دعواتكم لأختي
بتدخل غرفة العمليات بعد شوي تعمل الزائدة....

صباح الخير

منى
الف مبروووووووووووك النجاح
عقبال الوظيفه لك ولي ولكل متخرجة



الله يشفيها شفاء لا يغادر سقما
اللهم يسر عمليتها والبسها ثوب الصحه والعافيه
واقر عين اهلها بشوفتها وهي طيبه متعافيه



فطومه
سلامة ابنك..اجر وعافيه
مايشوف شر ابن اختي فطووومه
ماشاء الله تبارك الله على عيالك مثل عيال اخوي يالله امهم تلحق تعمل شي في رمضان الا وقت نومهم ربنا يحميهم ويحفظهم ويحرسهم ويهديهم لك
ويبلغك فيهم هادين مهتدين بارين صالحين


هدهد
الحمدلله على سلامة حفيدك وامه
والف مبروووووووووووووك ماجاكم
اللهم انبته نباتا حسنا



اعذروني اذا فيه احد مارديت عليه


دونا
جايينا ضيوف
:icon36:

كل يوم ااجل اكتب اهداف رمضانويجي رمضان وانا لسه
ان شاء الله استقبل ضيوفي وارجع اكتبها

استفدت من افكاركم
جزاكم الله خير :heart:
ووضعت في بالي بعض منها
ان شاء الله
الله يبلغنا رمضان ونحنا بصحه وعافيه

بعض الافكار البسيطة/
ومثلما قلتوا كتبناها هنا ليس لشيء
انما ان شاء الله احد يستفيد ولو بشي بسيط
نسأل الله الإخلاص
نسأل الله الإخلاص
نسأل الله الإخلاص


كل سنه في رمضان اختم القرآن تلاوة كم مرة..لكن ماخطر في بالي اني احفظ الا منكم.جزاكم الله خير ...ان شاء الله هذي السنه يكون وقت مخصص للحفظ ولو يسير..
فكرة .. ان نقرأ من كل مصحف موجود في المنزل .. كثير المصاحف عندنا ونكون متعودين ان نقرأ من مصحف واحد.. في رمضان نقرأ من كل مصحف ...حتى ماتصير مهجورة ..
* (رمضان والوالدين)
فكرة نصلي بالأم صلاة التراويح وصلاة التهجد..مانجازيهم الوالدين مهما عملنا..اوقات تكون الأم كبيرة في السن او لا تحفظ الا بعض قصار السور وتتمنى من تصلي بها او يدعو بها في الصلاه خاصة اذا كانت ماتحب تروح المسجد.. اوقات ترغب كل وحده منا انها تمشي في القراءة في الصلاة وان تطيل في الصلاة وفي السجود والركوع وأن صلاتها بأمها تأخرها...لا..لا نخلي كل هالافكار تحبطنا بل نحتسب عند الله..كذلك الأم تكون تعبانه اوقات وماتقدر تطول في الركوع والسجود..كذلك نراعي كل هذي النقاط...فنصلي بها صلاة كما تحب هي..يعني تصلين بأمك وبنفس مقتنعه مو تكونين زعلانه..وبيني لها فرحتك وحبك عند قيامك بهذا العمل.. كلما تصلي بها ركعتين اسأليها هل ناسبك طول الصلاة يالغاليه وهكذا حتى تعرفي ايش يناسبها..
او ممكن تكون مع العمة (أم الزوج).
وكذلك متابعة اوقات دواء(علاجات) الوالدة والوالد مع رمضان والصيام وخاصة الام مع شغل البيت والمطبخ تنسى نفسها..
وكذلك لما تكون الأم كبيرة في العمر او مو لازم.. قد تكون ماتعرف تقرا إلا قصار السور من المصحف.فالفكرة انه نقرأ لها وهي تردد معانا كل يوم ورقة من المصحف..وبهذا الأم تختم القرآن في رمضان..واترك لكم تخيل حجم الفرحة اللي تفرحها الأم..
الدعاء الدعاء الدعاء .. اوصي نفسي واياكم..
عمل بخور للمسجد وبأفخر انواع الطيب الموجود في البيت..قبل اذان العشاء نجهز الفحم والبخور واعطي اخوك او زوجك او والدك ليبخر المسجد..خاصه ان بعض المساجد يكون الفطور داخل المسجد..
كذلك تفريز بعض مايكون للأم بحيث يساعدها في رمضان .. الوحده في بيتها تقدر تطبخ قليل او على حسب عدد افراد الأسرة لكن الأم يختلف بالنسبه لنا ماترضى الا تطبخ امنا كل الاصناف اللي يحبوها اخواني فالتفريز يساعدها .. مثلا افرزل لها قبل رمضان حشوة اللحم والدجاج مطبوخه جاهزة ومقسمه في اكياس بعدد ايام الشهر او اكثر .. تفريز كم نوع من الحوليات اللي ممكن تتفرزل .. تفريز كميه من الثوم المقشر .. او المفروم مع زيت زيتون ومقسم كذلك..
ترتيب المطبخ وتنظيفه وتجهيز كل اللي ممكن يساعد الأم ويكون في متناول يدها .. كذلك مساعدة الم في اعداد البهارات اللي تشتريها وتطحنها قبل رمضان..
يحزنني ويقهرني اي وحده تجهز بيتها وترتب وتفرزل لرمضان وتنزل عند امها وتحوس بيت امها هي وعيالها ولا تفكر تساعد امها في شي...
فكرة شراء صحون بلاستيكية..لك لبيتك ولبيت الأهل تساعد كثير حتى في وجود شغاله نرحمها من غسيل الواعين ...نقدم الفطور في صحون بلاستيك ..نأخذها بالكرتون قبل رمضان ..وتفيد كثير مع وجود الضيوف.
* توزيع هدايا رمزيه للجيران بأول رمضان..كنت اوزع خواتيم التسبيح مع هدايا بسيطة .فانوس صغير وورقة اذكار وكرتون تمر صغير يجي فيه كم حبه وغيره..وفكرة خاتم التسبيح باتركها بعدما سمعت فتوى الشيخ الالباني رحمه الله..

مثلما ذكرت وحده قبلي .كتابة قائمة بالاكل اللي بنطبخه ..تساعد كثير ..

تنظيف البيت عميق من عزل وسحب الكنبات وتلميع الجدران وغيره مايكون في رمضان يكون قبل رمضان ..في رمضان ترتيب يومي وتحددي يوم او يومين في الاسبوع لتلميع الاثاث ومسح الارض والحمامات وانتوا بكرامه...عدا المطبخ التنظيف يومي:7_5_122:

مثلما قلتوا برضو ماننزل السوق الا للضرورة .. وشراء كل اغراض رمضان والعيد في شعبان

العزائم والجمعات وكثرة الضيوف اكثر شي يضايقني في رمضان..يكفي نجتمع مره مرتين على الفطور لكن كل يوم والثاني يالله نفطر سوا .اتضايق كثير...:(يروح الوقت ونحنا نقسم الفطور حريم ورجال هذا قبل المغرب .اما بعد المغرب فقهوة وشاي وحلا واجلسي معانا وووو.
اذا رحت لأهلي في يوم اروح عند الاهل عند كل واحد وقت يسير اهنيهم بالشهر ويكفي .بعد رمضان ناتقى على خير :biggrin:
الصدقه في رمضان/ قبل كل شي الافضل لو تخصص ميزانيه للصدقه ..او عمل قدر المستطاع ماديا ومعنويا..
فيه اكثر من فكرة/ناخذ كرتونين كبيره علب بلاستيكية مع اغطيتها (علب البليله) وناخذ كرتون او اكثر شوي شربه كويكر..افضل نوع..وكل يوم اطبخ في اكبر قدرين عندي شربه وزوجك او اخوك يعبيها في الصحون ونرتبها في كرتون او فلين السمك او في تبسي كبير ونضع ملاعق على عددها ونوديها للمسجد..( ممكن تتشاركي مع جارتك يوم تعملي انتي ويوم تعمل هي..
ممكن تطبخي الشربه فقط وزوجك او اخوك يروح المسجد قبل الأذان بنصف ساعه ويكون معاه ملعقه غرف وتباسي وصحون بلاستيك عاديه المقاس الصغير بدون اغطيه ويعبيها عندهم او تتفقون مع القائمين بالمسجد ويعبوها هم..
وممكن طبخ قدر مكرونه واقسمها بنفس العلب واضع معاها كيس شوكات او ملاعق
كذلك تبريد يوميا كرتونين عصير سن توب صغير او سن كولا او عصير الربيع ابو نص ريال ونوديها المسجد قبل الاذان
او خلال السنه اجمع دبب (جكوك)العصير المراعي وندى وغيرها(حجمها لتر ونص تقريبا) وفي رمضان يكون عندي كميه كبيره اعبيها تانج وفيمتو ونوديها المسجد واحط معاها اكواب بلاستيك
ممكن عمل مهلبيه ونوديها المحطه او البقاله..واحتسبي اجر انو قدمتي صدقه بارده في حونا الحار.
ممكن عمل وجبات/ نجيب الصحون البلاستيك المقسمه ثلاث اقسام (المقاس الصغير) واطبخ ادام فول واضع في قسم فول وفي قسم نصف خبز دائري وعليه واحد عصير ميني والقسم الثالث اضع ثلاث تمرات او حبه معمول المغلفه وغلفيها بتغليف شفاف..طبعا العدد تعملي قدر المستطاع مثلا يوم 15 او 20 وجبه..تقدري تحسبيها لو تطبخي كل يوم علبه او علبتين فول ..ان شاء الله يكون واضح قصدي.
ممكن تاخذي كيس وتعبي فيه فواكه حبه من تفاح وبرتقال وموز واعملي 15 او 20 كيس وكلمي اخوك او زوجك يوديها المسجد او يوقف ع الطريق ويقسمها على اللي رايحين المسجد .
اذا عندك ترمس كبير ممكن تضعي فيه ثلج وماء واضيفي اكواب بلاستيك وارسليه المسجد .
النت والتلفزيون (عدا قناة مكة والسنة)والواتس وكل البرامج ماادخلها في رمضان الا للضرورة..وعشان الزم نفسي احلف يمين اني مثلا ماافتح الواتس طيلة رمضان هههههه وتتم بفضل الله.
نحنا اثنان في البيت واكره فكرة انه رمضان طبخ واكل كثير وهذا غير اكل الجيران اللي يرسلوه..اوفر لزوجي اكل رمضان من سمبوسه وغيره حتى في غير رمضان فيصير في رمضان عادي مو لازم سمبوسه يوم بيتزا ويوم معجنات ويوم سمبوسه وهكذا..وان كان فرزلت قبل رمضان مو عشان احط اصناف كثيره لا بل عشان الصدقه وعشان يكون وقت المطبخ اقل.
السحور لازم رز عشان يشبع لفتره ما قدرت اغيرها هذي .وومكن باقي الفطور..
باقي الفطور مانرميه وان ماقدرت اطلعه في نفس اليوم ..ادخله الثلاجه ونتصدق فيه ثاني يوم
فكرة من عالم حواء وضع ماء للطيور او حبوب ف يعلبه في النافذة..
النقطة الأخيره لها علاقه برمضان الماضي..شوفي ايش الأشياء اللي كنتي مخططة تعمليها قبل رمضان وانتهى رمضان ولا عملتيها .. هذي السنه اجعليها اول اهتماماتك..المهم ان تكون دينيه ..اذا غير ذلك مو لازم تعمليها :wink2:

فكرة تزيين البيت بوضع مفرش معين وفوانيس صغيره وطاولة صغيره للضيافه . وان كنت كرهت هذي الفكرة لأن الناس صارت تبالغ
الأسواق صارت تنزل كل شي لأن شعبنا مستهلك صار الاستعداد لرمضان مبالغ فيه بشكل كبير
عشان كذا ماكتبتها مع الافكار فوق..
بالنسبه لي عندي نفس المفرش من ثلاث سنين تقريبا كل مره ازين فيه بطريقه مختلفه مع تمر وحلاوة للعيال.