رحلتي مع شعري *اللي طولت شعرها واللي تبي تطوله *تدخل*

السلام عليكم، كيفكم عساكم بخير 💜؟
تذكرون موضوعي اللي قبله عن اسرع طريقه لتطويل الشعر 4 سم ب اسبوع؟
انا يوم فادت معي وطال شعري عليها * قصيته 💔😔...
قصيت واجد لاني قد فردت وكنت اربع وعشرين ساعه ستريت وفير ما احط زيت ولا اهتم ...الخ
المهم قصيته عشان ابي اتخلص من الشعر المتكسر المحترق اللي يجيب المرض .
الحين ب ابدا عنايه مكثفهه ، الحين هو الى كتفي يعني تقريبا تحت رقبتي ب انشين كذا ..
ب اقول لكم خطوات من خلال بحثي ومتابعتي ليوتيوبر اجانب وطالت شعورهم مره مع ان شعورهم افريقيه يعني صعب تطول وجافه وكذا لكن هم ماشاء الله صحيه وطويله وكثيفه .
1 قص الشعر التالف ، المصبوغ، المفرود،المتقصف
لان هذا يعيق نمو الشعر ، ولاني ممكن يكمل التقصف الى فوق ..
2 الاكل الصحي + الفيتامينات .
يعني انتي تاكلين شبسات وغازيات وخرابيط هل بيستفيد منها الشعر ؟ مممره ماراح يستفيد بالعكس راح ينضر ، الفيتامينات اشوفها شي ضروري للي اكلهم مو مره تمام "يعني متى ناكل سمك؟ يادوب مره كل سنه بالنسبه لي وخصوصا اهل نجد مو مره ناكله وهو مره مفيد للشعر من اكثر الفيتامينات افاده للشعر
ف هو يجي ع شكل كبسولات اشتريها اذا ودك ، اسمها زيت السمك او اوميقا 3
الشي الثاني بيوتين bioten مره حلو للكثافه وللقوه ويخلي الشعره نفسها عريضه وعن تجربه تمشطين الشعر م يطيح الا وحده ثنتين وعماتي كلهم مجربينها وفادت وطولت شعرهم فيه منها 10الاف وفيه 5 الاف بالنسبه لي ب اشتري ان شاء الله 5 عشان ب اكل معها فيتامين omega 3
3 شرب الماء والرياضه ..
شرب ع الاقل 6 كاسات مويه والافضل 10 ، لانه ينقي جسمك ويطلع الوساخه اللي فيه زياده ع انه اكثر مرطب للجسم ، والرياضه يابنات عليكم بها شي جميلللل ويخلي جسمك صافي وتحسين نفسك سعيده ونشطيه وتحسين انك نظيفه من جوا واصلا هي اللي تنشط الدوره الدمويه وهذا اللي نبيه
طبعا اقلها مشي 20 دقيقه و سكوات 45 مره وشوي بوش اب يعني 10 كذا اللي تقدرين وترى بكذا ترمين عصفورين بحجر واحد جسم رشيق وخصر منحوت ومؤخره مشدوده ومرفوعه وشعر ججميل وبشره صافيه
4 الماسكات الطبيعيه والزيوت
اذا انتي تبين تطولين شعرك الله يعافيك مو تحطين كل اسبوع ، ذا ماراح يفيدك بسرعه ي دووووب صحه بعد شهر والطول ماراح يفرق الا بعد 4 شهور كذا وماراح يفرق الا قليل .
حطي زيت وممسجي اهم شي وبكره ارتاحي وبعد حطي ماسك ابو 15 دقيقه وبعده راحه وبعدين حنا او سدر للي تبي صحه وكثافه واللي ماتبي زيت ومساج
نقطه اخيره ، مسجوا شعركم كل يومممم قبل النوم ابو 10 دقايق كذا ولاتنسون الانفريجن ميثود
بنات ادعولي وابي تفاعل لان والله افرح اذا دعيتوا لي الموضوع الول محد دعاء لي الا وحده هذا وانا قايله لكم ادعولي شدعوه عاد!!
ادعولي الله يوفقني ويحقق امانيي وشكرا 💜
ايه نسيت الحين سؤال للي طولت شعرها ، افيدينا الله يعافيك شلون طولتيه ؟ 💜💜