عاد انا بقلكم على حلم رعب والحمد لله انه حلم بس اذا عرفتوا سبب الحلم تعرفون ليش خفت وماتسسون مثل ماسويت ...

هذا سلمكم الله ..

صحيت على صلاة الفجر وكنت تو نمت قبلها بساعة بس يعني سهرااااانة >>> طبعا عذر اقبخ من ذنب

المهم جهزت فطور زوجي .. وجهزت ولدي للمدرسة مدري كيف ..

ورميت نفسي على السرير قبل مايطلعون من البيت ونمت ..

وتعالوا شوفوا الحلم ...

ثعبان كبير لدرجة ماتوصف وطويل لدرجة اني وين مالتفت اشوفه

كنت في بيت ابوي وهو كبير

فكانت الجدران ماهي جدران لا كانت اغصان يابسة وعريضة وكان الثعبان يلتف حواليها ويطلع من كل جهة

خفت خوف بقي في قلبي طول اليوم
كنت متسمرة في مكاني اخاف اتحرك يشوفني ويهجم علي ..

وكنت مرعوبة جدا وفجأة صحيت وطلع حلم وعلى طول قلت هذي الصلاة الي نمت وماصليتها
وهذا تحذير ونذير
الله يختم لنا بالصالحات يارب
ونستغفر الله من كل ذنب ...

وعندي موقف ثاني مرعب بذكره لكم في رد مستقل

قبل تقريبا 5 سنوات بداية استخدامي للنت ..

كنت جديدة على كل شي فيه
ومرة حطيت بقوقل غرائب او شي مثل كذا وفتح لي ذيك الصورة الي تدققين فيها اكيد تعرفونها لأنها انتشرت وطلع معاها قصص ناس كثير

المهم طلع لي مع قمة التركيز وجه الرعب الي يضحك انا قفلت اللاب توب بقوة وصرخت ... وتجمد الدم في عروقي ..

إلى الآن وانا اخاف من اي شي بالاب توب يوحي بالرعب

صرت اخاف من اي صورة

وقبل مااشوف الصورة انزل بسرعة للردود واقراها ترى فيها شي

واذا تطمن رجعت اشوف الصورة

والى الان اقول حسبي الله ونعم الوكيل على الي سوا هالمقلب الله لايسامحه لأن فعلا تأثرت من الموقف وصرت اعاني من اي مشهد او صورة ..

وبعض المواضيع ماافتحها لهذا السبب

ودايما ماانسى الموقف

وتدرون عاد موضوعكم هذا والله ماقريت الا الصفحة الاخيرة وبحذر ....

ههههههههههههههههههههههههه الله يسعدك يا عيوشه
عاد يكرهي للفجعه يطيح قلبي
كملووووووووووووووووووووووووووووووو

والله صادقه

انا مره روعتني في النت

ومره اخوي روعني فيها يالله

وصرت مثلك اذا شكيت في موضوع انزل اشوف الردود اول هههههههههههه بعدين ارجع اقرأ

:icon33:

ذكرت موقف من اصعب المواقف الى مرت على
كانت اختى والده وقررت انا واخواتى المصونات انحنا نسوى لها بوفيه ونعشيها
كنت ذاك اليوم تعبانه تعب الحرمه كل شهر وراسى مصدع ومشغوله فى المطبخ لين شوشتى
عندى عيالى الله يخليهم لى ويصلحهم اللى داخل والى طالع وعندى ولدى عمره سنه و8شهور عاد تخبرون البزران لاشافو امهم مشغوله وش يسوون
المهم ابلشنى فقامت اخته عمرها 13 وعطته قطعة حلا من النوع الجاهز بس كانت بشعه شوى صعب اكلها
ولدى كلها دفعه وحده ونشبت بحلقه تخيلو صعوبت الموقف وجهه ازرق وعيونه جاحظه واحاول اطلعها وماقدرت اوصل لها
صابنى حالت فزع شديد وصرت ابكى وانتفض وبنتى جاها حاله هستيريه من الخوف بس تصارخ وانا كل محاولاتى انى انقذ ولدى بائت بالفشل لدرجت انى امسك التلفون بكلم رجلى يجى يسعفه بس طارت الارقام معد تذكرت اى رقم لدرجت انى صرت اضرب التلفون بقوه مدرى ليه بس والله انه احساس جعلكم ماتمرون به واتصلت على رجلى بس وش تتوقعون جواله مسكر ذا وقته تخيلى تشوفين ولدك مختنق قدامك وماتقدرين تسوين شى خطرت فى بالى فكره انى افح حلقه واحط قلم عسان يتنفس
ثم قلت مالى الا اطلع فى الشارع وانا الى البس جلال الصلاه بطلع وولدى بين يدين خلاص كلها لحظات ويودع وقمت وسويت اخر محاوله وهى انى دسيت يدى بحلقه بقوه لين لمستها اخيرا وانا الى اضغطها لين نزلت بعدين تنفس ولدى وصاح وطلع من حلقه دم شكلى جرحته بس مو مهم اهم شي يتنفس واظمه وابكى تخيلى تعبانه وزادنى الموقف تعب بس والله انى خلاص ولدى نام وانا معد لى نفس اسوى شي مره بس اتحمد الله انه خلا لى وليدى الله يحفظه من كل شر بصراحه هذا اصعب موقف مريت فيه
الحين عمره ثلاث سنين ولازلت اذا تذكرت الموقف ابكى جعله مايمر عليكن
ملاحظه يوم جا ابوه وانا الى انهد عليه ليه مقفل الجوال ومدرى ويش بس رحمته يوم ناظر جواله لانه كان طافى مادرى عنه بس شى فى نفسى طلعته هههههه قصيت قصت حياتى
اسفه على الاطاله تحملونى