رضا والدتي

لاتحرموني من نصيحتكم

الله يعينك
الله يهديه
انتي خليك نوعا ما رسمية بالكلام معها

ان شاء الله

رسمية مع امها !!!!!!!!!
الرسول صلى الله عليه وسلم قال امك ثم امك ثم امك .. وأنت تقولين خليك رسمية معها !!!!!

إلا تقربي من امك أكثر وأكثر الله يخليها لك .. لا تقولين قدامها كلام تعرفين انه يضايقها ..
لا تتكلمين في موضوع أنت تعرفين ان وجهة نظرها فيه تختلف عن وجهة نظرك ..
يعني قدر الامكان حاولي تتجنبين حدوث سوء تفاهم بينكم .
وان حصل .. حاولي تهدينها على طول ..
وتبينين لها انه حتى لو أنت زعلتيها أو خالفتيها في شيء فأنت مالك غنى عن رضاها .. وحبي على راسها وعطيها من الكلام الحلو .
امك بحاجة للي يفهمها ويقدر اللي تسويه .. فاحرصي على مدحها والإشادة بتفانيها وتضحيتها واهتمامها باللي حولها .

صدقيني يا اختي الام قلبها طيب أكبر مما تتصورين .. واعذريها على تصرفها بسبب الضغوط اللي تعانيها ..
يمكن على كثر ما تعطي وتضغط على نفسها ما حست بتقدير اللي حولها لعطائها .. وهالشيء يضايقها ..

أنت ام الان وتعرفين كيف تعيش الام في ضغط من مسؤليات وهموم البيت والاولاد والزوج ..
لكن أكيد تربيتك غير تربية امك وظروفك غير ظروف امك وسنك وأفكارك .. فبكذا أنت قادرة انك تنفسين عن مشاعرك السلبية بطرق كثيرة ..
بينما امك تجهل الطريقة المناسبة ، وفي نفس الوقت ما تقدر تتحمل الضغط الزايد .. فلا بد تنفجر وما لها غير تنفجر على أكثر واحد متسامح معها ويتحمل نوبات غضبها أو زعلها .

نصيحة .. خذي الأمر ببساطة و تحملي ما يجيك من امك وتقربي منها أكثر وأكثر .. ولا تزعلين على امك أو تتضايقين منها ..
امي الله يرحمها ويغفر لها كانت تعاني من الضغط من كل جهة وأنا مقدرة لهالشيء .. وكانت تنفس غضبها أو ضيقها فيني و تزعل علي أو أو .. لكن رغم تقديري وفهمي لسبب هالتصرف منها إلا اني كنت أتضايق وياما زعلت في نفسي طبعا ما أبين .

لكن والله يا اختي لو حطيت في بالي وقتها ان امي ممكن ترحل عنا .. والله كانت نظرتي للموضوع بتتغير ..
وبشوف فيه باب من أبواب البر .. كون ان امك تحط حرتها فيك فمعناها انك أكثر اللي حولك تحمل لها وتسامح وطيبة معها ..
خلها تفرغ ضيقها فيني دام ما تعرف طريقة ثانية وأنا على استعداد أتحمل دام هالشيء بيريح امي .. موب أحسن من انها تصاب بمرض نتيجة كبت مشاعر الضيق اللي تعاني منها .

والله اني ندمانة اليوم اني كنت أزعل وأتضايق من تصرفها معي .. كنت أبكي على تصرفاتها معي .
لكن دموعي أمس مالها معنى قدام دموعي اليوم على فراق امي الله يرحمها .

استمتعي بوجود امك معك وتحملي وسامحي وتقربي منها أكثر .. وبريها وبريها قبل ما تفقدين حتى زعلها عليك .

صارحي امك بهالموضوع

قولي لها كل الي كتبتيه هنا

هي محتاجه تسمع منك

مو كل تصرفات الامهات صح.. لكن كيف نوصل لهم انو هالشي مايعجبنا

قولي لها بصراحه.. انتي تفهميني غلط احيانا او انا اسيئ التعبير واضايقك وتكبر المشكله

حبي على راسها.. يمه.. اذا ضايقك شي مني قولي لي بس لاتشيلينه بقلبك او تزعلين ان تتشكين لغيري

صدقيني امك بتفرح ويمكن تفضفض لك عن كل شي يضايقها