الله يعينك على حياتك ويقوي قلبك

الله يعينك

لو تاملت قول الله تعالى (( والزانية والزاني ...))
قدم الزانيه
لانه غالبا الحريم هم اللي يبدون
اما في السرقه قال
(( والسارق والسارقه ...))
الله يعينك
ويفرج همك

SIZE="6"]....................

اعذروني على التأخير لكن زوجي ماابغى احسسه ان في شيء غريب
وبيشوفني قاعده اكتب بيشك
عاد تخيلو انه يقرا موضوعي والله العظيم ليوديني على بيت اهلي على طووووول
لاني لعبت باعصابه وبعقله وقلبت حياته فوق تحت
استغفر الله العظيم بس

تكملة قصتي

طبعا مثل ماقلت ان زوجي انكر انه في علاقه بينه وبين هذا الرقم
لكن قال زوجي لي ايوه صحيح البنت ارسلت لي صورها لكن انا لا ارسلتها صورتي ولا حاجه
وهذي وحده حاقده وتبغى تخرب حياتنا
وبعدين عصب وقال لي طيب كيف تصدقينها وليش مارديتي عليها او كان علمتيني بوقتها
كان تصرفت معاها لكن هي خلاص هذا الي تبغاه

طبعا لاتسألوني وش موقفي وقتها
والله يابنات اني كذبت الكذبه وصدقتها من كثر ماحلف وبرر نفسه من الموقف
طبعا انا بس ابغى اوصل له معلومه ان هذي الي قاعده تراسلك قاعده تلعب عليك
علشان مايعطيها وجه
وعلشان يخاااف منها ولاعاد يراسلها
0000000000000000000000000000

طبعا زوجي جلس يتقرب مني ويبوس راسي وكفي
ويحلف بالله انه ماله علاقه فيها
وطبعا سمعني يومها كلام ماسمعته لاقبل زواجي ولابعده
طبعا هذي نقطة ضعفي الكلام الحلو مااقدر عليه والله اني اذوووووب مكاني
ههههههههه
وبعدين ناظرت فيه وقلت له انا بقولك كلام حطه في بالك
(((((من دق باب الناس دقوا بابه))))
وانت حلفت بالله العظيم ان مابينكم أي علاقه وهذا يكفيني
ودخلت غرفتي ونمت
عفوا انا مانمت لكن زوجي هوه الي ناااااام
انا لاتسألوني وش صار فيني هذيك الليله والله بغيت اموت
يعني اشوف رسايلهم بعيني
وينكر ويحلف
0000000000000000000000
طبعا الساعه 3 في الليل بديت بازعاج الخاينه
وادق عليها واترد
جلست يومين ادق عليها ماترد
بعدين في يوم من الايام طلعت قبل الظهر انا وزوجي في مشوار ورجعنا البيت
وانا في السياره دق جوالي برنه وحده وقفل
ناظرت جوالي الا المتصل هذي البنت الخاينه
طبعا سكت ماقلت لزوجي شيء
ولما دخلت البيت وبدلت ملابسي رجعت دقيت على هذا الرقم وردت علي
صاحبة الصوت المدلل
طبعا مسكتها تهزيئ وسخريه وغسلتها بالكلام
عااااد انا اذا زعلت يطلع مني كلام اتفاجئ من نفسي اني قلته
طبعا هيه انسانه وقحه وبنت شوارع وبلاتربية
طول المكالمه تبغى تتكلم بس ماتركت لها مجال
وقفلت الجوال بوجهها
وبعدين طلعت من غرفتي ورايحه المطبخ جاء زوجي ناداني
سالني عن ريموت التلفزيون وجلست بجنبه وسألته
وقلت له وش صااار مع هذاك الرقم عرفت من أي مدينه؟؟
طبعا قال لي لا باقي خويي مارد علي
وبعدين سألني من كنتي تكلمين قمت قلت له السالفه
طبعا زوجي زعل وعصب وقال لي
انا مو قلت لك لاعا د تدقين على هذا الرقم واذا جالك منه اتصال او رساله علميني
انا بغيت اموت مو ناسيه انه نصااااااب وزوجي بس خايف انها تنكشف الحقيقه
طبعا زوجي عصب بشكل تصدقون انه بالفعل مظلوم
وقال لي والا تبغين اسحب الجوال من يدك يعني مثل البزران
انا عصبت وخرجت من الغرفه
قال لي تعالي انا ماخلصت كلامي
انا طنشته وطلعت لاني اخااااف اخررررب كل شيء واقوله الحقيقه وبلا لف ودوران
جاء زوجي لحقني للغرفه وسألني وين جوالك واعطيته
اخذ الجوال ودق على رقم البنت وردت عليه
انا بغيت موووووت لاني غيورة مااحب اشوف زوجي يكلم أي وحده مايعرفها
طبعا زوجي سألها وش عندك وليش قاعده تتصلين ومن الي مرسلك
طبعا في داخلي اضحك واقول والله صدق السالفه لكن الي قاهرني
قوووووة عينه وانه يتظاهر انه مسكين وماله ذنب ومسكين وش حليله
المهم قامت البنت تتغنج وتقوله ياطويل العمر انا مااتصلت ولا ارسلت شيء
اسأل الي عندك وزوجي طالع فيني بنظره والله اني بغيت اموووت
طبعا زوجي هزئها شوي وبعدين قفل الجوال في وجهها
بعدين ناظر فيني زوجي وقال من الي اتصل هي ولا انتي انا انفجرت بكى
وادفه واطلع من الغرفه وسحبني من يدي قال تعالي كلميني يعني خلاص
بنت الكلب حققت الي تبغاه
طبعا انا جالسه في الارض ومغطيه وجهي بيدي وابكي واصيح
لدرجة حسيتي ديني ترتجف
وقمت اصيح واقوله اطلع من الغرفه
قااام زوجي يهديني ويقول خلاص اهدي
انا بطلع لكن لاتخلينها تحقق الي تبغاه وهو انها تخرب علاقتنا
طبعا انا جلست مع نفسي شوي الين ماهديت
وبعدين طلعت واتوضات وصليت الظهر
بعد الظهر راح زوجي للصلاه
انا اخذت جوالي ودقيت عليها ماردت
بعدين رحت لصاله ولقيت جوال زوجي((طبعا انا هذا الي ابغاه))
ابغى ادق عليها من رقمه واشوف ترد هذي الحيوانه ولا لا
دقيت عليها من جوال زوجي مرتين ماردت
بعدين رجعت دقيت عليها بجوالي وردت
قمت قلت لها كان رديتي على الرقم الي دق عليك من شوي
ماهو نفس الرقم الي مرسله صورك الحلوه
وطحت فيها تهزيئ وانا اذا زعلت اجيب العيد
وبعد ماخرجت الي في قلبي كله قفلت الجوال بوجهها
رجع زوجي من الصلاه وناظر فيني
وجلس يسلم على راسي ويقول لي انتي بس قولي لي وش الي يرضيك واسويه لك
قلت له جب جوالك ودق عليها قدامي
قال طيب
راح واخذ جواله من الصاله وجاء
ودق عليها مرتين ماردت
بعدين نلظر فيني زوجي وقال شفتي ماردت((طبعا بغى يموت من الفرحه زوجي لانها لو ردت بتزيد الشكوك في قلبي))
ولو ان الشكوك موجوده
المهم طلع من عندي من الغرفه
انا رحت المطبخ وحظرت له الغداء وشوي الا جوالي يدق طبعا رقم غريب رديت الا هو صوت رجال قمت قفلت الجوال بوجهه
وانا وزوجي على السفره دق على زوجي نفس الرقم
طبعا زوجي ماكان يقدر يكلم قدامي
وطلع الحوش وقمت انا انتظر وانتظر وانتظر وقمت
وقلت والله لاسمع وش هالمكالمه الي بتخليه يطلع من البيت
ورحت الى باب الحوش وجلست اسمع لكلامه
الا زوجي اسمعه يقول خلاص انا ابغى اقابلك شخصيا ونتفاهم ونحل الموضوع
وبعدين انتهت المكالمه
ودخل زوجي وماقلت له شيء
وناظر فيني زوجي وقال شفتي بنت الكلب ارسلت واحد يكلمني
قمت ضحكت والله بالفعل شر البلية مايضحك
المهم تغدينا ودخلت اناااام وانا في غرفتي اسمع زوجي يتكلم وبصوت عالي والله اعلم انه نفس الرقم الي دق على جواله قبل الغداء
المهم بعد ماخلص زوجي المكالمه دخل عندي في الغرفه يبغى يكلمني لكن انا سويت نفسي اني نايمه
0000000000000000000000

العصر جلسنا نتقهوى وانا مطنشته واناظر في التيفي وهوه كل شوي يناظر فيني وانا مطنشته
بعدين قال وبعدين يعني انا والله مالي دخل في السالفه تزعلين مني ليه
وهذا الي قهرني انه يسوي نفسه مسكين بس علشان تعرفون ان الرجال عموما مايحبون يعترفون بخيانتهم وينكرونها ومستحيل يعتذرون
طبعا انا كان صدقت ان بالفعل هذي البنت هي الي راميه نفسها عليه
لكن صورته الي مرسلها لها هذا اكبر دليل
لكن زوجي يقول انا ماارسلت لاحد صورتي يمكن اخذتها من الفيس بوك او تويتر او الهوز هير
والله كذاااااااب كبير
طبعا اكيد كل وحده منكم بتقول في خاطرها ليش ماحاججتيه بجواله انه يفتحه لك
انا يابنات مااقدرت اهز صورته بيننا ولا صورته خلالالالالالاص صاااارت مهزوزه من زمااااان
ولا كان واجهته وكان قلت له طيب افتح لي الرسائل المرسله
وفرضن سويت هذا الشيء انا وش بستفيد انا خلاص عارفه انه نصااااب
وعاااارفه انه بينكر وبيرفض هذا الشيء
والله اسلوب زوجي وانا ادرئ فيه
المهم طبعا قام زوجي وجلس قدامي وجلس يسولف لي عن هذا الرجال الي اتصل عليه قبل الغداء
يقول انه اخوها وانها هي والله ماارسلت ولاشيء من جوالها
بعدين قال لا والله الصدق ا نا مو اخوها انا زوجها
بعدين لما كلم زوجي بعد الغداء قال انه ولد عمها وبعدين قال والله انا مالي دخل فيها
زوجي بغى ينجن يقول لي شفتي هذي الكلبه مرسله لي واحد من اخوياها
المهم انا هدئت بكثير عن اوووول
ليش؟؟؟؟
لاني بس الي ابغى اوصل له
ان زوجي ياخذ درس والبنت بعد قلبت حياتها
والله يابنات ان زوجي قال لي ان له اكثر من اسبوع ماذاق طعم النوم والراحه
لاني كنت ادعي عليه وعليها في اخر الليل واتحسب عليهم في كل وقت
والحمدلله اني قهرته مثل ماقهرني
وخربت علاقتهم
ووترته وعيشته موقف مستحيل ينساه طول ماهو حيء
طبعا انا بااااقي مجرووووحه من خيانته لكن اهم شيء اني خربت بينه وبينها

0000000000000000000000000000

في نهاية موضوعي اتحسب على كل بنت ترسل صورها لواحد تعرفه او ماتعرفه
والي عندها بنات او اخوات انصحوهم والله عاقبة رب العالمين في الدنيا
والله اني دعيت عليها بدعاوي لكن اسأل العظيم ان يستجيب لي
طبعا صورها ورقمها مسحتها من جواله
علشان مايكون فيه أي تواصل بينهم بعدين
مع العلم ان الخيانه في دمهم وانا عارفه انه رقمها حافظه
لكن الله اسأل الله العلي العظيم انكم ماتحسون باللي حسيته
والله اني حسيت باهاااانه وبمذله وانعدمت الثقه بيننا وانكسر قلبي
لكن الحمدلله
زوجي تغير معي بشكل فضيع
مسوي فيها رومنسي وصاااادق وحنون لكن يالله احسن من غيره
000000000
انتهت سالفتي وابغى اشوف وش رايكم
بس من دون تجريح
وادعولي ان الله يجبر بخاطري ويلئم جروحي
((((سبحانك اللهم وبحمدك اشهد ان لا اله الا انت استغفرك واتوب اليك))))

الرجال مهم يكون غلطان ما يعتررف اببد اولهم زوجي ما يعترف بغلطه ابد