استاذه نسيبه
السلام عليكم

احب اشكرك في البدايه لانك عطيتينا من وقت عشان تحلين مشاكل خواتك في المنتدى والله يكتبلك الاجر العظيم
وانا ما كتبت الا بعد ما قريت ردودك للاخوات
وكانت ردود جميله بخطوات عمليه ومقنعه جدا

المهم عزيزتي تقدري تقولي عن حياتي ((من حفره لدحديره))

انا في بدايه زواجي كانت حياتي جدا جميله صحيح لا تخلو من المشاكل بين فتره وفتره بس حتى مشاكلنا كانت حلوه اذا زعلت يجي يراضيني وما يرتاح ابد حتى ارضى نطلع سوا ناكل سوا اي مكان ابيه يوديني كان محترمني جدا جدا جدا ولازم لما ننام نسولف لفتره قبل النوم كان فيه حميميه كان كريم ولله الحمد الى الان
وهذا ما صار بشهر العسل فقط
لا بل استمر الحال لمده سنتين حتى انجبت اول طفل
وتغير معاي جذريا
الاحترام انعدم (( صار يردد علي الفاظ حيوانيه يا .....
من وقت النفاس نساني تماما يجي بس يلعب طفله ويطلع

انا كنت ام جديده ما عندي خبره كافيه فاي غلطه بسيطه كان يقولي انتي ام (((((فاشله )))) احس هالكلمه بالذات هزت كياني وخلتني فعلا احس اني فاشله ومستحيل اكون ام ناجحه مع اني والله اهتم فيهم مره واثقف نفسي باحتياجات الطفل الغذائيه والعاطفيه والعقليه والمهاريه والدينيه ....الخ
كل ما يبكي البيبي يقوله الله يعينك على امك
وكنت اسكت مع اني قويه بس حسيت بضعف غريب ومخيف سبب لي اكتئاب وما حاول يفهمني بديت اكره الطفل بسببه
اهملت نفسي والبيت
وصار ينق على كل طلعه لا تطلعين بيمرض انتي فاشله مهمله ما تصلحين تصيرين ام مع انو عارف ان كل اللي معاي بالطلعه امهات
بس وقتها حسيت باختناق عجيب

بعد الطفل الثاني تحسن الوضع كثيررر عن اول ولا اعلم وش السبب
بس لا بد ما تمر ازماااااات وليس مشاكل يعني احس انها توصل للطلاق
لاكن الله لطف ورغم وجود الازمات الى انها بفترات متتاليه مو نفس الطفل الاول ضغوط مستمره ليل نهار

الان من فتره صارت بيننا هوشااات كثيره واحس ان حياتي تتدمر بسبب تصرفاته

1))زوجي يفطر بالدوام
لما يجي من الدوام ما يتغدى معانا بحجه ان هالشي مو حلو لصحته بالرغم من عرفته وهو يجي يتغدى معانا الحين يقول خلي الاكل لبعدين ويتغدى لوحده
العشاء برى البيت مع زملائه
(لا فطور ولا غدا ولا عشاء الا ما قل وانا يهمني جدا اجتماع الاسره على الطعام))

2)) الى الان اي غلطه بسيطه بحق الاطفال انا اصير افشل ام بالدنيا
واذا مرضوا على طول انا السبب
وانا بهالفتره مضغوطه بتعبهم ويزيد عليه حتى قدام الدكاتره

3))الاحترام الان معدوم منه والفاظه مثل ما قلت سابقا وانا صرت مثله
يعني الاحترام منعدم بيننا

4)) انا ما اطلع الامره او مرتين بالاسبوع ومع انه طول الاسبوع برى بس يجي ياكل وينام الا انو صار اذ طلعت اي طلعه من بدايه اليوم يبدا يتأفف ويردد دايم الله يعيني عليك وحسبي الله عليك ليه يبغاني انحبس في البيت ما كاني انسانه من الصبح الى الليل مع العيال ومشاكلهم وتعبهم مالي حق ارفه عن نفسي


يا استاذه الاسابيع اللي راحت صارت مشاكل كبيره بيننا لدرجه اصواتنا وصلت عند الجيران وكتبت له رساله طويله خبرته بكل شي وقلتله لازم نحل المشاكل من جذورها لانها قديمه وما انحلت بس الضغط الضغط ولد الانفجار وانا خلاص انفجرت ورميت كلام ابشع من اللي يقوله((( واذا زعلت يرجع يحترمني ويعطيني فلوس ويرغب فيني جنسيا ويتقرب ويقول للاولاد يالله بوسو ماما وماما حلوه وموانا اللي امس كنت ام فاشله))) وبس ارضى يرجع زي ما كان احس اني مثل الجبل على قلبه
تراضينا قبل امس بدون حل المشاكل وتزاعلنا امس لنفس الاسباب اعلاه
وانا صرت عصبيه ما صرت اقدر افوت مثل قبل امس حسيت فيه شي بصدري يبي يطلع وما ارتحت الا لما بكيت بصوت عالي وانا اضم المخده
انا تغيرت كثير اخذني انسانه احب الحياه مرحه جدا اجتماعيه
الان صرت اعتذر عن الناس عشان ما اروح بهوشه وارجع بهوشه
احس ان حقوقي مسلبوبه رغم ان شخصيتي كانت قويه احس انه احبطي احيانا اكره الحياه والدنيا تضيق فيني :44:
امس بعد ما بكيت تخيلته قدامي وكاني اقوله اكذب عليك لو قلتلك ان بقلي حب لك
فعلا جاني شعور اني كرهته
صرت بس افكر بالطلاق ووش راح يصير بعد الطلاق
احس اني مخنوقه وهوخذلني
بس اهلي واه من اهلي ما ابي امرمطهم معاي
وعلى فكره اهلي ما يدرون عن شي ابد واذا زرناهم نمثل اننا مبسوطين

انا قلتله كم مره مشاكلنا ما بتنحل الا بالتفاهم بس اذن من طين واذن من عجين يراضيني بكلمتين واذا رضيت يرجع مثل قبل

وما راح انسى بعض الجوانب الايجابيه
كريم
حنون اذا تنازلت عن كل شي يبيه
طموح جدا في عمله
يهتم بصحته وشكله


في النهايه لا تظنين اني ابي زوج لاصق فيني وبس يدلعني
3 مرات بالاسبوع طلعه تكفيني

ساعتين معاه باليوم تكفيني

احترام لي

هل اللي اطلبه صعب

انا وهوالان في حال لا يعلمها الى الله نفوس متوتره وعصبيه
ابي الحل

شكرا وأأسف عالإطاله

بارك الله فيك واتمنى اسير على خطاك انا بكالوريوس علم نفس من الجامعة اللبنانية (سعودية الجنسية)
وناوية السنة الجاية على الماجستير والدكتوراة اذا الله وفقني وكتبلي طولة العمر

موفقة

استاذه نسيبه
ذكرتي باحد الردود ان الشخص الشمال الشرقي من اصعب الشخصيات في التعامل
ياليت تعطينا رد مفصل لافضل طريقه للتعامل مع الزوج الشمالي الشرقي في كل نواحي الحياة

والله يعطيك العافيه على تعاونك

مشكورة على الموضوع الله يجعله في موازين حسناتك