رحت زيارة حق ناااااس وليتني مارحت؟؟

السـلام عليكم ورحمة الله وبركاته..
شخباركم ياعـالم حواء من زمان عنكم والله أشتقت لكم ولسوالفكم عسى ربي يسعدكم..


بقولكم شي مضايقني مره والله أحـس بقهر وتعبت من
هاالأشكال ألي عايشين معنا في شكل أنسان وهم بعيدين كل البعد عن الأنسانية..
اليوم أتصلت علي عمة زوجي تسلم علي وتسأل عني وعن العيال وهي طيبة بين وقت والثاني تتصل وتسلم ماشاءالله عليها دايم تتواصل مع الكل..المهم وحنا نسولف سألتني عن وحده من جماعتهم وهي حرمه كبيرة تقرب لأهل زوجي أذا رحت لها أو لا..
سألتها ليه قالت أنها سمعت أنها مريضة وكانت متنومه في المستشفى ونا قلت الحقيقة ونا صادقه أني مادريت عنها وهي كانت منومه 3أيـام وطلعت
قلت لها وش رايك نروح لها اليوم ونتحمد لها بسلامه
قالت خلاص وفرحت مسكينه ونا قلت لها بقول لفلان وأمرك العصر ونروح لهم أن شاءالله..
وأروح أجهز كيك،، ويجي زوجي من الدوام وقلت له قال خلاص بريح شوي وأوديكم .. قرب العصر وسويت قهوة وشاهي وأخذ كيكتي😢😥 ونروح لهم ليتنا مارحنا بس أستغفر الله العظيم..
المهم وندخل ونسلم عليهم وكانوا كلهم موجودين
وتونا والله قاعدين حتى ماشربنا فنجان وتجي بنتهم وتقول حق عمة زوجي ليه مازرتي أمي وش سوت لك أمي وهي متنومه في المستشفى كل الجماعه جاو ألا أنتي وعمة زوجي حرمه كبيرة قالت لها المسكينه الله يعلم أني ماقدرت أجي قالت وش البعيد والقريب جاء قمت أنا أبي أهدي الوضع قلت يابنت الحلال الله يهديك حنا جايين الحين نسلم على الوالده وفي بيتكم وماله داعي ذا الكلام الله لايوريكم وش قالت لي ماخلت سبه وكلمه شينه ألا قالتها لي حسبي الله عليها
تقولي ياصايعه ياالمفضوحه ياراعية البلاوي اقسم باالله صار وجهي كذا😳😳 لا وألي زاد الطين بله أختها الكبيرة تجي وتقول لنا تقهووا قلت لا خلاص مانبي شي بنطلع ليه جايين عشان نتهزاء مالت عليكم بدال ماتعطي أختها👊🏻👊🏻تقول أقعدوا أشربوا قهوة
المهم وأتصل على زوجي وأقوله أطلع حنا براء..وتقعد تتكلم على عمة زوجي ونا خلاص ودي أدوس في بطنها قلت أنتي وحده قليلة أدب وماتستحين وماتحشمين الضيف مالت عليك وعلى وجهك..وركبنا السيارة وعمة زوجي ماغير تبكي ويسألني زوجي ونا من القهر والحره قلت له..وينزل من السيارة ويدق الباب ويطلع واحد من عيالهم ويقول زوجي له أبي أبو فلان يقصد زوج أختها وولد عمهم الكبير..ويقعد يتكلم مع زوجي ويهديه ويقول زوجي له أسمحلنا بيتكم ذا والله معاد أحد من أي أهلي يدخله ولا عاد تعزمونا وتقول حنا ربع وجماعه.. مدام أنتم ماتقدرون تسنعون بناتكم..
تتعدا على عمتي وهي حرمه كبيرة ماقدرت سنها وجيتها بيتكم..
أقسم باالله ان الكلام غير الشوف ألي صار شي غير طبيعي.. ونا بكيت من كل قلبي عورت قلبي عمة زوجي والله يابنات أنها طيبه وحنونه ودايم في زيارتها لنا تدعي لنا ولعيالنا بالخير والذريه الصالحه..
أنا أستغرب ليش الناس الأنسان الطيب يسوون معه كذا وأذا أنتي وحده قووويه ولسانك طويل محد يقدر يسوي لك حاجه..حسبي الله ونعم الوكيل على كل أنسان مايخاف الله..
ماقهرني ألا الكــيكة حســافه وخسارة فيهم في ذمتي..