راحو رجال أول وجو أشباه الرجال

السلام عليكم ورحمة الله وبركاته
صراحة يوم عن يوم أكتشف وتكبر قناعتي أنه ماعاد فيه رجال في ذا الزمن
من كثر تصفحي بالنت في منتديات المشاكل الزوجية والنسائية وخبرتي لسنوات اكتشفت أن الزوج هو الزوج في كل انحاء البلد
مدري شصاير في عقلهم الله يهد حيلهم
رجال أول مايخلي ناقص على بيته وعلى مرته وعياله ولو عندها ريال والا مليون ماطرى في باله يفكر فيها
وكلامهم كلام رجال كلمة وحدة ولايكذبون ولا يسولفون بالحريم ولايغازلون وغاضين بصرهم وأمينين وصادقين ويخافون الله وكريمين ولايرفعون يدهم على الحرمة ويصلون بالمساجد
أما ازواج ذا اليومين خمة نصابين وحرامية وكذابين ومغازل وسكر وادمان وعقد نفسية بيطلعونها في ذا المسيكينات وشحاذين ويبون يعيشون على ظهر حريمهم وهي تصرف على بيتها وعيالها وعلى الحمار اللي بشنب مسوي منظر مع حزمة تبن بالبيت __ لوحة جمالية من الغيط
وأذا حاولت تفتح فمها بكلمة مايمديها الا مخمس يمشي بسرعة ميتين على وجهها وشيلي اغراضك وطسي لاهلك وطلقك لابوكم اشباه رجال وقدام الناس حاط فيها عيوب الشريعة ويتشكى مقصرة معي
وهي المسيكينة صابرة ومحتسبة ومسوية فيها بنك الراجحي على غفلة ولبس ودلع وكشخة وترتيب وعطورات والضب الفسفوري المغبر مو شايف شي وموب عاجبه
يرجع من برا كنه دينصور منقرض انواع الغبرة والاهمال لو تهزين شعره طلع منه غبار والثوب اصفر لكن يقولون ان لونه الاساسي ابيض ما أحط في ذمتي :)
وريحة دخان وعرق والانفاس ياسلام :)
ونفسه خايسة وينافخ ويسب ويلعن ومو عاجبه شي