رحت اليوم مركز طاقات شوفو وش صار معاي((استغفر الله العظيم واتوب إليه))

السلام عليكم ورحمة الله وبركاته
كيفكم أخواتي في عالم حواء
بدخل في السالفة على طول قبل حوالي عشرة ايام ارسلوا لي مركز طاقات رساله انه حافز ارسل لهم اسمي و لازم اتواصل معاهم
ودقوا علي أمس وسألتني الموظفة كم سؤال زي هل انت جاده بالعمل ؟ هل ولي أمرك موافق؟وكم سؤال وقالت تعالي بكره إلا هو اليوم الساعة 9صباحا ولا تتأخري وإلا نعتبرك منسحبه
وأرسلت العنوان عبر الأيميل
بالنسبه لي طلعت مؤهله في حافز ولله الحمد
ورحت لهم اليوم
قاموا اجتمعوا فينا انا ومجموعة من البنات وجلست تشرح وظائف حافز وإنه لازم نستمر معاهم في الدورات حوالي 9أسابيع وراح يدورون لنا على وظيفة
طبعا الوظائف كلها في القطاع الخاص زي بنده وموبايلي وزين وبوبا
قمت سألتها عن المدارس الأهليه قالت ممكن يدورون لنا على وظاءف فيها لكن الراتب بحدود 1500
بعدها اخذتنا في جوله في المكان وورتنا لوح الإعلانات حق بعض الوظائف المطروحه
فيه وظائف من بنده ومدارس أهليه وغيرها ولا حضت كثير منها رواتبها 1500 مع بدلات
وبنده تقريبا 2400 مع ساعات عمل لا تقل عن تسع ساعات



المهم التقت كل وحده في البنات في المجموعة بالمستشارة حقتها
جت المستشاره وكلمتني وسألتني مجموعة أسئلة زي وش فهمت عن حافز وبيانات شخصيه
وقالت ايش تبغين وظيفة؟
قلت أبغى معلمه حكومي. قالت لا احنا تبع الخاص
وقالت أغلب الشركات والوظائف في المصانع أو الكاشيرات وغيرها دوامها من 2صباحا إلى 5 العصر
يعني تسع ساعات
أو بتكون على فترتين وهذي أصعب طبعا
فرفضت هذي الوظائف
وقلت خلاص أبغى معلمه قالت المدارس الأهليه رواتبهم 1500
قلت وين كلام الملك إن الراتب بيكون5600 ووين دعمكم يا صندوق الموارد البشريه قالت إن شاء الله قريب
قلت أنا مصره أبغى معلمه أو التحفيظ وراتبي من 3000إلى 5000 (تحلم البنت)
قالت طيب
وطلبت السيره الذاتيه وراح نرتب سوا موعد جديد


ملاحظه في المجموعة كان فيه بنات مؤهلات وبنات غير مؤهلات

ملاحظه إذا دقوا عليك لازم تردي وتحضري
المدربه قالت 5 مرات إذا دقت عليك المستشاره وما رديت عليها وطنشتيها راح يلغوك من حافز
راح يدورا لك على ثلاث وظائف بحد أقصى وإذا رفظت راح يشوتوك أوت برا النظام
حطي ببالك إن الوظائف ماهي فخمه ولاهي حكومي وأغلبها مرهقه

بصراحة جيت من عندهم وأنا ماني مبسوطه مره
كان نبغى إعانه من غير دوخة رأس وما نبغى خاص لإن تخرجنا من كليات وجامعات حكوميه فكان أولى إن الدوله توظفنا رسمي وإذا ماقدرت تنزل الإعانه مباشرة

والله حاسه إني شوي متحطمة لإني خايفة من وظائفهم ورواتبها
واللي زاد تحطمي اليوم دقيت على المستشفى الأهلي الوحيد في منطقة أهلي وسألت عن الولاده القيصريه
طلع زايد سعرها وواصله 15000 ألف لإن بكري قيصري في حكومي وما أبغى أرجعلهم وقلت نتعاون أنا وزوجي بالمبلغ لكن بعد ما حسيت إني مهدده مع حافز شكلي ما لي إلا النساء والولاده الله يعين

أدعولي أولد ولاده طبيعيه سهله ميسره لعل منكن مجابة الدعوة

الله يوفقكن جميعا لما يحيه ويرضاه


استغفر الله العظيم وأتوب إليه