رجاءاً إلى كل الحكيمات .. قبل يوم الثلاثاء

أهلين حوائيات .. صبحكم الله بالخير والعافية ..

بنااات انا كتبت قبل كذا موضوعين لنفس مشكلتي .. اللي هو وضعي ..

أنا حملي جدا متعب ومهدد بالسقوط .. فقررت اسوي ربط لعنق الرحم بعد ما اسقطت 3 تسقيطات من خمس شهور وكلهم اولاد .. الحمد لله على كل شي .. ومعي بنتي القمر الله يحفظها لي ولأبوها ..
ي بنات انا عايشة مع ام زوجي والله انها تدور لي المشاكل في كل ثانية .. والله تنها تدخل غرفتي وانا نايمه وتطفي المكيف وتاخذ بنتي وتنيمها عندها وكل ما مسكت الغسالة تقول خربتيها وتتلفظ علي بأسوء الألفاظ السوقية والله الشاهد .. وما اسمع من زوجي الا اصبري ومن ذا القبيل ..
طبعا كل ما حملت اروح لبيت اهلي وكل ما اسقطت طبعا لبيت اهلي .. وسافرت معهم وانا حامل ببنتي وولدتها في بلد الإقامه عشان احافظ على اقامتي (رغبة من زوجي) 

والحين انا حامل ومسوية ربط .. وممدده طبعا ام زوجي ما عندها دا الكلام .. لازم اقوم فيه واسوي له اكل واكوي واغسل .. وتفتكر انو بنات الحين زي بنات قريتهم اللي ينفخوا الحطب من صبح الرحمن .. وحتى وهي تحتضر لازم تخدم زوجها .. وعملتلي اشياء كثييييرة بس كتبت في مواضيعي السابقة ..
امس جت خالت زوجي وتحكيلي قصص ان المره لما تروح كثير لبيت اهلها وتجلس اسبوعين او ثلاث كل فترة لما زوجها تروج عليها وهي مش داريه انه لهم اربع سنين متزوج عليها وما تخدمه ولا تلبس زي الناس  ... حسيتها تقصدني لما دروا اني بسافر لاهلي وما حد بيخدمني اصلا في المدينة اللي انا عايشة فيها ..
وما عندهم فكرة الشغالات ابدا لان عندهم عيب .. بس حلال لاختهم واخت زوجي ..

زوجي راح للقرية عشان يتطمن على جدته وجلس ثلاث ايام وهاذي مو اول مرة ..
حسيته تغير علي لان عنده ديسك فما عاد يجلس جنبي ولا يكلمني كلام حلو زي اول .. ولا ينام معي في الغرفة .. له اكثر من شهر .. بس تفرجه للتي في ولا يلاعب بنته .. ولا ينام ..
المهم امس لما روح من السفر تتوقعوا فين راح ؟ راح لبيت جدته من المغرب لما الساعة تسعة 
دخل وسلم عالبيت وبنته وانا لا .. طبعا زعلت منه ورحت تمددت راح نام للصالة هو وبنتي وامه .. عشان المكيف قوي .. قلت لنفسي خلاص رح ابدأ بالسلام واكون احسن منه .. 
رحت سلمت عليه وقلت له الحمد لله على سلامتك .. هو فرح بس كان نعسان وحب يدي ورحت لغرفتي .. ما قدرت انام من التفكير .. كلمني زوجي اول وقال خلي اهلي يطلعوك لعندهم ويهتموا فيك .. انا يلا اهتم بنفسي ..
اهلي حجزوا لي بعد بكرا .. وانا افكر ما ابي اروح واخلي زوجي سبع شهور صعبة .. وافكر في صحتي لانه خطر علي وعلى الجنين كثرة الحركة .. وام زوجي تتوعد اني راح اندم وتلمح انها راح تزوجه وببلاش مليان منهم .. !!

ايش اسوي ؟؟ بالله حطوا نفسكم في مكاني وايش الحل المناسب ؟!  ما عندي اهل هنا بس بيت ابوي فاضي وما رضا زوجي نروح لهناك واجيب شغالة .. !!