رز أبيض مكبوس ( للي ماتعرف اتسوي رز بالمره)

العيش المجبوس ( المكبوس )

يمكن تستغربون أحد مايعرف يسوي العيش ؟ :hahaha:

بس انا أعرف بنات وايد فعلا مايعرفون فقلت أكتب الطريقه ، طبعا أنا مو100%بس لأني توني أمسك بطريقة مضبوطة نوعا ما للكميات الصغيرة والكبيرة وهذي طريقتي البسيطة:

المكونات:

مقدار واحد من الرز البسمتي تنظفيه وتغسليه كم غسله( كوب مثلا ) - مقدارين من الماء المغلي ( كوبين نفس حجم الكوب اللي استخدمتيه للرز ) - م.ك ملح بس مومتروسة خففيها ( انتي دايما قللي الملح يطلع الأكل ماصخ في البداية و معاك الملاحة ولا مالح ويترمي ومره على مره زودي الملح وذوقي إلى ما تعرفي كمية الملح اللي تناسبك ) - شوية زيت

الطريقة :

1- جدر به الماء المغلي تضيفي عليه الملح والشوية زيت ( عشان حبات الرز مايلصقوا ببعض ) ثم تضيفي عليهم الرز.

2-طبعا الجدر يكون على عين وسط نار وسط أو عالية والغطى مفتوح كيفك مايضر.

3-أول ماتشوفي الماء قل تبقى فقط اللي بين الحبات أو فوقهم خفيف سكري الغطا وشيلي الجدر حطيه على عين صغيرة ونار هادية جدا تقريبا ثلث ساعة (20دقيقة) .

4-تطفي النار وبشوكة تفرقي شوي حبات العيش عن بعض . ( شوكة عشان ماتتكسر حبات العيش )

ملحوظات مهمة:

* أفضل تحطي حديدة تحت الجدر عالعين الصغيره بذات في حال مسوية كمية صغيرة لأن الرز اللي بالأسفل يمكن يصبح حكوك ( قطعة يابسة ملتصقه ببعض اللي تكون في قاع الجدر )

* لما تسوي كميات كبيرة مثلا 4أكواب رز بدل ماتحطي عليهم 8 أكواب ماء نقصي كوب يعني حطي 7 أكواب عشان الرز لا يطلع حيل هميج ( لين ) يعني عشان يكون نثري.

*في حال كوبين الماء اللي ضفتيهم على كوب الرز خلوا الرز لين خففي المرة اللي بعدها شوي ليما تحصلي عالمقدار اللي يريحك ويعطيك صورة نهائية للرز مثل ماتحبين تبينه نثري قللي الماء واذا تبينه هميج كثري الماء وهكذا.

*اذا كانت حبة العيش اللي تستخدميها صغيرة يصبح على المقدار الرز مقدار وثلاثة أرباع بدل مقدارين ماء يعني كوب رز عليه كوب وثلاثة أرباع كوب ماء مغلي وهكذا.

*لاتفتحي الغطاء لما يكون القدر على نار هادية لأنه في هذه المرحلة يكون الرز بيستوي عالبخار .

*وبعدين لما اتضبطي الرز عاد في طرق متطورة مثل إنك تحمسي شوية بصل مفروم بالزيت ثم تضيفي عليه الرز وتخلطي شوي ثم تضيفي عليهم الماء المغلييييييييي المملح وكذلك تطبخي الرز بماء السلق حق الدجاج أو اللحم يعني بمرق اللحم وهكذا.

* هذي طريقتي السريعة والبسيطة مع توفير القدور في الطبخ أحط كل شي على بعضه:D


وفي طريقة ثانية لعمل الرز وهي الرز المشخول :

ماء مغلي كثير تضعي فيه الملح كمية أكبر من السابق لأن راح تكتي الماء وتضعي الرز في الماء المغلي لازم مغلي.

بعد عشر دقائق يستوي ( شوفي الحبة ممكن قبلها شوي اذا كنت منقعة الرز )

تكتي العيش في مشخال ثم تكتي الرز من المشخال إلى القدر بدون الماء في قدر فيه اشوية زيت حار تخليه اشوي على نار هادية لما تشوفي البخار تسكري النار وخلااص .


ممكن لتلوين الرز باللون الأصفر تستخدمي الكركم الأصفر اتحطي اشوي بصحن صغير تخلطيه مع شوية زيت وتحطيه على وجه الرز بعد الانتهاء من طهيه وبالشوكه تخلطي اشوي.
كذلك استخدام الزعفران .