رحت أسجل بنتي بالحضانة وياليتني مارحت

السلام عليكم ورحمة الله وبركاته

بنتي عمرها سنة وشهرين رحت أمس اسجلها بالحضانة (Daycare) في أمريكا وشفت الأطفال
وضاق صدري حسيت نفسي أم فاشلة :eek:
أول مادخلت واحد من الفصول لقيت ولد صغينووون
قاعد على طاولة الأكل بكل هدوء وياكل زبادي بنفسه ماشاءالله الله لايضره ..
يمسك الملعقة أزين مني والأكل مايطيح منه ولا نقطه << برضو ماشاءالله لا يجيه شي الضغنون ..
أنا اللي احط الملعقة ببفم بنتي يطيح نص الزبادي وهو ماوصل لفمها :22:
أنا يوم شفته تنحت فيه وهي تكلمني وأنا اقول لها كم عمره كم عمره ؟؟؟؟
لو هي مسلمة كان قالت لي اذكري الله يامره نظلتي أولاد الناس
المهم وتقول عمره 15 شهر يعني سنه و 3شهور <<< احلفي

وشوي اشوف بنت صغينووونه قاعدة على كرسي وتشرب الحليب من كاس عادي زي اللي يشربون منه الكبار
وطلع عمرها 14 شهر .. وهنا المشكلة لما سألتها كم عمر البنت قالت لي انتي اكيد بنتك خلاص ماتشرب الحليب في الرضاعه اكيد بدت تشربه بكاسات الأطفال على الأقل <<< أم الاحراج :o
قلت لها خلينا من بنتي وريني بعد وش عندكم <<< محل أقمشه مو حضانة

ايييييه وأهم شي ... النووووم ... النوم ياناس اذا جت الساعه 12 الظهر يفرشون لكل واحد فراش صغير على قده ويسكرون الستاره وكل واحد يروح ينام على فراشه .. وأنا هنا تخيلت بنتي معهم ... بنتي ماتنام الا بطلعة الروح ولازم تنحبس بسرير عالي كنه سجن علشان تنجبر تنام والأنوار كلها مقفله ومافيه صوت ومستحيل تنام بمكان مفتوح
يعني زي الأرض .. والله مايردها الا الشارع اللي جنبهم ..

والله ضاق صدري بقوه ومن رجعنا البيت وانا راصه قدامها كوب وملعقة واعلمها بس والله حسيتها صغيره
لا ويوم جاها النوم فرشت لها على الارض ابي اشوف وش تسوي قامت تتشقلب عليه وتضحك

المهم اني تححححطمت جدا جدا جدا
علموني ياناس مين الصح أنا ولا هم ولا أنتم ولا مين؟؟؟ ومتى ابدا اعطيها الملعقة بنفسها ومتى تترك الرضاعة
ووشلون اخليها تنام على الأرض واذا قلت لها (قو سليب) تروح تنام من نفسها <<< احلمي

مرات اقول اسجلها عندهم وهم يعلمونها ومرات اقول حرام صغيره على هالأشياء
ومرات اقول لو سجلتها بتقعد عندهم اسبوع بيكلموني يقولون
تعالي خذي بنتك ولانشوف خشتك انتي وياها ... وش رأيكم؟؟؟؟