Fransi.St :

الله لا يوريكم في اللي مر علي ,,أفضع وأفزع وأخس موقف في حياتي كلها كنت ساكنة في شقة في عمارة ابوزوجي قديمة مقابل شقة عمتي وعندي بكري الله يحفظه عمره سنة واربع شهور توه يخطي وكنت نفاس مالي الا يومين وحبيت انفس في بيتي ,, لأني اشتاق لزوجي كثير لا روحت بيت اهلي وهالحكاية صارت من 7 سنوات تقريبا المهم مالكم بالطويلة ,, زوجي الله يحفظه عنده 14 اخت شقيقة ويا كثر ارحامه ماشاء الله وعيال اخواته شقيقاته لحالهم تقريبا 40 طفل ماشاء الله تبارك الله ,, والشقة حقت خالتي الله يطول بعمرها كانت اربع غرف وصالة وحمامين بس وكان فيها البركة سبحان الله المهم في ذيك الليلة الله لا يردها زوجي جاني وتعشى معي وشافني تعبانة وابغى انام قالي خلي نواف معي ( ولدي البكر ابو سنة ونص) وانا انتبه له ,, قلتله زين ماتسوي كانت الساعة 12 بالليل واخذ الولد وراح لأمه وجلس مع ارحامه ,, عاد هم ماشاء الله وكان يجلسون لين الفجر وبعدين كل مين يروح لبيته وانا في عز نومتي الساعة 2 ونص الا والباب حق شقتي انكسر كسر ,, واصحى مفزوعة اشوف زوجي يصرخ ويتكلم وانا من النوم ماني مستوعبة ,, وعطاني هذاك الكف اللي صحاني ويسألني نواف معاك وانا يا سامعين لكم الله اصرخ واقوله وين الولد انت اخذته وما اشوف الا غبار زوجي ودخلوا علي ثنتين من خوات زوجي لأني نفاس يبون يهدوني وانا اصرخ واجري زي المجنونة بشعري مفرود والقميص وحالتي حالة ارمي عبايتي على كتفي والغطا بدون ما حط شي على وجهي وانا حافية اجري على شقة ام زوجي واقول الولد فين ولدي فينه ,, ام زوجي على طول ترجف وتحسبن وتقول الحين بيلقونه الحين بيلقونه وانا هاتك يا ركض انزل الشارع ابي ادور عليه واشوف ارحامنا وعيالهم الكبار يجرون في الحارة ,, كنا ساكنين في حي من الاحياء الشعبية القديمة اللي فيها البيوت متداخلة ونظام البناء قديم اجري في الشارع واصرخ نواف نواف نواف والله ثم والله ثم والله يا بنات اني قلت خلاص الولد راح خصوصا المنطقة كانوا اغلب سكانها عمالة وتبع مشاكل وماكنت اشوف شي قدامي ابي اهيم على راسي وادخل جوا الحارة واروح واغيب قريب الساعتين ونص وانا ادوره جري والناس والله الظاهر يقولون مهبولة لأن ماحد قرب مني ,, بعدين وقفت عن الجري ما ادري وين انا فيه ولا وين بيت اهل زوجي ولا وين الناس المكان كله سمر وهنود طالعين لصلاة الفجر واجلس اصيح جنب باب المسجد في ذيك اللحظة قلت اللي صار ما صار وعقلي صار فاصخ ,,اخذت لي قريب الربع ساعة وانا واقفة عند الباب منظرة للرايح والجاي وماصحيت الا ولد عمي اللي في نفس الوقت ولد اخت زوجي موقف سيارته وجا ينادي علي يا ام نواف لقيناه لقيناه وانا والله اطل فيه وما احس بنفسي ,,خمس دقايق وزوجي موقف بسيارته وساحبني من يدي وجلسني جنبه وحط ولدي بين يديني الله لا يوريكم انا بدون شعور اشم راس ولدي واصيح واشهق ونوقف عند باب العمارة ماصحيت لا بالشرطة ولا بأهلي واقفين وامي واخواتي يتصايحون وابوي يدعي والخلق مقلوبة الحارة فوق تحت مع قوة الصدمة وخصوصا اني نفاس دخلوني المستشفى قعدت اسبوعين فيها ما اتكلم ولا اتفاعل مع احد ولا حتى زوجي وبس حاطين عيالي عندي وكانت امي مرافقتني ,,ابوي الله يطول بعمره جاب لي شيخ يقرأ علي مدة اسبوع كل يوم يجي المهم اللي صار وكيف اختفى ولدي وكيف طلع لما رد لي عقلي بعدين زوجي يقول ماشاء الله تبارك الله من كثرة الاحفاد اللي عندهم الباب مايستكر والناس طالعة نازلة فولدي بما انه توه يخطي ومايعرف يتكلم غافل ابوه ونزل من العمارة ومشى على راسه بالشارع شافته وحدة صومالية وجت اخذته تبي تروح فيه والله اعلم وين كانت بتوديه لأن لين الحين مالقوها بعد مامشيت فيه داخلة لجوا الحارة شافها الباكستاني اللي زوجي كان مأجره البقالة عندنا وشاف معاها ولدي وهو يلحقها ويقول هاتي بيبي وهي تصرخ بوجهه هذا ولد انا وهو يقولها هاتي بيبي هذا ولد كفيل وهي الا تبغى تاخذه وهذا كلام الباكستاني للشرطة وهو يقول هذا نواف انا يعرف ابوه ولدي الله يحفظه سمع اسمه وقال هاه ورمى نفسه على الباكستاني وهي عشرة مايلحقوها دخلت جوة الحارة وهذا الباكستاني الله يجازيه بكل بخير يارب اخذ ولدي وراح يقفل المحل حقه وهو معاه واعطاه بسكوت وفي هذا الوقت كيدنا انتبهنا ان ولدي مفقود وانا نزلت وروحت على راسي ,, عاد جاك الباكستاني ومعاه ولدي للعمارة وشافه زوجي وقاله وين لقى الولد وان الحرمة كانت بتخطفته وان هو اخذه ,, زوجي اخذ الولد وحضن الباكستاني وباس ايده وراسه وعطاه المقسوم ودخل ولدي مع اخوه ابو يومين عند امه وطلع وهو والجماعة يدورون علي ولما عجزوا اتصلوا على الدوريات واتصل على اهلي حتى اخواني يجون يساعدونه ومن بعدها شوف الحكاية لها سبع سنين تقريبا وكم شهر والله ولدي الحين سنة ثانية ابتدائي الله يحفظه ماخليهم يغيبون عن عيني ابد ولا اوديهم اسواق او مولات او حدايق او زواجات الا وانا عيني عليهم صحيح طولت عليكم لكن والله ثم والله ماقد عشت الرعب ابد

الله لا يوريكم في اللي مر علي ,,أفضع وأفزع وأخس موقف في حياتي كلها كنت ساكنة في شقة في عمارة...