنه في زوج عندها
وانا استغرب من الزوج اللي يرضى بالوضع دا (احس اللي راضي عنده انا)
الزوج اتزوج عشان يستقر واحدة تطبخله و تغسله ملابسه ويرجع بيته نظيف ويكونو اسرة يعني بالمختصر راحة نفسية وليش نخرب المنظر الجميل دا
اعرف واحدة لماا اقلها الكلام دا تقولي ليش تنكري اهلك (كلام عجيب ) اهلي زوجوني عشان اجي اجلس عندهم
تقولي عادي اقلها الواحدة ماتحس انها ملكة غير في بيتها ماتحب احد يحكمها انا احس اني ضيفة في بيت اهلي تستغرب (هل هو كلام غريب ؟)
ولو صار ظرف واضطريت ابات عند اهلي احس اني متوترة و معصبة طول اليوم اشيل هم زوجي مين يصحيه من نومه ومين يجهزله فطوره وغداه وغير ملابسه بيلبسها نظيفة لانه الرجال منهم يمشو نفسهم باي شئ حتى اللبس لما تكون الزوجة بعيدة
كيف ترضى اللي تغيب عن بيتها بدا كله
ولا واحدة قضت فترة حملها كلها من يوم وحمها لولادتها والاربعين كله عند اهلها عاد دي مرة بزيادة
المتزوجة اللي عادي انها تجلس عند اهلها وتبات عندهم اللي تكون من خارج البلد وتجي زيارة لاهلها و تبات عندهم كم يوم اذا كان زوجها عنده دوام في البلد اللي ساكنة فيها بس لو هي وهو نزلو اجازة ياخذولهم شقة مفروشة افضلهم
في مثل يقولو عليه كل ماتباعدت المخدة اتباعدت المودة (ماادري اذا صحيح ولا لا) انا من رايي صحيح 100% لانه حسيته في كل اللي اعرفهم يباتو عند اهاليهم
طولت عليكم يلا مين تأيدني واعطوني اراء وبلاااااااااااااش المخاصمات
وبعدها لاتلوم الزوجة الا نفسها لو تزوج زوجها عليها او خانها او ادمن محادثات في الماسنجر وغيره
لأنها قصرت فعلا