اليوم الثالث في لنكاوي///السبت

بدأ يومنا من الصباح افطرنا في الفندق وبعد الافطار اتصلنا على سواق كنا اخذين رقمه من النت مع العلم ان الفندق عندهم مكتب سياحي لو بغينا ناخذ منهم ويسوون جولات الى كل مكان
جانا السواق وقلنا بنطلع جولة على لنكاوي وكانت الساعه ب25رينجت وهو اقل شي ياخذنا اربع ساعات
وهذي غلطه منا لو ماخذنا جولة لان لنكاوي اساسا صغيرة وعارفين الاماكن اللي فيها المفروض ناخذ تاكسي ونحدد المكان اللي نبغاه
المهم طلعنا اخذنا جولة وقالنا تبغون عالم تحت الماء قلنا مانبغاها لاننا داخلين بكوالالمبور وكذلك قالنا عن حدايق لكن مابغيناها
الا رحنا لحديقة النسر وشفنا مجسم النسر المشهور عندهم وكانت حديقة حلوة تمشينا فيها شوي وطلعنا






طلعنا من الحديقة وصار يتمشابنا على لنكاوي وكنت منزلة صور في الصفحه اللي قبل وهذي زيادة صور

ماشاءالله رحله رائعه استمتعت معك

طلعنا من الحديقة واقترح علينا السواق اننا نروح رحلة بحرية للجزر الثلاث وكنت قاريه عنها انها ماتسوى من يروح لها
لكن هالسواق ماشاء الله عليه نجح في اقناعنا ويمدح بهالجزر الثلاث
المضحك فيها ان وحده من هالجزر اسمها جزيرة المرأة الحامل انا كنت شايفه صور لها وانها فقط جبل زوجي قال لا لازم بروح اشوف هالجزيرة
قلنا خلاص نروح للجزر الثلاث توكلنا على الله وكان مدة الرحلة 4ساعات في البحر وسعرها 400رينجت
وهي تختلف عن المانغروف في ان المانغروف نهر وهذي بحر طبعا رحلة المانغروف احلى مرره

مشينا بالبحر ونتفرج على هالجزر ومتحمسين للمراة الحامل هههههههههه وواخيرا وصلنا هالجزيرة وياقف بنا بوسط البحر ويأشر على جبل ويقول هذا هو يالله خوذو له صور ههههه واخذت لكم هالصورة عشان تشووفونه هنا ومايحتاج تروحون له

شوفو كبر بطنها هالحرمه خخخخخ لا ومنسدحه بعد ماتستحي


مشينا ومشينا




ومرينا على جزيرة وقالنا اذا بتنزلون لها لانها جزيرة وشواطئها مناسبه للسباحه لكن احنا ماستعدينا ومادرينا فقلنا لا مانبي ناقف بس تفرجنا عليها ومانزلنا لها


وكملنا رحلتنا الى ان وصلنا جزيرة وقالنا يالله انزلو تفرجو عليها قلنا كم يبغالنا من الوقت عشان نتفرج قال اقل شي ساعه
لكن راااااااحت ساعتين يمكن ماحسينا فيها
لكن نصيحه من وحده تعبت تعب لاحد يروحلها الا اللي عنده لياقه عاااليه لانها كلها درررررررج وصعود ونزول وووووووقروود


هذي واجهة الجزيرة


وكلها زي هالدرج


واحنا نرقى وننزل ماندري وش بناصل في النهايه بس الحمد لله اللي كملنا وكنا ماندري لان السواق مايعرف عربي ولا انكليزي الا شوي
وكانت النهاية بحيرة مياهها عذبه كانت بحيرة جمييلة فسبحان الخالق كانت منعزله عن البحر يعني كل اللي نرقى وننزل اخر شي ناصل بحيرة دائرية تلفها الجبال الخضراء فسبحان الله


وكان فيها زي الاحواض مسوينها لمساج الاسماك لكن انا ماجربته لاني قريت عنه انه ينقل الامراض
وكان فيها زي العربات للي يبي يدور في البحيرة لكن كانت مرررريحه وتفتح النفس سبحان الله




يوم خلصنا رجعنا مع نفس درجنا وامشي شوي وواجلس واخيرا طلعنا وجا صاحب القارب واخذنا
ورجعنا
وبكذا خلصت رحلتنا البحريه اللي امتدت 4ساعات
طلعنا وكان السواق ينتظرنا فاخذنا ورجعنا للفندق واكملنا يومنا في الفندق مابين المسبح والشاطئ واجواء الفندق الجميلة

اليوم الاخير في لنكاوي // الأحد

كنا حاجزين على طيران اير اسيا الى كوالالمبور وهو يعتبر من الطيران الاقتصادي في ماليزيا طبعا ماكان فيه وسيلة اخرى للخروج من لنكاوي الا عن طريق البحر بالفيري الى بينانغ والا بالطيارة الى كوالالمبور ومدته ساعه

افطرنا في الفندق وغادرنا الفندق الساعه 11ونصف لان رحلتنا كانت الساعه 1الظهر
ورحنا للمطار الى ان غادرنا لنكاوي

هذي طيارة الاير اسيا طبعا صغيرة ومافيها اي خدمات من اكل وغيره الا اللي يبغا يشتري منهم
طبعا مدتها ساعه مايمدينا نرتفع الا واحنا واصلين


وهذي طيارة من الطيران الماليزي طبعا اكبر من طيارتنا واحسن خدمات مع اختلاف السعر


وهنا وداعــــــــــــــا لنكــــــــــاوي




وبكذا انتهت ايام لنكاوي الرائعه
طبعا زي ماقالو بعض الاخوات انها حرر صحيح انها حرر لكن اشجارها خضراء من الامطار
ومع انها حرر الا انها كانت وسيعة صدر ومرريحه سبحان الله


انتظرونا في كوالالمبور

يله بانتظار كوالالمبور