رسالة الى كل انسان(مشاركة في مسابقة:رسائل انسانية بعبق شهر الغفران)

خلونا نتخيل لمجرد انسانيتنا انو السعاده ما قروش, وانو عادي اديك رطل سكر مقابل رطل محبه وازيدك ابتسامه صادقه من جيبي عشان تبقى لي زبون في كل الحالات, زبون لما احتاج للفرح , ولما احتاج للبكاء, ولما احتاج للريده زاتها القاك, لانو باختصار لمواقف كتيره حاصله الزول براهو ما ببقى, لازم تكون في روح تانيه مكملاك , ما لازم الروح دي تكون حبيب , ممكن عادي يكون اخوك ماولد امك وابوك , بس لازم الاخو دا يكون بشبه اخوي في كل تفاصيل الحاجات الفيهو , قبيل كنا بنتونس في ذات لحظه صادقه شديد كدا قلت ليهو: تفتكر في اخوان بريدو بعض زينا كدا؟؟؟ قال لي بنفس الرقده الكان راقدها كانو الكلام طلع من قلبو طوالي: لو كل الاخوات زيك كدا اكيد حيكونوا بترايدو زينا , يلا احساس يكون عندك اخو رابطاك بيهو حاجات تانيه غير الدم احساس احلى بكتير من احساس الشبع عندي, لامن سركم يكون واحد, خططكم واحده, احلامكم زاتها ماشه بنفس الشارع بس لون تفاصيلها بتختلف وبعد دا كلو بتكمل بعض دا بكون قمه نعم الله عليك في الدنيا, وزي ما هنادي اختي بالنسبه لي زبون سعاده , حاجة فاطمة شايفة انو احمد بالنسبه ليها زبون درب , عشان كدا ما بتقدر تمشي تجيب اللبن الا تكون سايقه طيفو, مع انو فاتها زماان قبل كم سنه كدا ,بس بالنسبه ليها ما كانوا اكتر من لحظات ,اتخيلتو فيها فات السوق يجيب ليها توب للعيد وراجع, حلو احساس الإخلاص الما بنتهي دا , والاحلى حكاويك عن الزول الكان رابطك بيهو ادمان حقيقي اكبر من فكره الزمن والظروف والخوف والوجع والفراق والانين, زول بالنسبه ليك زبون حياة او كوكتيل من الحاجات السمحه الما بتقدر ما تتخيلها كل ما تشتاق لشئ معين جواك .


اهااا اخيرا وانتو نوع زبائنكم ؟