ربي يسعدها سعادة الدارين اللي بترد ع موضوعي

السلام عليكم
كيفكم بنات اتمنى الجميع بخير
متابعه لمواضيعكن م زمان فاستفدت منكن كثير
وحابه اعرض عليكم مشكلة امي ولاكتبتها الا عشان أقراء ع امي روددكن ونصائحكن لعل وعسى تخففن عنها الله يجزاكن الجنه
ابوي متزوج معدد ثلاث ومدلع زوجاته وظالم امي تخيلوا لمن معاملة وحتى ليلتها ظالمها يروح يقضيها عندهن ولاجاء حزة العشاء جاء تعشى ونام هذا غير المعامله السئيه لها وهي ياقلبي عليها تتعب أكله تكون مخلصته بدري وتجلس ليلها كله تنتظر يجي يأكل وغير ذم الأكل احيانا يذمه والليل اللي مو عندها مايجيها الا مرور عشان يرقى فوق عند زوجته الثالثه تخيلوا باليوم كم مرور تشوفه بعيونها ومطنشها ولاكلمة ولاابتسامه طيب اقل شى احترمها ورح م الباب الخارجي الله يرزق امي الجنه ع كثر صبرها له مع ذلك اللي يقهرني انا وخواتي انها تحبه وتعامله بكل لطف واحترام وتحاول تكتم بصدرها ماتشكي ولا تكلمه بشى اهم شى عندها راضي عليها ومستحيل تسوي شى يغضبه تخاف منه وتحترم زوجاته وتحبهم بس عشان يرضى عليها وللأسف الطيبه دايم الناس تحتقرها زمناً ذا صار الطيب عندهم ضعيف حسبي الله وكفى،،
المهم انا وخواتي مو عاجبتنا معاملة ابوي لها نقول اقل شى اقطعي علاقتك بزوجاته عشان تقهرينه لانها حبتهم كله عشان يرضى عليه وهو للاسف مايقدر فيه المعروف اقسم بالله لو انه مو ابوي كان دعيت عليه لكن عشانه ابوي اقول الله يهديه ويسخره لامي ويرده لها رداً جميلا
والله معاملة امي لزوجته الأخيره كأنها وحده م بناتها تحبها تدلع عيالها تسوي لها احيانا اكل المهم علاقتها فيها مره مره متعلقه فيها وهي إنسانه طيبه لكن الله يهديها دايم تنقل حكي أبوي وزوجته لها بما انه ما يحاكي امي بشى وهي كل شى يقوله لها فأامي تحبها عشان تعلمها بكل شى حتى الأشياء اللي يسويهن لها ويدلعها ويشري لها تجي تعلم امي فيهن وأمي مسكينه تسولف معها وتضحك واذا جت البيت عندنا شكت انا ليش حضي كذا انا وانا ومن هالكلام اللي يخليها تعيش حزينه وتندب حضها وليش ابوك يكرهني طلبناها انا واخواتي تكفين اقطعي علاقتك فيها بحيث ان ابوي مايعلمها بشى فحنا ودنا ماتدري عن حالهن لأمن خير ولاشر عشان ع الأقل ترتاح معنا حنا ي بناتها ودنا تسولف معنا وتوسع صدرها لكن للاسف علاقتها فيها جابت لنا مشاكل ودايم اذا جينا نبي نتونس جلست تشكى م حضها نحاول ننسيها وللأسف اذا رحنا ببيوتنا ترجع وتروح لها وم بكرى تجي وتصيح وتضيق صدورنا انا بصراحه أفعال ابوي وكلامه اللي تقوله لاامي اقسم بالله شى يضيق الصدر لكن اقول لامي لا تسمعين لها عشان ترتاحين ويعوضك ربي بالجنه اللي احسن م الف رجال
للاسف امي لاتعاتب ابوي ولاشى بس تجلس كذا ضايق صدرها حزينه تندب حضها قسم بالله تضيق صدورنا ولآتسمع لنا
انا احس لو بتقطع العلاقه كان يمكن بترتاح لان ابوي مستحيل يكلمها بشى ولا راح تعرف شى عن ابوي وزوجاته وبكذا ان شاء الله بترتاح--
والمشكله كل بين اسبوع وهي جايه مشكله بينهنن يعني احس امي ع كذا بتتعب وحده كبيره وفيها سكر وماتتحمل وهي كل شوي بمشاكل حنا خايفين عليها والا ابوي والحريم ماعليهم منها الله يخليها لي ولخواتي ويمدها بالصحه والعافيه ،،
بنات تكفون ماكتبت لكم قصتها كامله الا أبيكم تنصحونها م قلب م كلام ونصائح ودعوات ربي يسعدها ويشوف ابوي سعادتها يارب وعافيتها ويسخر لها ابوي وإخواني وينصرها ع ابوي نصرا عزيزا مقتدر
وترى خبرتها اني كتبت الموضوع وقالت اقري علي الردود مره متضايقه محتاجه احد ينصحها ويعلمها ع صبرها عاد هي تحب المنتدى دايم اقراء عليها وهالموضوع ابقراء عليها ردودكن ودعواتكن لها الله يجزاكن الجنه