رثاء.....

رثاء في والدي _رحمه الله_
قصيدة اعجبتني في الرثاء واحببت اكتبها لكم
فهذه القصيدة كتبها احد الاخوة لما توفي اباه فجأه في مكان بعيد عن مدينتهم
ووجد بعد وفاته لوحده رافعا سبابته

يابوي من بعدك جفت عيني النوم.........من موتتك والكون ضايق علينا
انشهد اني فيك يابوي مكلوم ..........والجرح من فرقاك مكينا
من غيبتك والصدر يابوي مكتوم.........ومثل اللهب يصلا فؤادي حزينا
لو البكا ينفع بكيتك على الدوم..........مير القدر يابوي به مؤمنينا
شمسك توارت حال من دونها غيوم.....وعز الله إنا في فراقك بلينا
طار الفرح وأستوطنت بعده هموم .......وظلم سما بيت فقد له ثمينا
ما نعترض يابوي ذا يوم محتوم .........وحنا بما يحكم به الله رضينا
دنيا ولا يوجد بها حي يدوم ..............وكل يبي يرحل مع الراحلينا
امر عظيم وماحصل شي مقسوم........والله على هول المصيبة يعينا
يسأل مشاري عنك ما شفته اليوم ......وترد نجلاء ليش ابويه نسينا
واحس في جسمي سكاكين وسهوم .....من حال جهال شكو ما شكينا
دمعة غرير امسى من ابوه محروم......منها الحديد الصلب يمكن يلينا
منساك واللي فارض الحج والصوم.....ياتاجنا اللي تحت ظله ربينا
الطيب نلته والكرم فيك موسوم .........شيخ بصعبات المواقف تبينا
من جاك عاني ما تحاشاه بعلوم.........يرجع وهو يضحك حجاج وجبينا
ادعي عساك بجنة الخلد مرحوم .......عساك يابويه مع الخالدينا
يالله عسى جسمه عن النار معصوم .....وتلطف بعبد فيك عنده يقينا
يارب تجمعنا به يوم معلوم ...............يالواحد اللي مال غيرك رجينا
والختم صلوا عد مابالفضا نجوم.......على الذي في سنته مقتدينا
......................
كتبها سلمان الحربي
.....................
اقتراح: وش رايكم اللي عنده قصيدة عن الرثاء
يكتبها