رحت لصديقاتي وفجأة صارت حريقه بيني وبين زوجي وتهديد بالطلاق.. //اكتفى من الردود

السلام عليكم حبيباتي
أنا متزوجة لي اكثر من 3 سنين.. وعندي عيال
ومثل اي زوجين تصير بينا مشاكل
لكن زوجي عصبي نااااار
وهو من النوعية اللي اذا رايق خلاني ملكه
واذا زعل مني خلاني ما اسوى شيء

وامس كنت معزومه عالقهوه عند صديقاتي
اللي لي 4 شهور ماشفتهم ولازرتهم
وهو نزلني وقلت له مرني بعد العشاء
بس اول ماقالوا الله اكبر.. لقيته جاء..
دق علي وقال انا تحت..
وانا ماكملت ساعة من جلستي.. باقي الحريم ماجو..
تعذرت منهم وطلعت بسرعه وركبت السيارة..
وكنت ساكته.. وهو يحارشني بالكلام..
لحد ماقلت له: الحين مو احنا اتفقنا تجي بعد العشاء؟
قال: ايه بس واحد من الشباب دق علي يبيني ضروري..
قلت له: كان تعذرت منه أو قلت له بتتأخر شوي..

ما امداني اخلص هالجملة الا شبت حريقة بالسيارة..
صراخ.. هواش.. عصبية.. شيء ماتتخيلونه!!!
مو انتي اللي تدبرني.. تخسين.. ايش فاكرة نفسك..
انا اللي عطيتك وجه.. قله ادب..
واحد غيري ما اخذك لمشاويرك التافهة بعد الدوام والتعب..
لكن اشكالك ماينفع معهم التقدير.. انتي ماتقدرين احد..

وانا انفجعت وجلست اصيح.. قهرني والله العظيم..
ومع ذلك مارديت عليه بولا حرف.. وجلست امسح دموعي..
ولما وصلنا البيت ضرب بالباب بقوة..
وقال يلا انقلعي انزلي ماني فاضي لك..
اذا رجعت القى عشاي جاهز..

سويت العشاء.. كويت ملابسه.. اخذت لي دش..
جلست بالصالة اشوف التلفزيون.. وانا ميته قهر..
بعدها بساعتين جايني بشياطينه..
سلم.. رديت السلام..
وكنت ساكته.. وهو يحارش من تحت لتحت ويهاوش عياله..
قمت رحت الغرفة انسدحت عالسرير واطقطق عالجوال..
دخل الغرفة ورمى شنطتي وجلس يحوس فيها بقوه..
قلت له: وش تبي بشطنتي؟؟!!!!
قال: ابأخذ علك.. ادري العلك بشنطتك..
بعدين انا مو حرامي.. والشنطة انا اللي شاريها..
مو انتي اللي تعلميني الادب ولسانك الطايل لازم اقصه..
قلت له: الشنطة فيها مكياج اخاف يتكسر..
ولو قلت لي وش تبي بعطيك اياه..

طلع دقيقتين ورجع لي الغرفة وهو مولع..
جلس قدامي يهااااوش.. انتي متى بتعرفين تحترميني؟
متى بتعرفين ان اللي قدامك رجال له هيبه؟
المفروض اذا شفتيني تأكلين ز*** .. وتنتكتمين..
مو كافي جملتك الوسخه اللي بالسياره الخ الخ..

قمت انا طلعت من الغرفة.. ورحت الصاله..
قام لحقني..
وغسل يده.. وجلس يشوح بيده على وجهي..
يعني يرشق الماء علي وهو يهاوش.. حركة وقحه..
انا طول الوقت اقول له ان شاء الله خلاص ان شاء الله..
بعدين قلت: لو سمحت لا ترشق الماء على وجهي.. خلنا نتكلم بهدوء..

قام كب كل المويه اللي بيده على وجهي..
انا هنا خلاص ماعاد فيني.. بدون ولا كلمة.. ضربته مع كتفه..
وقلت له خلااااااااااص مافيني اتحمل خلااااااص..
هو انصدم وراح وتركني..

جلست لحالي بالصاله اصيح.. بعدها بربع ساعه رحت له..
وقلت له يافلان ماقصدت اضرب كتفك بس انت كلامك وتصرفاتك اليوم غريبه..

قال لي بصراخ: انقلعي للحين أطلقك وافتك من وجهك..
قلت له: نعم؟؟ تطلقني؟!
قام نط علي وصفقني كف على اذني..
طلعت وانا مرتاعه.. ولحقني للصاله..
وجلس يقول: انا تضربيني؟ انا تمدين يدك علي؟
انا تتجرأين علي؟
انتي مافيك ذرة انوثة.. والله انتي واخوك واحد..
انتي ماتحترمين احد.. انا قرفت منك..
تراك ماتسوين شيء عندي.. ايش فاكرة نفسك الخ..
وكلام وسخ وسخ وسخ.. وانا مرتاعه وساكته..
واذا هاوشني وقال تكلمي.. قلت: ان شاء الله صح ابشر..
عشان افتك من شره..


بالاخير راح يبلع عشاه.. واخذ مخدته ونام بالصاله..
وانا نمت بالغرفة..
وقام متأخر اليوم وضرب باب الحمام.. يعني تراني معصب..


كرهته.. كرهته.. والمشكلة يشوف الحق معه..
مايعرف يناقش وبيطلع علي عقده ونفسيته.. انسان مستفز..
وانا ماتعودت ان احد يكلمني بهالاسلوب الوسخ..
من زمان كنت مع كل مشكلة اطلب الطلاق وهو يرفض ويترجى..
والحين جاي هو يهدد فيه.. وانا بخاطري اقول طزززز..


انا الحين جالسه بالبيت..
لكن حاطه ببالي اسحب عليه تماما..
ومتأكدة انه بيرجع وبيكمل هواش وقلة حياء.. لانه نكدي..


بنات مالنا اسبوع راجعين من ماليزيا..
رحنا تمشينا وانبسطنا وهو قبل امس معطيني مصروف..
وقال لي لك مفاجأة عالعيد.. وشغلات كثير حلوه صارت..
لكن اللي امس شفته شخص ثاااااااني..
صار شيطان فجأة.. ورجع يفتح لي مواضيع ومشاكل قديمه..
ويقول: انا تنازلت قبل كذا مرة لكن ماراح اتنازل مرة ثانية..
يقصد مرة هو ضربني فيها ورحت لاهلي شهر وطلبت الطلاق..
يومها هو اللي جاء يتعذر ويترجاني ويرتجاهم ارجع له..
وانا اللي تنازلت وسامحت ورجعت.. والحين الاخ يقول انه تنازل..


بنات انا مغتثه.. وربي تعبانه.. عايفته واحسه عايفني..
ياليت الحكيمات يعطوني رايهم..
ويشهد الله اني حكيت القصة بصدق وانصاف..