اقترب شهر رمضان المبارك شهر القرآن والغفران
شهر المكرمات والرحمات
الشهر الذي تهفو له قلوبنا جميعاً ونترقب هلاله عام بعد عام
لمعرفتنا التامة بان اوقاته مباركة وحسناته مضاعفة
لذا يجب علينا جميعا استغلال اوقات هذا الشهر بالطاعات
فهو فرصة عظييمه لزيادة الحسنات يجب ان نستغلها افضل استغلال
ولا نفرط باي لحظة فيه .. يكفي تضييعنا لاوقات السنه باللهو والسهر والنت والتلفزيون والاسواق والاشياء الغير نافعة
رمضان لااازم يكون غيرررررررر
غيررررر
حرااام والله نضيع هذي الفرصة الربانيه علينا
حاولوا تخلصون مقاضي العيد من اللحين
وجهزوا لانفسكم جدول لليوم كامل من اللحين
متى تصحون متى تنامون متى تطبخون وايش تطبخون عشان ما يضيع الوقت باختيار اصناف الطعام او إعداده
وحاولوا تخلصون من إعداد الفطور قبل المغرب بنصف ساعة على الأقل
عشان تجلسون تدعــون قبل المغرب
مو زي حالتنا دايم نمسك الرطب بيد ونحرك السنتنا بدعاء حافظينه عن ظهر قلب بدوووون اي يقين بالاجابه او حتى ان نعي ما ندعي ..
لازم ندعي واحنا على يقين تااااااااام بان هذه الدعوة مستجابة
فحبيبنا بشرنا بان للصائم عند فطره دعوة لاترد
ادعوا لانفسكم بالجنة ادعوا لوالديكم بالجنة ادعوا لأولادكم بالبركة والصلاح ادعوا الله أن يديم عليكم الصحة والعافية
ادعوا بكل شي تتمنونه فأنتم تدعون الكريــــــــم فلا تبخلوا على انفسكم ووالديكم واولادكم ومن تحبـــــــــون بالدعاء
وبالنسبة لصلاة التراويح..
اللــــــــــــــــــه على صلاة التراويح
لـــذة لـــذة لـــذة لاتعاااادلها لـــــــذة ..
اتمنى فعلا ما تضيعونها ولاليلة في رمضان
من الان جهزوا سجادة جديدة وشرشف صلاة وعطروه وبخروه بالعوده وخصصوه للتراويح ..
وبعد ماتصلون العشاء وتغسلون مواعينكم روحوا لركن الصلاة اللي متعودين تصلون فيه ..
انا شخصيا اصلي بغرفة النوم
اكون مشغلة المكيف وسجادتي مفروشة ومصحفي عند السجادة وقريب مني ثلاجة غرفة النوم فيها مويا صحة وعصيرات لو عطشت اشرب
بعد أذان العشاء اخذ دوش سريع عشان ريحة الطبخ واقفل باب الغرفة
واصلي التراويح وبعد تسليمتين اخرج من الغرفة اتطمن على وضع البيت واطفالي ( الشغالة معاهم ) بس لازم اتطمن عليهم
وارجع اكمل صلاتي ..
واكيد كثير منكم امهات ما يقدرون يروحون للمسجد كل يوم عشان اطفالهم
لكن لايكون هذا عذر عشان ما تصلون التراويح ..
صلوا ببيوتكم والرسول صلى الله عليه وسلم أخبرنا ان صلاة المرأة في بيتها افضل..
ولاتنسون الصدقة و
تفطير الصائمين
الان اغلب المطاعم والمطابخ عندهم عروض تفطير الصائمين
شوفوا اقرب مطبخ واتفقوا معاه واعطوه المبلغ المطلوب لتفطير صائم او اثنين طوال الشهر على حسب ميزانيتكم
او اذا تعرفون محتاجين من اقاربكم ممكن تشترون لهم المقاضي الاساسية وتعطونهم اياها قبل رمضان
وحتى الفطور اللي تطبخونه لازواجكم وعيالكم انووا انه تفطير صائم وان شاء الله ربي ما يحرمكم الاجر
وأسأل الله ان يعيننا وأياكم على صيام رمضان وقيامه وأن يتقبله منا ياااااارب
وأقبلو مني هذه التهنئة الرمضانية البسيطة
جزاكي الله خيرا