حبيت اليوم احكي لكم رحلة علاجي لابني نواف وكيف اكتشفت ان عنده ثقب في القلب وتشوهات في الاورده حابه احكي لكم بالتفصيل الممل عشان كل وحده تمر بمثل حالتي تستفيد و تتطمن لاني انا كنت ابحث في النت عن أي قصه او تجربه لمثل حالة ابني اللي الحمدلله الحين هو بصحة وعافية بفضل الله اللي اكرمنا بنعة الشفاء والصحة والعافية
ابني لما ولدته كان مولود طبيعي والمستشفى ماشكوا بشي فيه بالعكس قالوا صحته ممتازه ولا مافيه الا العافية ولما كان عمره 20 يوم صار معه زكام وطول معاه شوي و لما صار شهر ونصف صارت تجيه زيا لكتمه ونروح المستشفى ويعطونه اكسجين او فينتولين اللي كل شهر يكتبون له 6 الى 8 جلسات فينتولين بسبب الكتمه رحت فيه للدكتور ممدوح في عياده الدكتور اسماعيل رسلان وقالي ان ابني عنده حساسية في الصدر ولازم اهتم فيه عشان لايتحول لربو وكانت دائما حريصه عليه لان كل شهر اقل شي يمرض مرتين الى 3 مرات وعايشين مع المضاد الحيوي دائما
عدد زيارتنا للدكاتره لا تحصي بس كنت اقو لان مناعته ضعيفه ، على الرغم انه اول سنه كانت صحته ممتازه ووزنه طبيعي بس لما صار سنه و 3 شهور بداء فيه نحف عجيب والكل يخاصمني لايه ابنك نحيف ماتهتمين فيه ليه
والكل قام يلموني يمكن لاني ولدت بابني الثاني لما صار سنه و 4 شهور والكل قال يمكن نحف من الغيره من اخوه
المهم مرت الايام الين تعب مره وعمره سنتين و 6 شهور ووديته في مركز طبي قريب من بيتي ودخلته عند دكتور عام وانا عارفه انه بيكتب له مضاد كالعاده لدرجه صرت خبيره في هالادويه واروح اصرف دوا من راسي في الصيدليه ومرات تفيده ومرات لا
دخلت على الدكتور وكانت اول مره يكشف دكتور على نواف بدون مايبكي جلس هادي باسم الله عليه والدكتور حاط السماعة على صدره التفت لي وقال : ثقب في القلب صح ؟؟
قلت له " لا اكيد باسم الله على وليدي
استغرب وقالي : متاكده ،
قلت : مليون بالميه مافيه الا العافيه بس يتعب كثير بسبب حساسية صدره
قال: مادري بس لو رحتي عند دكتور اطفال قولي له ينتبه لنقطه انه في صوت في نبض القلب
انا لما رجعت البيت وقال لي زوجي انه بدى يوسوس ، قلت له اساسا هذا دكتور عام وش عرفه باشياء زي كذا نحن كل اسبوع عند دكتور اطفال ليش ماحد علق هالتعليق ، او قال في صوت بالقلب ، مادام هالصوت واضح زي مايقول ؟
المهم مسحت الموضوع من راسي
الين جاء يوم ورحت عند دكتور ثاني عام بس اثق فيه لما سمع الصوت قال لي فعلا فيه صوت بس مو شرط ثقب في القلب يمكن مجرد صوت للقلب .. انا وقتها فرحت بكلامه و مسحت الموضوع نهائي من راسي
وبعدها بـ 3 اسابيع تعب مره ثاني بس كان مره تعبان واخذته للدكتور ممدوح ولما قلت له على الملاحظه بخصوص صوت القلب قالي يمكن من لان جسمه نحيف وشكله عندده انيميا او اعتقد انه مافيه شي بس احتياطا اعملي اشعه ايكو في مستشفى دله . انا قلت اوكي عشان اشيل كل الافكار اللي براسي ... ورحنا لدله عند الدكتور زهير طاهر
رحنا مستشفى دله وبالقوه اخذت موعد بالتلفون عشان اشعة الايكو ، رحت الساعة 7 مساء قالوا ماعندك موعد بس ممكن ندبر الموضوع وفعلا كلم الدكتور ووافق رغم انه قالولي بالتلفون انه الموعد اوكي
معلومه عن اسعار الايكو : سعر الاشعة 1200ريال + 250ريال كشفيه الدكتور لان لازم دكتور القلب يعملها له
انا كنت متاكده ان اللي في ابني شي ابسط من البساطه ، دخلت على الدكتور وحدي كالعاده لان زوجي مايحب يدخل عند الدكاتره جلست على الكرسي سألني كم سؤال عن صحته و كيف امراضه قلت له بالتفصيل كل شي
انا لما قال كذا ضاق صدري شوي لان يمكن كان عندي خلفيه بسيطه ، دخلنا غرفة الايكو دخل الدكتور مع استشاريه ثانيه ويتكلمون بالانجليزي
الدكتور ه : وش حالة الطفل ؟ الدكتور : ماعرف بالضبط بس شي مو سهل ...
لما قال هالكلمه انا حسيت قلبي طاح بين رجليني واحس ببروده مشت في جسمي .. وجلست ادعي ربي وادعي وادعي ربي
استغربت ان الدكتور طول ويتكلم مع الدكتوره و على وجههم تكشيرة وفجاء سأل زوجي : انتو تعالجون على حسابكم ؟؟\
قاله زوجي : ايه ..؟ قاله الدكتور : ماعندكم تأمين ؟ قال زوجي : لا ... قال الدكتور : وين تشتغل ؟؟ قاله زوجي وين يشتغل وسكت الدكتور
انا خفت اكثر وش يقصد بهالاسئلة لهدرجة ابني فيه شي خطير ونحن مو حاسين فيه ؟ صحيح هو دايم تعبان بس في كل شي ثاني طبيعي ...
ابني بدا يبكي وحاولت اهديه وصرخ علي الدكتور انا وياه . هديه خلاص عطيه اللي يبيه ؟؟ قلت له ان طفش ..
كان اسلوب الدكتور مره جاف
طلع من غرفه الايكو وابني اخذ هابوه وراحو في الممر ورحت مع الدكتور وهو جلس على مكتبه ويكتب ويكتب ويكتب
ومطنشني ولاهو حاس بالنار اللي فيني ... وفجاء قالي بكل برود : ابنك فيه ثقب بين الاذينين ، ووصلة في الشريان و تضخم في الجهة اليمين من القلب .. ولازم تشوفي مستشفى حكومي اما التخصصي او العسكري او الحرس الوطني عشان يعملوا دراسه ويشوفوا كيف يعالجوه ؟
قلت له وانا كلي خوف : طيب وش بيعملون ؟
قال " هم بيقولون لكم ..
قلت : لا قلي انت مو تقول هالخبر وبس خلاص قول وش بيعملون ؟
قال : بيعملون له عمليه يسكرو الثقب و يعملون دراسه ليه التضخم هذا ويسكرو وصلة الشريان ، انا خلاص دوامي خلص مع السلامه ..
كان اسلوبه مره جاااااااااااااااااااااااااااااااااااااف انا طلعت ودموعي غرقت عيني واول ماسألني زوجي : بشري وش قال الدكتور ؟؟
انا بديت ابكي وابكي وابكي وبالقوه طلعت مني كلمتين عشان يفهم وطول 4 اايام وانا بس ابكي
الين مارجعت لدكتور نفسه اطلب منه ورقة تحويل لاي مستشفى وهنا خربها معي اكثر واكثر وسألت الموظف اذا اقدر اقابل الدكتور وطلب لي الملف ودخلت على الدكتور حتى ابني مو معي ؟ وسالته اذا يشوف حالة ابني مستعجلة واذا ممكن يعطيني ورقة تحويل ؟ قام يهاوش ويخاصم ويقولي روحي ادفعي حق الاستشاره وبعدها تعالي اسأليني
قلت له انا ماجيت مراجعه ولا ابي شي غير تطمني على حالة ابني هذا ملفه ؟ وبالقوه والصراخ رضي يشوف الملف وقال كلام مو مفهوم ان حاله ابنك مو مستعجله لا اسبوع ولا شهر .. واذا فيه شي ثاني روحي ادفعي وارجعي والورقه حق التحويل مافيه شي زي كذا روحي شوفي لك امر يدخلونك أي مستشفى يله