رداً على بعض العقليات اللي ردت علي امس في موضوع زوجي وضربه لي

انا حبيت اكتب موضوع مستقل حتى اشرح اشياء كثير غفلتوا عنها في موضوعي السابق .....


اول شي انا ضد تقديس الرجل اللي مايستاهل ، صحيح احنا ديننا يحكمنا والرسول عليه الصلاة والسلام قال ( لو أمرت أحد أن يسجد لأحد لأمرت المرأه ان تسجد لزوجها )


وربي شاهد علي ياما فعلت له من افعال حطيته على راسي وعاملته بما يرضي الله ورسوله ولكنه مايستاهل


بعض رجال هالزمن ماينطبق عليهم هالحديث


والشي الثاني كثير منكم قالوا ليه تدعين عليه ، المفروض تدعين له بالهدايه والصلاح ... طيب تتوقعون اني مادعيت له في السنين هذي كلها بالهدايه والصلاح!!!
دعيت له كثير ولكن ليه انا طلبت منكم تدعون عليه ، وليه انا امس دعيت عليه بالشلل في يده ؟؟ لأني ابغاه ياخذ عظه وعبره من نفسه ، ابغاه يكون في داخله خوف من ربي انه اذا ظلم اللي اضعف منه ان ربي بيعاقبه ...


يا اخواتي انتوا حكمتوا على حياتنا من مجرد موقفين ذكرتهم لكم امس .... انا كنت ابغى اختصر والا المواقف كثير ، حكمتوا اني انا اللي استفزيته بينما انا كنت زعلانه ومن حقي أصد عنه ، وبالأحمررررر العرييييض الضرب مايجووووز بأي شكل من الاشكال ولا له حق يمد يده ، ابوي الله يطول بعمره يومه رباني رباني بدون ضرب وهذاني متربيه ، زوجي يضربني يقول عشان اربيك !!! هل هذا كلام يعقل ! هل ترضينها لنفسك !!!


يا اخواني افهموني زوجي عنده الضرب أول الحلول ، اقسم بالله انه يضرب اطفالي وهم في عمر السنه ، واللي عمره بالسنتين والثلاثه يضربهم كفوف تطبع على وجوههم لوقت طويل
اذا خاصمته يقول انا باقطعهم تقطيع اذا انتي ماربيتيهم ،، انتوا متخيلين كمية الشر اللي في داخله !! اقول له الضرب مو اسلوب تربيه واحنا لازم نحتوي عيالنا ونربيهم زين والتربيه مشتركه ، يقول لا انتي المسؤوله عنهم وانتي ماتعرفين تربين
هو ماعمره عاش مع اطفال في بيت اهله ولا يعرف ان الاطفال يبكون ويحوسون وتربيتهم صعبه ومتعبين ولا يتحمل منهم أي تصرف بريء على طول كفوف


انا ذكرت هالكلام عشان تعرفون انه يستخدم الضرب مع الكبير والصغير ولا تحطون البلا فيني اني انا استفزيته


للحرمه كرامه ، ماني مجبوره اراعيه على حساب مشاعري وزعلي وابين له اني مافيني شي عشان لا استفزه على قولتكم


وعلى فكره انا قلت له مو من حقك تمد يدك .. قال انتي احتقرتيني تفتحين الباب وتعطيني ظهرك وتمشين ، قلت له انت سألتني ليه حاطه المفتاح قلتلك لأني ما ابيك تدخل علي فجأه ومشيت مااحتقرتك ، بينما احنا قبل يومين يومنا رايحين نزور امك انت خارج من البيت يد قدام و يد ورا وانا عندي عبايتي تحوسني وشنطتي وعيالي وشنطتهم وقلتلك تكفى خذ البنت الصغيره معاك مشيت ولا حتى ناظرت فيني . وقلتلك يافلان وخرجت وقفلت الباب في وجهي ولا حتى رديت علي وقلت ماني شايلها ، هاه اشرايك هذا مو احتقار ! مو كان المفروض اشيل السيكل والحقك اضربك فيه !! طبعاً سكتّ ماعنده رد


المحترم يفرض احترامه ، وهو مافرض لنفسه أي احترام تعامله همجي معانا في كل شي


انتوا ياللي رديتوا علي وقلتوا اكسبيه لا تعاملينه كذا وابعدي عنه اذا عصب ، يا اختي اذا كان زوجك في اساسه متربي تربيه حسنه ف انا زوجي لا ، انا زوجي يذكر لي من المواقف اللي عملها فيه ابوه وهو صغير مواقف صعبه جداً ، وهذا مو مبرر له انه يستخدم نفس الاسلوب مع زوجته وعياله ،، انتي اذا احترمتي زوجك وبان في عينه ، انا زوجي مايبان في عينه بالعكس يزيد في طغيانه


وفي وحده ودت تقول انتي سكتي من البدايه تحملي ، قال اولادي قال ، يا اختي ما احب اقولك الا الله يجعلك في نفس موقفي يااااارب ونشوف كيف بتتصرفين


واللي قالت انتي استفزيتيه تحملي اللي يجيك بعد اقولها عساك في نفس موقفي يارب


بعض العقليات متخلفه تعتقد اني ماجاهدت عشان عيالي ، انا ياما طلبت الانفصال عشان عيالي وربي الشاهد ولكن هو يرفض ، وياما سويت عشانهم فلا تجي وحده تتفلسف وتسوي نفسها الفاهمه وحسبي الله ونعم الوكيل


واللي ودت ودعت لي ودعت على زوجي او حتى دعت له الله يجزاكم خير الجزاء ويحسن لكم ولنا ما اعطانا