رزقني الكريم بعد تسع سنوات من الحرمان (قصتي )

السلام عليكم ورحمة الله وبركاته أخواتي..
طبعا أنا من رواد هذا القسم صحيح ماكنت اكتب بس كنت اتصفح دايم لأني كنت منتظره فرج ربي .. وكنت كل ماأقراء قصه صبر نهايتها حلوه أقول الدور الجاي لي بإذن الله المره الجاية أنا أقول قصتي بقدره الله .. ولأني كنت استأنس بقصص الحمل بعد انتظار لأنها كانت تعطيني أمل وتفاؤل وقبل كل شيء تعطيني تأكيد أن ربي قادر وكريم ومعطي .. عشان كذا بكتب لكم قصتي ..
طبعا انا لي بنت من قبل جبتها قبل تسع سنوات بمنشطات عاديه أخذت منشط وحملت فيها .. جلست بعدها ثلاث سنوات اقول الين أخلص دراستي وأحمل ثانيه أحسبه على كيفي ..يوم بدت السنه الرابعه واروح اعالج ومن منشط لمنشط كلوميد وأبر ومتابعه وانتظار واخر شي مافيه شي شهر شهرين ثلاثة كملت سنتين وأنا انتظر أعالج ثلاث شهور وارتاح شهرر وهكذا .. طبعا بعد سنتين كامله من العلاجات حللت وصرت حامل طررررررررت من الفرحة بس قلت مو معلمه حتى أهلي الين اسوي اشاعه وأتاكد منه .. كملت اسبوعين بعدين صحيت من النوم والقى دم رحت حللت صرت أجهضت ,, ارتحت شهرين ورجعت أعالج ورجعت الدوامه من الابر والحبوب والمواعيد اللي ماتخلص وبعد ماكملت من الاجهاض ست شهوور حملت ثانيه طبعا فرحت فرححححة وبديت انتبه لنفسي واتغذى .. نفس المره الأولى رحت الحمام ولقيت دم خفيف رحت اراجع قالت اتوقع اجهاض بس لازم تراجعين كم يوم الين نتأكد انه نزل مره طبعا زعللللت زعلللللللت وبكيت استغفر الله ليتها صارت مثل المره الاولى وبس .. المشكله ان الهرمون مانزل يطلع بس بشووويش بشووووويش والرحم فاضي وكل يوم كشف وتحاليل ومن مستشفى لمستشفى أخر شي رحت مستشفى الشميسي بتحويل من الدكتوره اشتباه حمل خارج الرحم دخلوني اسبوع كامل وانا اطلب منهم الابره اللي تنزل الحمل حقت خارج الرحم ورافضين يقولوا لين نتاكد انه خارج الرحم طيب كيف بتتاكدوا بندخل منظار من بطنها ونسوي رحلة استكشافيه .. طيب كل التحاليل تدل انه حمل خارج الرحم يقولوا لا لازم نتأكد .. اخر شي رفضت المنظار وطلعت وصحيت على الم يممممممممموت شي من الخيال كأنك مشبوكة في كهرب 220 وينفضك اقسم بالله من قو الالم ارججججف .. صار الحمل خارج الرحم انفجررر وسووا لي عمليه وشالو الانبوب الأيسر لي .. الله لايوفق الدكتوره المشرفه على حالتي والله لايسامحها يارب .. المهم طلعت بنفسيه سيئة متدمرررره وحاسة انو خلاص كل شي بعيني ولاشي والدنيا وقفت .. كرهت نفسي والناس وكرهت الطلعات ووووكل شي ... يعني ضعف شديد بالمبايض وزايد معاه أنبوب واحد بس .. طبعا نصحتني الدكتورة اجلس سنه بعد الحمل خارج الرحم .. بعد سنه بالضبط رحت سويت اشعه الصبغه وللأسف الانبوب الوحيد عندي صار مقفل .. أي احباط أي الم أي تعب نفسي حسيته أقسم بالله كأنهم طلعو قلبي وشققوه .. بديت اقنع زوجي بالأنابيب اقتنع طبعا بس باقي الفلوس كيف بندبرها .. ظروفنا مانقدرررر .. جلسنا سنه كاملة أجمع أجمع واحرم نفسي من كل شي عشان أجمع فلوس العملية .. طبعا كنت اقرا عن الدكتور بندر العبدالكريم جعل ربي يسعده بس زوجي رفض الا اروح لحرمة .. رحنا لدكتوره زينب بمستشفى الحبيب وسويتها وفشلت طبعا أنا ماأحكم لأن عمليتي فشلت ,, أنا وأنا لسى أعالج قبل حتى مأأسحب ولا أرجع ولا شي قررت معاد أرجع لها أبداااااا .. أسلوبها جدا مو راقي .. يعني وحده جايه متحطمة تبي أمل ولا كلمه حلوه ,, أقسم بالله كانت تحط يدها على جبهتها وتناظر الاوراق وانا اشرح لها ولا تتكلم ابداااا .. ولمن قالت خلاص نبدا وكذا توني بأسئلها قالت كل شي بيعلمونك عنه المساعدات طريقه العلاج وكل شي ولاكلمتني ..
ولمن رجعت جاني امساك شديد والم بالبطن شديد كلمت عالمنسقه تسئلها كم مررره اخر شي ماردو علي ولا شي .. طبعا عالتعامل الزفت اللي احس نفسي اتشحذها تعالجني مو كأني دافعه الاف حلفت مأارجع لها ..
خلاص قلت لزوجي الفلوس مو بيدنا كل شوي نجرب عند دكتوره أنا سامعه عن الدكتور بندر وابروح له ..
رحت للدكتور بندر كان بمستشفى بنون وقتها أقسم بالله أن شهادتي بهالانسان مجروحه أدب واحترام وذووق وأخلاق عاليه ,, الله يرفعه بالدنيا ويرفع منزلته بالجنه ويحرم وجهه عن النار .. كلامه كله تفاؤل وتطمين ويزرع فيك أمل ,, بديت معاه بالعلاج وسحب وترجيع وانتظار ,, والحمد لله حملت بس بعد أسبوع أجهضت ,, صح اجهضت بس هالمره مابكيت أو زعلت بقووه ,, أهم شي فيه أمل أني احمل ,, طلعت من المستشفى وكانوا اهلي بيسافرون ولاعلمتهم أصلا لااني حامل ولاني اجهضت خليتهم يسافرون بدون لايحاتون ولايهونون عشاني .. بعد خمسه شهور رجعت للدكتور ,, وقبل ما أرجع صرت استخدم الرقيه واشغلها عند النوم ولااسمع أغاني ابداااا ,, واستخدمت سدر شربته آخر دورتين لي قلت لو صارت قرينه تطلع .. ورحت لعطارة ابالخيل واعطاني عزايم المكتوبه بالزعفران اشربها ويامره مقري فيها ,, قلت بسوي كل شي وربي ماراح يخيبني ,, طبعا بديت العلاج مع الدكتور وصارت لي اشكالات كثيررره بس اذا صار ربي كاتب لك الشيء بتحصلينه غصب عن الجميع .. أول الاشكالات ان السحب بيصير ثاني يوم بالعيد .. الدكتور الله يجزاه خير عدل البرنامج الين تأخر شوي السحب عن يوم العيد ولا كيف بتخلص من الناس واهلي واهله ... ثاني مشكله اني انا كان طالع لي ثلاث بويضات باليمين ووحده باليسار وكلهم كبروا ووصلوا للحجم المطلوب ويوم السحب بعد ماصحيت سئلت كم سحبوا صارت وحده بسسسس قلت انا لله وانا لله راجعون مادري هل اهم طلعوا الباقيات من ابره التفجير ولا وش اللي صار والله مادري ويوم شافني الدكتوره مرعوبه وضايق صدري قال بيبارك ربي فيها باذن الله وطمني ... والامر الثالث ان يوم الترجيع كان مناسبه كبيره عند اهل زوجي وضروري احضرررر بس مارحت رغم ان الجميع استغرب وزعلوا بس شسوي .. انتظرت وانتظررررت وياربي لك الحمد والشكر حللت وطلعت حامل .. بس كنت خااااااااااايفه لاني اجهضت ثلاث مرات قبل صار عندي رعب .. والحمد لله مشت الايام ببطء .. طبعا ماعلمت احد الا امي وابوي واخواتي البنات بسسسسس .. ولا اطلع ولااروح ولاشي جالسه ببيتي .. الين كملت ست شهور علمنا اني حامل .. وياربي لك الحمد والشكر وياربي جعل ربي يرزقكم ولايحرمكم ويفرحكم مثل مافرحني .. ربي رزقني بولد الله يخليه لي ويصلحه ويعافيه بعد تسع سنوات من الحرمان .. وفي النهاية اقول لكم ربي كرررررريم كرررررريم ورحييييييم مايخيب أحد .. بس لازم الالتجاء له وفعل الاسباب من علاج وغيره .. والدعاءءء الدعااااء والصدقة ..