رحلتي من أجل الامومه

رحلتي من اجل الأمومه
كنت بنت ادرس بالسنه الثانيه من الجامعه تقدم لخطبتي احد اقاربي وتزوجت بعد انتهاء السنه الثالثه من الجامعه واتفقت انا وزوجي اننا لانريد اطفال بحكم دراستي بعد انهاء الدراسه رفض زواجي الانجاب بحكم انه صغير ولايريد اطفال في الوقت الحالي بعد سنتين قلت لزوجي خلاص انا ابي احمل اشتقت ان اكون أم حاولنا اربع شهور بدون موانع بعدها بدأ القلق عندي حسيت ان فيه مشكله صرت ابكي وقلت اكيد المشكله فيني
عالطول بحثت عن طبيبه كويس وحجزت موعد عند الدكتوره جواهر المطوع عالطول قالت سوي هرمون حليب وغده واشاعه وسويت التحاليل والاشعه كانت باليوم 13 من الدوره وقالت ماعندك تبويض عطتني كلوميد وقالت لزوجي لازم تحلل
حلل زوجي وقال اني سليم وفرحت
وخفت اكثر ان المشكله عندي
بعده بكم يوم قالي زوجي لا صار التحليل موب كويس انا احسب اهم شيء العدد
صار عندي ضعف حركة وتشوهات ،اشياء اول مره اسمعها بحياتي
رحت لموعدي يوم 12 من الدوره وقالت التبويض كويس عندك بويضتين حاولي يمكن ربي يكتب لك
طيب والحل مع زوجي قالت سوو تلقيح صناعي
عقبها راجع زوجي طبيب ذكوره وقاله عندك دوالي ولازم تسويها
سوى عملية الدوالي وكنت متفائله كثير انها بتجيب نتيجه
بعد العمليه بست شهور التحسن كان طفيف استخدم علاجات كثير ولكن لافائده
صار له سنه من عملية الدوالي ومافيه اي تحسن يذكر
كذا صارلي اربع سنوات بدون اطفال
بعدها اتجهت للدكتور زينب ابو طالب وقالت تلقيح صناعي قلت لها لا ابغى ادخل بالانابيب عالطول بديت بالابر والمنشطات وكان برنامج قصير والحمد لله جاء يوم سحب البويضات تلقح 5 وانقسم 2 فقط وكانو من الدرجة الثانيه
ورجعتهم لي باليوم الثاني ولم تنجح العمليه بعد العمليه
استغربت ليش بويضاتي ماتلقحت كلها وماكنت اعرف السبب
بعدها بست شهور عدت الحقن المجهري عند سعد ال حسن وكان برنامج طويل
وتم سحب البويضات ولم تتلقح ولا بويضه هنا سألت الدكتور ليش بويضاتي ماتلقحت قال مانعرف 😳
بعدها جاني احباط ويأس وخوف جلست بعدها سنتين ماسويت ولاشيء
بعدها عدت العمليه بعد مافتحت لي ملف في مستشفى التخصصي
وبدأت في التنشيط وكان البرنامج طويل ونفس الشيء تم سحب البويضات ولم يتلقح الا 2 وانقسمت 1 فقط وتم ترجيعها ولم يتم الحمل
طيب ليش بويضاتي ماتتلقح ايش المشكله الجواب قد يكون من البويضه او الحيوان المنوي لانعلم
بعدها عدت العمليه للمره الرابعه بالتخصصي لما جيت قالو لي بنسوي لك برنامج قصير لان الطويل ما ناسبك تطول مدة التنشيط عندك كنت اجلس 18 يوم بالمنشطات تخيلو لما خذو اشعه قالو فيه كيس خلاص بنحوله برنامج طويل وخذت الابره التحضيريه وجيت بعد 19 يوم والمفاجئه ان الكيس مازال موجود فقررو ازالة الكيس وتم عملية ازالة الكيس وبدأت بالمنشطات وقالو لي بنجرب لكم شيء ممكن ينجح اويفشل راح نحط البويضه والحيوان المنوي بعد مانلقحها بسائل يقويها اذا موافقين وقعي وقعت وتوكلت على الله
تم سحب البويضات تلقح 4 انقسم 2 وتم ارجعها هالمره حللت تحليل بول وطلع سلبي وبعدها بيومين حللت وطلع سلبي بس الي استغربته بعد ترك المثبتات نزل دم خفيف وبعد كم يوم جاني مغصصصص قوي ماقدرت اتحمله لدرجة كلمت زوجي يجي يوديني للمستشفى وكان بعيد من الالم كلت حبتين سابوفين ابي الالم يخف بعدها بشوي حسيت كأن شيء بينزل ونزل مني قطعتين كبار فيها ابيض وبعدها ارتحت اول مره يصير لي كذا قلت معقول اجنتي كبرت بس ما التصقت زين 😔
طبعاً خلال الفتره بين عملياتي كان زوجي يعالج وسويت له خلطات عسل لكن ما استفاد عليها
توكلت على الله وسويت المحاوله الخامسه بالتخصصي قالت لي الممرضه ان الدكتور غير لك الابر بيحط لك مع المينقون جونال اف كانت الجرعه كبيره وكان البرنامج طويل مع ان البرنامج ما يناسبني ابداً اطول في التنشيط اجلس 17 او 18 يوم
طبعاً جلست بالمنشطات حوالي 17 يوم وبعدها جاء يوم سحب البويضات والمفاجئه قالو لي بويضاتك مافيها نواه فارغه كلها اكياس مافيه الا ثلاث بويضات
جيت يوم الترجيع طبعاً في التخصصي مايعلمونك تجين يوم الترجيع وانت ماتدرين عن اي شيء اشوف كل الي عندهم ترجيع لبسوهم اساور الا انا عرفت بعدها ان بويضاتي ماتلقحت نادوني ادخل عالدكتور قالي حالتك غريبه ماندري وش السبب يمكن من الادويه الي تستخدمينها ( انا فيني مرض مزمن واستخدم له علاجات) قالي اكيد من علاجك الي تستخدمينه لازم تروحين لدكتورك يقلل الجرعه الي يعطيك اياها كلامه ابدا ما اقنعني قلت كثير يستخدمون نفس ادويتي ومع ذلك حملو طبيعي يعني ما اتوقع المشكله من العلاج قالي الا ووووو المهم ضيق صدري وجتني ضيقه الله الي يعلم فيها وقال بنعطيك فيتامينات استخدميهم قبل المحاوله القادمه جتني بعدها ضيقه وخوف معد ادري وش اسوي كنت بمشكله ان البويضات ماتتلقح الحين بعد طلعت عندي هالمشكله
بعدها بخمس شهور زرت الدكتور بندر العبدالكريم اول ماجاء للحبيب
وقلت له كل مشواري
قالي اول شيء النظام الطويل مايناسبك مفروض مايستخدم معك
ثانياً المحاوله الي صار البويضات فارغه احتمال يكون الجونال اف ماناسبك بما ان المحاولات الي قبل كانت البويضاتي كويسه اقنعني كلامه وريحني وعالطول قالي تخفيز وقلت يله وسويت التحفيز الم شيء لايحتمل مع ان الكل يقول الم بسيط
قالي انت غريبه ليش كل هالالم شكلك تتدلعين 😳
قلت لا بالعكس انا من النوع الي يتحمل الالم بس صراحه يوجع
المهم سويت التحفيز مرتين
والدوره الي بعدها بديت تنشيط والحمد لله جاء يوم سحب البويضات وسحبو بويضاتي وقالو بنكلمك بعد يوم نعلمك كم تلقح
بعدها بيوم كلموني قالو تلقح 3
لما جاء يوم الترجيع رجع لي الدكتور وقال خلصنا قالت كم قال واحد قلت بس واحد بصوت حزين
كانت صدمه كنت اتمنى ارجع 3
قالي لا بس كويس ومن الدرجه الاولى قلت طيب ليش بويضاتي ماتلقحت قال ان الي سوت لكم التلقيح تقول التشوهات كثييييره عند الزوج وبويضاتها لما جيت احقنها احسها رقيقه قلت طيب ليش بويضاتي كذا رقيقه قال كذا انتاج المبيض عندك ولما ودوني للغرفه شفت زوجي وجلست ابكي بحرقه
قلت مارجعولي الا واحد بس
وبعدها بكم يوم الا اشوف الورقه الي مكتوب فيها كم سحبو من بويضه وكم تلقح الا واشوف الجنين من الدرجه الثانيه
واكلم زوجي قال ايه انت قلتي من
الدرجه الاولى لما خذت الورقه مكتوب الثانيه رحت للدكتور وسألته قال انه كويس يعتبر بين الدرجتين
شكله قالي من الدرجه الاولى ما يبغاني اتضايق
المهم لما عرفت انها درجة ثانيه وبس صرت ابكي ابكي ابكي
والحمد لله فشلت العمليه مع اني كنت متوقعه فشلها الا اني بكيت وحزنت
وكانت هاذي المحاوله السادسه
جلست بعدها سنه ونص خلالها زوحي راح يعالج عشان يتحسن عنده السائل المنوي
والفاجعه ان تحليله صار اسوأ التشوهات كانت 99٪ صارت 100٪ والحركة كانت 10٪ وصارت صفر والعدد كان 24 مليون وصار 5 مليون
طبعاً راح يتعالج تحسن العدد ارتفع والتشوهات صارت 98
اما الحركة مازالت صفر
رحت للدكتور بندر قالي كذا ماينفع لازم يتعالج ويتحسن التشوه والحركة
قلت الحركة لها دخل وهو حقن مجهري قال صح احنا مانحتاج لحركته لاننا نحقنه بس كلما كانت الحركة افضل كلما دل على قوة الحيوان المنوي وقدرته على التلقيح
طبعاً تعالج زوجي مره ثاني وحلل تحسن العدد والتشوهات صارت 95 والحركة 10 استبشرت خير ولمانزلت الدوره رحت عالطول للدكتور بندر وقالي تحفيز رفضت وقلت التحفيز بيأخذ وقت بيصير شهرين واخاف تحليل زوجي يرجع ينتكس قال مدام مقرره نبدأ على بركة بديت والحمد لله بيوم السحب شفت وحده بالانتظار كان عندها تلقيح صناعي وكانت خايفه قلت لها تلقيح صناعي الامر هين ان شاء الله وبسيط مايحتاج تتوترين وتخافين قالت وانت قلت انا عندي سحب بويضات بسوي حقن مجهري
قالت هاذي اول مره قلت لا هاذي السابعه قلت اوف ياصبرك وتعيد فيها ياصبرك قلت وش تبين اسوي مالي الا اعيد فيها
كل مافشلت اقول تعبت ومعد ابغى اعيدها ولكن يتجدد عندي الامل واقول ابي اعيدها لعلى الله يرزقني بالذريه الصالحه
وتم سحب البويضات قبل العمليه كانت تقولي الي عند جاهز الضغط والقلب ليش خايفه كان قلبي ينبض بشكل غير منتظم
قالت اول مره تسوي قلت لا قالت اجل ليش خايفه قلت في نفسي الا كل عمليه اصعب من الي قبلها خصوصاً اني دخلت السحب وزوجي ماقدر يعطيهم العينه
طلعت من السحب بس فقت من البنج الا دموعي تنزل لحالها ماقدرت اتحكم فيها والم قوي في بطني دخلت الممرضه قالت ليش تبكي ومسحت دموعي
بعدها بيوم كلموني قالو تلقح اثنين بس قلت لزوجي كنت متفائله ان تحليلك تحسن قلت بتتلقح بويضات اكثر اكيد تحليلك انتكس
وفعلاً كان تحليله منتكس العدد قل والتشوهات زادات والحركة ضعفت
تم ارجاع 2 من اجنتي في اليوم الثالث وكانو من من الدرجة 2 في فترة الانتظار بعد ما جاني الم دوره قوي مشابهه للمره الماضيه حسيت ان العمليه فاشله
حللت والنتيجة صفر لايوجد حمل حمدت الله وشكرته واسأل ان يأجرني في مصيبتي ويخلف علي خيراً منها
اسأل ان يرزقني وكل من يتمنى بالذريه الصالحه ويعوض صبري وصبركم ب
والآن لي 11 سنه وخمس شهور متزوجه
انا لي حول الشهرين مخلصه المحاوله الاخيره وفيني ضيقه الله الي يعلم فيه
مدري وش اسوي في مشكلة زوجي الحيوانات عنده ماتلقح البويضه بسبب التشوهات وقلة الحركة حتى اجنتي ماقد صارت درجة اولى الا مره وحده
والله اني في حيره من امري مدري وش اسوي احس اني تعبت العمر يجري والسنين تركض
غير ان زوجي زود على مشكلة الحيوانات المنويه عنده ضعف جنسي بس يحاول مايبين لي بس انا عارفه
اذا عندكم نصيحة ممكن تفيدوني فيها اكون لكم شاكره
و اي سؤال تبون تسألوني عنه انا حاضره