السلام عليكم ورحمة الله وبركاته ....
اليوم جاتني رسالة عالايميل " كالعادة" محتواها صور مقززه واهانه للقرآن الكريم ,,
طبعا ماحظيتها هنا لانها بجد صور بشعه ومهينه ما ارضى انها تنتشر
اللي ازعجني اكثر من الصور هو اللي ارسل الصور ..
وصلنا لهالدرجه من الغباء انه نساعد اللي سوا هالشئ في نشره ..
والاكثر ازعاج انه في نهاية الرساله: اسالك بالله ان تنشرها لكل اللي عندك ..حتى يشوفها الكل "لو ترضاها لا ترسلها لاحد"!!!
تحلفني اني انشرها ونشرها اساس هو الغلط ..!
يعني بالله ليش انشرها ..؟ من زينها يعني يوم انشرها ؟؟ واذا نشرتها وش بيصير ..؟
اذا انتي مؤمنه فما احد رح يهز ايمانك لو مهما سوا الا بارادتك انتي ..
لو انتي تحترمين كتابك مثل ماتقولين ماتساعدين في نشر هالاشياء السخيفه والمقززه ..
انا ماحطيت الصور لاني بصراحة انزه نفسي عن نشرها ولو كانت لمجله او كتاب عادي لانها صور جدا مقرفه ..فما بالك وهي صور للمصحف الشريف ..؟
يعني هم لما صوروها وش يبون غير انها تنتشر وحنا نساعدهم على هالشئ ..؟
غير كذا يااخواتي نفسي تفهمون انه المصحف اللي بيديهم مجرد ورق وحبر " كالحمار يحمل اسفارا" وانه القرآن الحقيقي في الكلمات والمعاني اللي نفهمها ونؤمن بها اللي لو احرقوا مصاحف الدنيا كلها مايغير فيه شئ بالنسبه لنا ..
احراق المصحف او الاستهزاء به مايخوفني ابدا بقدر ماتخوفني سطحية تفكيرنا وسذاجته..!