رحلتي مع كسل في الغدة الدرقية وخسارة 32 كيلو في 6 شهور (الحمد لله) ..

السلام عليكم
الموضوع منقوووووووول
اعرفكم بنفسي واعذروني لاني بكتب من الموبايل احتمال يكون فيه غلطات كتير

انا الحمد لله أم لبنوته ربنا رزقني بيها بعد معاناه من تأخر الحمل ، ولله الحمد هي نور حياتي
بدأت مشكلتي بعد الولادة وخصوصا في فترة الرضاعه . الحليب كان قليل جدا واضطريت اخد مدرات للحليب زي الحلبة والحلاوة الطحينيه واسمع كلام ماما واكل كتير ، وللاسف وزني زاد جدا
بعد الولادة اكتشفت بالصدفه ان عندي كسل شديد في الغدة الدرقية وتقريبا ده خلى وزني يبقى الدبل
بعد ما فطمت بنتي كنت مستنية اني اخس اول ما اعمل ريجيم ، طلع ان اللي عندهم كسل في الغدة الدرقية حتى مع الريجيم نزول وزنهم بيبقى صعب جدا مهما كانت الغده مظبوطه في التحاليل برضو حرقهم بيكون ضعيف
جالي اكتئاب وبقيت مش بخرج ولا بشوف حد وحابسة نفسي في بيتي وحسيت ان الموت اهون وقولت لنفسي ايه لزومها العيشة وانا هربانه من كل الناس حتى من نفسي ، لو عديت قدام مراية بغمض عيني علشان ماشوفش الكارثة اللي وصلتلها
بس لولا الايمان بربنا كان زماني اتجننت ، بقيت اصلي وادعي ربنا الاقي حل للي انا فيه خصوصا اني تابعت مع دكتورة رجيم وجوعتني ومع الجوع وزني زاد نص كيلو
دخلت على جوجل وقولت اشوف الاجانب اللي عندهم كسل في الغدة الدرقية بينزلوا وزنهم ازاي
والكلام اللي حكتبه ده خلاصه بحث من النت وتجربه شخصية
بسم الله نبدأ
أولا: لازم نعرف حاجة مهمه عن حرق الجسم ، ربنا خلقلنا ساعه بيلوجيه في جسمنا الساعه دي مرتبطه بغروب وشروق الشمس
حرق الجسم بيكون في القمه وقت الشروق ، وبيقل تدريجيا لغايه ساعه الغروب ، بعد الغروب الحرق بيقف تماما إلا عن البروتينات ، اي شيء غير البروتينات بأشكالها مش حيتحرق وحيتخزن في الجسم
ثانيا: مريض الغدة الدرقية فيه أكلات معينه لازم يقلل منها على قد مايقدر لانها بتزود الطين بله وبتخلي الغدة تضعف بزيادة والجسم مايقدرش يمتص الهرمون المكمل اللي بياخده بشكل سليم
من أهم الأطعمه اللي لازم مريض الغدة يبعد عنها منتجات الألبان ومشتقاتها كلها لازم تتوقف فورا من النظام الغذائي
بعد منتجات الألبان الجلوتين وده البروتين الموجود في القمح والشعير والشوفان
لو مريض الغدة شال الحاجتين دول من نظامه الغذائي كده يبقى هو على أول سلمه للنجاح
ثالثا: الصيام
يا جماعه احنا ربنا عطانا كل حاجة مفيده لينا في الإسلام ، أثبتت دراسات علميه إن الصيام التام عن الأطعمه والماء لعدة ساعات 3 ايام في الشهر يقوي غدد الجسم وبيريح الجهاز الهضمي وبيوقف نمو الخلايا السرطانيه وبينشط حرق الجسم ، انتوا متخيلين؟ عندنا صيام الاتنين والخميس وال 3 ايام البيض ، طاعه لربنا وفايده لصحتنا
رابعا: ربنا العزيز الرحيم قال وجعلنا من الماء كل شيء حي
الميه هي كلمه السر ومفتاح الرشاقه وحتعرفوا ليه
خامسا: شرب الشاي الأخضر فادني جدا لكن مابكترش عن مرتين في اليوم لإن ضغطي منخفض
دي كانت اهم نقط
من غير ما ارغي معاكم اكتر من كده انا حكتبلكم رحلتي باختصار ووضوح على قد ماقدر
بدأت مع نفسي بالتدريج لكن قبل ما ابدأ اخدت قرار ان كفايه افضل تخينة ومش حستسلم لكسل الغدة والحرق البطيء حطبق الكلام اللي قريته واستعين بالله اولا واخيرا
ومع القرار بقيت ادعي ربنا يرزقني الإرادة لإن من غيرها مفيش حاجة حتحصل ، لازم يكون في إرادة قويه وانا مادنيش الإراده غير الدعاء الدعاء الدعاء المستمر ان ربنا يعيني ويخلصني من اللي انا فيه
اول اسبوعين ماقللتش اي حاجة في اكلي ، كان كل هدفي اعود نفسي اوقف اكل قبل غروب الشمس ، يعني بعد صلاه المغرب محطش حاجة في بقى وقبل اي اكل كنت لازم أشرب كوبايتين ميه وبعد كده آكل اللي انا عايزاه وبدأت بالمشي في البيت مشي سريع لمده نصف ساعه بعدين خليتهم ساعه متواصل
ومع اني كنت باكل كويس ولسه ماشيلتش الالبان والقمح من اكلي لكن خسيت 2كيلو . كانت مفاجئة بالنسبة ليا لإن الميزان كان مش بيتحرك حتى لو عملت ريجيم ، اتأكدت ساعتها ان الميه هي السبب ، والبعد عن الأكل بعد المغرب ، اكيد انا عارفه ان اول الريجيم ممكن الواحد يخس فيهم اكتر من كده وبعدين الجسم ممكن يثبت وماينزلش ، وهنا فايده الصيام
لو التزمنا بنظام الصيام العكسي اننا نوقف الأكل قبل صلاه المغرب حيجيب معانا نتايج كويسه لغاية مالجسم يتعود على قله الاكل ويبطل يحرق، لكن مع الصيام العادي يوم او يومين في الاسبوع الجسم حيتلخبط ويتطمن لما يلاقيكي بتاكلي بعد المغرب وبكده بيفضل الحرق شغال تمام وجسمك مش حيقف عن نزول الوزن بإذن الله
اول ماقررت اشيل الالبان والقمح كنت متخيلة اني هجوع واعيط ، لكن بفضل ربنا لقيت بدايل كتير جدا
الرز والبطاطس المسلوقه من الحاجات اللي بتدي طاقه للجسم وبتاخد وقت في الهضم اطول من القمح ومش بترفع السكر في الدم بتحافظ على نسبة السكر ومانحسش بالجوع بسرعه
حليب الصويا وحليب الرز وحليب اللوز بدائل ممتازة عن الحليب البقري وخاليه من الكوليسترول وبتزود الجسم بالكالسيوم اللي محتاجينه
حكتبلكم بصفه عامه نظامي ازاي في ال 6 شهور دول
الفطار: بيضه مسلوقه او مقليه معاها شرايح طماطم مع رشه كمون
او اي نوع فاكهه + كوب حليب صويا او اي حليب نباتي
او 3 معالق فول بزيت زيتون مع خس او خيار
بين الفطار والغداء: كوب شاي اخضر + خيار او جزر
الغداء: شرايح خيار وجزر وطماطم + طبق خضار من اكل البيت العادي بس مايكونش مطبوخ بزبدة او سمنه + 3 معالق رز
او شرايح خيار وجزر وطماطم + صدر فرخة او تونه او سمك او لحمه مسلوقة + حبه بطاطس متوسطة مسلوقة
بين الغداء والعشاء : كوب شاي أخضر
العشاء: زي الفطار
طبعا شرب الميه قبل اي اكل حتى قبل الشاي الاخضر مهم جدا جدا جدا
المشي على الاقل 5 مرات في الاسبوع وجوا البيت عادي لو عندك طرقه 2 متر حلوه قوي وتكفي رايح جاي مشي متواصل حيزود الحرق ويدي شعور حلو قوي
لو مشيتوا على اللي قلتلكم عليه بإذن الله حتخسوا
انا كنت 87 وصلت ل55 كيلو وطولي 159
ا