رأيكم بخصوص هذي الخطبة.. للناضجات فقط!!

السلام عليكم

اشلونكم حبايبي

انا بغيت استشيركم بشي قلت أشوف رأي بنات حواء وياحبذا اللي تعطيني مشورتها مرأة ناضجة و فاهمه و حكيمة

انا مثل ما تكلمت عن نفسي قبل هالمره ان انا الحمدالله مرآة متعلمة و متثقفة و احب اوزن الامور

عمري 34 مو متزوجة بس مهتمه بنفسي وبجسمي ومن الناحية الجمالية

و بصراحه انا مرتاحة بحياتي جذي من غير زواج يعني الزواج مو همي ، صحيح افكر فيه احيانا لكن ما اهتم وايد و بالنسبة للاطفال عادي يعني ما احس اني اتشفق عليهم صح استانس على سوالفهم و براءتهم لكن ما اشتاق ان يكون لي طفل يمكن تستغربون بس انا شخصيتي جذي
، انا عندي مشروع مميز و الحمد الله لقى استحسان كبير عند المسؤولين ومشروعي ماخذ اغلب وقتي وأفكر فيه ليل نهار

قبل تقريبا سنة تعاملت في مشروعي مع شخص "رجل أعمال" عمره مقارب لعمري ، في قمة الاحترام وبصراحه انا بتعاملي خصوصا مع الرجال يكون برسمية وكله في الشغل يعني ما اعطي مجال انه يتدخل بخصوصياتي لكن لاحظت عليه ملاحظات مثل لما اقعد اشرح له عن شغله أشوفه فجأة يسرح لمدة 5 او 6 ثواني واناديه اخ فلان اخ فلان لما يصحى يقول اعذريني غصب عني وانا كنت استغرب من هالشي وكنت ألاحظ احيانا يطيح استكانة الشاي او قلاص العصير بس ما حطيت في بالي اعتبرتها مجرد حوادث عابره

ولاحظت وخصوصا بالأحداث السياسية الاخيرة في الكويت لما أتكلم وانتقد الحكومة الاحظة يدافع عنها باستموات لكن كنت اسكته بالحجة و هو كانت حجته ضعيفة فيسكت و انا كنت أظن دفاعه مجرد وجهة نظر منه لكن اكتشفت بعد فتره انه تربطة مع الاسرة الحاكمة صلة قرابه. طبعا من دريت زاد انتقادي و قلت له خلك عقلاني ولا تدافع بسبب قرابتكم يـــا اما تقول الحق او اسكت.



تفاجأت بعدها ان هذا الرجل تقدم لي ، صحيح مافيه عيب من ناحية اخلاقة و مركزة ودينه وحالتة المادية ووالدي اعجب فيه لكن فيه مرض مناعي وهو الام اس "MS"
واهني ابوي قال لي الراي رايج انتي الحين شوفي هل تقبلين بشخص عنده هذا المرض او لا ،اللي ما يعرفون عن هذا المرض و علي حسب خلفيتي البسيطة انه مرض مناعي في الأعصاب ومافي لحد الان علاج له الا أدوية اللي تخفف اعراضة

في ناس تسوء حالتهم و يصيرون مقعدين و ناس بالعكس يمارسون حياتهم بشكل طبيعي ما عدا انه تصادفهم صعوبات بسيطة مثل ما يتحكمون بالأشياء اللي يمسكونها احيانا لكن مؤ دائماً

انا طبعا رفضت والسبب هو مرضه ، و تقدم لي مره ثانية و رفضته لنفس السبب، بعدها اتصل علي و قال انه شاريني و يبيني وراح يتقدم وقال اتمنى انج ما ترفضيني هالمره وقال لي من ناحية المرض انه مستعد يروح معاي لدكتور و يشرح لنا عن حالته هو و خصوصا ان الأعراض اللي فيه مو قوية لكن انا خايفة يمكن يزيد عليه بالمستقبل و انا بصراحه وحدة اكره شي اسمه مستشفى لأني عانيت مع مرض اخوي اللي بغينا نفقده اسم الله عليه " ورم خبيث بالمخ" لكن الحمد الله ربي شفاه وعافاه وصارت عندي ردة فعل من اروح ازور احد للمستشفي اتعب نفسيا واحس أني مختنقه اذا دخلت المستشفى

وانا بصراحه أعجبني تمسكه فيني وكل شي متقبلته فيه وعاجبني من كل النواحي لكن المرض هو اللي مخليني أتردد

و نسيت اقول لكم ان انا كويتية من الكويت وهو كويتي علشان ما يلتبس عليكم الموضوع

ياليت اسمع رأيكم و ياليت تركزون في لب الموضوع و على آرائكم ولا تسألون عن التفاصيل لأني ما اقدر افصل اكثر من جذي، و سامحوني

وارجوكم رجاء حار مابي وحده تدخل تتشمت او تخرب الموضوع بتهجمها و عصبيتها