رأيكم في تربيتي لولدي الموضوع متعبني نفسيا اللي تساعدني ربي يعتقها من النار

الله يعينك عندنا وعندك خير

تقربي منه وحاول تفهميه ان الأشياءالي يسويهاغلط واذاسمع من براكلام مش كويس لايقوله استخدمي معهاالحنان موالتدليع الله يوفقك حبيبتي ويعينك ع تربيته

انصحك اقري كتب عن تربية الاولاد ولا ابحثي في النت عن طرق التعامل مع الطفل الشقي والعنيد

والله نفس وضعي حتى عند اهلي يتلفظ ويسب اضربه بس ماينفع معاه

شوفي حبيبتي ما الوم أي وحده عندها أطفال تحس بالاحباط والتعب والقهر من حركتهم فما بالك يكون الطفل حركي وعنيد
لكن الضرب مو حل ياقلبي وهذا أنتي جربتي بنفسك وشفتي ما طلعت لك أي نتيجة
بكره يكبر ابنك وتظهر الآثار
آثار الضرب
يا يصير عدواني وراعي مشاكل حتى يخفي الخوف المزروع داخله بسبب الضرب وهو صغير
أو يصير شخص مهزوز شخصيته ضعيفه وتصعب عليه الحياه وما يقدر يتعامل مع الحياه ومواقفها
وبعدين تتحسرين وتقولين ليش كان اكبر همي معه حليب يكبه والا شئ بالبيت يكسره والحين همي نجاحه واستقراره وانا سرقت منه هذا الشئ بانفعالي وتصرفي معه اللي كان عباره عن تنفيس لغضبي او عدم رضاي على تصرفه وحركته
من ناحية انه يسمع شئ برى مو زين او يشوف تصرفات ويجي يطبقها بالبيت احب اقولك مو ولدك بس كذا
كللللل الاطفال كذا
نادر يجي طفل ما يقلد اللي يصير حواليه
وبالعكس اللي ما يقلد معناها تعبان وفيه شئ
الاطفال يقلدون كل شئ بالحياة وشخصياً عيالي وعيال اخواني واخواتي وجيراني وكل طفل مر علي بحياتي لازم يقلد
ماعمري شفت طفل ما يقلد الاخرين سواء بكلامهم او حركاتهم الا الاطفال التوحديين واللي عندهم مشكله في الادراك
اللي عليك تحتوينه وتوجهينه فقط تقولين له هذا صح وهذا غلط
ترى الطفل مو شرط على طول ياخذ بكلامك ويقول اي خلاص هذا الشئ غلط ومعاد بأسويه
ترى ثمار التربية ماتبين من اول نهي او امر
مع الوقت تترسخ عنده الافكار عن الشئ الصح والغلط
ويصير يعرف
غير كذا انتببببهي من اسلوب الضرب في التربيه
ادري تتصرفين من انفعالك وقهرك لحظتها وانه يكون خرب شئ وزاد عليك شغلك بتصليح هالشئ اللي خربه وانتي تعبانه ومو فاضية وكل هالاشياء تخليك تفقدين اعصابك وتضربينه
لكن كل شئ بيتصلح
الوقت بيجيك وقت وتلقين نفسك فاضيه
الخراب بيتصلح او تجيبين غيره او بالطقاق فيه
لكن ولدك ما راح يرجع به الوقت بكره لما يكبر ويصير رجل مهزوز وجبان عشان تعدلين غلطاتك معه وتعدلين في تربيتك واسلوبك معاه
ما ابي احسسك بالذنب لكن الحقي على ولدك واحتويه واستخدمي اسلوب الحوار والمكافأة والعقاب او الحرمان من لعبة او حلاوه او شئ يحبه لما يخرب
والتشجيييع قبل هذا كله ترى الطفل العنيد واللي مايسمع عادةً يمشي معه التشجيع والثناء والمدح بس مو بزياده لدرجة يصير مدحك عنده ما له معنى لا امدحيه مدح بمحله يعني اي تصرف ايجابي منه امدحيه واثني عليه
ولما يكون عادي خليك عادي
وسولفي معه واحكي له قصص دام عمره خمس سنين اكيد يفهم
احكي قصه داخلها شئ تبين توصلينه له
سواء شئ تبين تحذرينه منه مثل الكلام الشين او الكذب
او قصه فيها شئ يرغّبه بالتصرف الحسن وطاعة الوالدين وان جزاها التوفيق ومن هالكلام
وترى كلنا نعاني مع الاطفال متعبين فعلاً لكن نتحمل ونصبر وكل شئ بأجره وجزاه
الله يصلحه لك ويهديه ويحفظه ويرزقك بره ياااارب