رضاعة الطفل أيهم تفضلين الرضاعة الطبيعية أم الصناعية ؟

السلام عليكم ورحمة الله وبركاته
كيفكم أمهات

يابنات كثير أسمع نصايح الدكاترة عن الرضاعة الطبيعية لدرجة يقولون أبدًا ابدًا لا تعطون الحليب الصناعي للطفل
أنا أتفق ان الحليب الطبيعي ممتاز وافضل بس مو معناته الصناعي سيء لهدرجة
أعرف لكم وحدة من جماعتنا تقول عيالي رضعتهم صناعي ١٠٠ ٪؜ولا ذاقوا قطرة من الطبيعي ، عاد لو تشوفون عيالها فيهم صحة وقوة بأجسامهم وذكاااء كل عيالها وبناتها وظايفهم عال العال وزود على كذا متعلقين بأمهم بالحيل وبدون مايرضعون طبيعي
واعرف لكم ناس مرضعين طبيعي ولا شفنا نتايج مبهرة لا في اجسامهم ولا بعقولهم
ترااا مو هدفي من الكلام إني أذم الرضاعة الطبيعية بالعكس انا معاها وهي الافضل بس أحس ان الدكاترة مزودينها حبتين على ذا الموضوع ،،

انا صراحة اول مولود لي سمعت كلام دكاترة الغفلة ورضعته طبيعي ١٠٠٪؜لكن مسكين جنني لأن الحليب مايكفيه ويجوع غير إني لو بطلع وبخليه عند أم زوجي لازم أشفط له والشفط يااااخذ وقت مقابل كمية حليب مو كبيرة

أما طفلي الثاني رضعته صناعي٧٥٪؜وطبيعي ٢٥ ٪؜واحس اني ارتحت مع طفلي الثاني بشكككل ملاااحظ وعاد تبون الصدق كلهم نفس الشيء ما لاحظت اختلاف بينهم اصلا كنهم توأم وهذاه الصناعي ما شفت سبب له مشكلة

طبعا الصناعي فيه سلبيات واللي هي تعقيم الرضاعات ياخذ وقت ، وغلاء اسعااار الحليب الحين اسعار الحليب ناااار ، طبعا زوجي معصب علي يقول ليه ماتسمعين كلام الدكتورة وترضعين طبيعي ههههههههه طبعا هو يبغى البلاش لكن مااافيه فكّة صراحة الصناعي ما استغني عنه
بالذات الموظفات يااخي وش تسوي؟؟ تغيب عن ولدها ٦ او ٧ ساعات لااازم بديل واستحالة بتشفط كل يوم !! بالعقل لازم صناعي


الممههههم يا أمهات يا جميلات اعطونا تجاربكم في كتاكيتكم 🐥🤍🤍