السلام عليكم ..
كلنا نعرف ان الطلاق امر مقدر ومكتوب من قبل ننولد ...
بس بخاطري شي .. ابي اعرفه .. هالايام كثر الطلاق جدا وين عن اول ماكان في الجماعه الوحده الا وحده ولا ثنتين مطلقات .. الحين صار بكل عايله فيه مطلقه ان ماكان اكثر
الحين الطلاق وضع بيد الرجل ليش مو علشان هو قادر على انه يتحكم باعواطفه واعصابه ومو مثل الحرمه اللي تتحكم فيها عاطفته
وعلى اساس ان الرجل يحكم العقل قبل العاطفه
طيب ليش هالنوعيه من الرجال قلوا
ياعالم اسمع قصص طلاق غريبه استغرب ان الطرف الثاني فيها يستاهل كلمة رجل .. !!!
يعني وحده تزوجت وبعد سنتين وهي عند اهلها بمدينه ثانيه وبعد ماخلفت بنت عمرها مايتعدى 3 شهور يتصل عليها زوجها ويقولها انتي طالق ... !!!
السبب ابوه قاله طلقها ....!!!!
هذا بالله رجل ؟؟؟
ابوها حس انه مزوج بنته بزر للاسف فاصر عليه يطلقها بالثلاث علشان لا يفكر يرجع لها
وحده زوجها شك فيها بسبب شي لقيه عندها وهي والله مالها دخل ومظلومه ... ماننكر من حقه يزعل ويعصب ويستوضح ويشوف وش السالفه وان ثبت انها صدق خاينه او شي من هالقبيل له حق يطلقها .. وقد يكون اساء الفهم خصوصا انه هاجرها من شهور مايدري عنها....بسبب غلطاته بحقه اللي ماتعد ولا توصف من خيانات وسفرات وشرب واهانات وتقصير واخر شي طردها من البيت بعد ماهانها وقالها روحي لاهلك .. في خلال ساعه فكر انه يكلمها يسالها وش هاللي لقيه ماردت طبعا بحكم زعلها منه وحقدها عليه ... قام علطول حكم عليها وقذفها وطلقها بالثلاث وتحلف فيها وفي اهلها ..وظلمها وقال عنها اللي مو فيها .. وهي مابعد درت عن شي لقت نفسها مطلقه في اقل من ساعه صار كل شي !!! ... ولما عرفت وش كان يبي كان قد فات الفوت ولا عاد ينفع التوضيح ..لانه طليقته الحين ولا تحل له ... !!!
وين العقل هنا ... !! هل هذا عقل يفكر ان يتاكد قبل يحكم او يظلم او هو رغبه في الطلاق فقط والاذيه ... !!!!
وحده زوجها تهاوش معها وكسر اثاث البيت قدامها وهي تقفلت عليها بغرفه من الخوف وعقبها وداها بيت اختها رماها هناك ومنعها تاخذ ملابس واغراض لها ولعيالها ... ودخلت على اهلها منخفض ضغطها وماتقدر توقف وبعد شهور من التطنيش .. راح خطب غيرها ولا فكر فيها .. كل هذا ليش علشان يجي منها طلب الطلاق ويوم طلبته قال رجعي مهري ... !!
ياعالم وين الرجوووووله ... !!!
وحده تخاف ربي وملتزمه وربي وحافظه بيتها وعيالها والله مايطلعها الا مره بالشهر او مره كل شهرين حتى اهلها حارمها منهم ... ولا قنوات الا بعض القنوات مثل السودان واليمن والاخباريه بس ولا نت ولا تلفون ... وهي اصلا غشيمه بهالدنيا ماتعرف شي من التكنولوجيا ولا تعرف شي من امور الدنيا .. لدرجة نحسدها على بياض قلبها وصفاءه اللي ماتلطخ بملذات الدنيا ...زوجها اخذها البر فجاه لحالها ويوم ابتعد مره مسكها وقام يصارخ عليها ويتحلف فيها ... ليش ؟؟؟
يبيها تعترف مع مين تخونه ؟؟؟؟ وبكت وحلفت وبالمصحف وكانت بتموت من الخوف لدرجة تقول ابي احد يمر واصرخ اقول الحقوني .. هذا مع فرق حجم الجسم بينهم فهي تساوي نصفه ...!!!
ليش لانها ماهي حاره معه بالفراش مره ليش لانه كرهها فيه بسبب سوء تعامله معها وبالاخير شك ان هالبرود بسبب طرف ثالث مو بسببه ... !!!
ولما اتخذت موقف هددها بالطلاق واخذ اطفالها منها فصبرت لانها تتالم لفكرة فقدانها فلذات اكبادها
قال رجال قال ... !!!
والحرمه دايم تسامح غلطات كبر الجبال وتتكتم على مصايب تشوفها والله يابنات كل هالامثله اللي ذكرتها من اقارب لي جدا
ويشهد ربي انهم مظلومات كلهم واحسبهم هكذا والله حسيبهم ... وان كن اخظئن في شي فهن من البشر اللغير معصومين عن الخطأ
لكن اخطاؤهن تافهه لدرجه لا تقارن بنصف اخطاء ازواجهن في حقوقهن
هذول اللي اعرفهم كم عانوا وتحملوا الاساءات والمشاكل رغبه في الحفاظ على بيوتهن وعلى ازواجهن ...
والله والله ان كل وحده من هذول تقريبا كل سنه لها مشكله كبيره مع زوجها بعد مايغلط غلط كبير عليها ومجرد اتصال منه وكلمتين طيبه ترضى وترجع لبيتها
وهم باعوا العشره لاتفه الاسباء ولتغلب الشيطان على عقولهم علشان يفرق بينهم وبين زوجاتهم صور لهم امور واوهام نسجها لهم وصدقوه
وللاسف انتصر عليهم الشيطان وهذا بسبب بعدهم عن ربهم كل هالامثله رجالهم بجهه والدين بجهه ولا يعرفون من الدين الا ...
حديث لو امرت المراه تسجد لاحد لامرتها تسجد لزوجها
الحرمه لو نامت وزوجها مو راضي عنها تلعنها الملائكه
ان الله لا يغير مابقوم حتى يغيروا مابتانفسهم فغيري من نفسك علشان اغير معاملتي لك
هذا بس اللي حفظوه من الدين والقرآن والسنه
ونسيوا حقوق زوجاتهم ...
نسيوا الاحترام .. نسيوا العشره بالمعروف..
نسيوا ان الحرمه مخلوق ضعيف يمشي بالكلمه الطيبه مو بالتحقير والاهانه والهواش وفرض السيطره والقوه فكل هذي الامور منفرات وليست مرغبات
نسيوا ان لها حق تبرر وتوضح ومثلها مثله ممكن تغلط فلها حق يسامحها لو غلطت
ولها حق تنعطى فرصه وثنتين وثلاث مثل ماعطته وتنازلت علشانه باهم طموحاتها ورغباته
ارحموا من في الارض يرحمكم من في السماء ...
هذي امثله ولا اعمم فاصابع اليد مو مثل بعض ... نحمد الله على المصايب ففيها عظيم الاجر والجزاء
ونعلم ان الله مانزلها بنا الا رحمة بنا وان كان ظاهرها مؤلم وقاسي فمن ورائها خير عظيم اراده الله لنا
كم نتالم بسبب طلاق او فراق او ظلم ... وكم ندمنا وتحسرنا ...
لكن حينما نعلم ان في الطرف الاخر من هذه المصيبه الخير والسعاده والاهم الراحه والاعظم الاجر
فلا يسعنا الا ان نفرح ونرضى ونحمد الله عز وجل على مابلانا به
هالضيق والالم اللي مر بك ماهو الا الضيق اللي بعد فرج وتوكلوا على الله ومن يتوكل عليه فهو حسبه
احسنوا الظن به فهو عند حسن ظننا به ان كان خير فهو خير ... ولن اكمل لاني اود ان تتمسكوا بهذه الكلمات لتكون دافع لتحصيل الخير ...
أستغفر الله واتوب اليه
~ هـــلا ~ @hla_108
عضوة جديدة
يلزم عليك تسجيل الدخول أولًا لكتابة تعليق.
عشتتتتتتتتتتتتتتتتتتتتتتي صادقه والله معاد فيه رجال ماتو الرجال الحقيقيين معاد فيه الى اللهم لك الحمد مدمنين نت وكوره واستراحات وسفريات وبصبصه على الحريم واااااااااااااااخر شي يفكر فيه العيال وام العيال الله يقلعهم سيرتهم تجيب المر
اي والله وين زمان اول
الحين الرجال يسافر ويسهر بالاستراحات وعلى النت وطول وقته مشغول
وبالاخير يسوي مصيبه لو درى انها سوت شي من وراه ولا سوت شي مايعجبه ولا قصرت
وشلون تعامله على انه زوج وهو اخر مايمكن ان يطلق عليه هو اسم الزوج
الحين الرجال يسافر ويسهر بالاستراحات وعلى النت وطول وقته مشغول
وبالاخير يسوي مصيبه لو درى انها سوت شي من وراه ولا سوت شي مايعجبه ولا قصرت
وشلون تعامله على انه زوج وهو اخر مايمكن ان يطلق عليه هو اسم الزوج
الصفحة الأخيرة
كان الله في عونا