السلام عليكم ورحمة الله وبركاته
امس رحت لمنتزه السلام وبصراحه هو احسن منتزه بالرياض من وجهة نظري مسطحات خضراء واشجار النخيل العاليه ومرتفعات خصراء تجنن وبحيره كبيره فيها سمك ملون وجسر منور يطل على نوافير رائعه من جد هذا غير الالعاب اللي بفلوس واللي مجانا وغير القطار اللي معطي جو حلو للمكان
ونظافه مستمره وامن وامان ولله الحمد
لكن :
الشيء اللي خرب علينا قعدتنا هو الآتي ..
* عائله سعوديه كلهم حريم وبزران اصوات عاليه ووقاحه وغطى مفتوح
* بزورتهم يضربون ولدي وياخذون كورته ولما تكلم زوجي عليهم بكل وقاحه يشتمون زوجي ويبون يضربونه لولا انه كبر عقله وسفههم ولا كان علوم
* بناتهم الصغار لازقين عندنا على بساطنا ولما شفت الوقاحه طردتهم وصحت على امهاتهم اللي قاعدين يسولوفون ويكرون ضحك ولا على بالهم ولا تغطوا الا لما جاء زوج وحده منهم تغطوا على بالهم متسترات
* وغير كذا في حريم ملقف تمشي من عندك وانتي جالسه وعيونها على اكلك وشربك وزوجها يمشي بجنبها وهي عيونها عندنا والمضحك انها بغت تصقع في الشجره من اللقافه
* وغير البنات اللي يمشون مجموعات وإذا مروا من عند رجال وعياله هدوا المشي تقولون البنزين عندهم قضى ويحاولون يعلون اصواتهن لعل وعسى احد يعطيهم وجه ( والله مساكين ارحمهم طايح حظهم لانهم يتبرجون يبون احد يطالعهم ولا فيه إلا الحثاله اللي من شاكلتهم ) لأن الانسان المحترم ما يطالع هالاشكال المنحطه واذا طالع ترى موب اعجاب لا والله إلا استهجان وتعجب وغضب ..
مااقول الا الله يهديهم وينور بصيرتهم
بس والله مازي الاجانب .. يوم الجمعه طلعنا وكله اجانب من جميع الجنسيات والله يهبلون في حالهم وعيالهم مؤدبين ويحترمون الغير
انا انتقد بعض العوائل السعوديين اللي ما تربوا وعمرهم ما يربون عيالهم تربيه ترفع الراس
:44::06:
gaamra @gaamra
كبيرة محررات
يلزم عليك تسجيل الدخول أولًا لكتابة تعليق.
الصفحة الأخيرة
وهذا مثل ماقلت بعض وأكرر بعض ..
نقطة ثانية المثل يقول // ياغريب كن أديب ..
وللأسف هذه المنتزهات صورتها دائما مشوهة بسب بعض روادها (المواطنين والمقيمين ).
وأكثر من يستفيد منها بحق الأجانب