صدددددددمه
وقويه جدا


ماتوقعت خلف هذي الشخصية وحده تعاني بهذا الشكل !!!!!

بسألك سؤال واتمنى تجاوبيين بصراااحة
اهلك كانوا يعنفونك يوميا ويضربونك ولا ضربهم له عدد معين ؟!


وهل كانو يعاملونك بالحرمان دائما
يحرمونك بشكل دائم من كل شي


لأن مافيه اهل إلا ضربوا عيالهم لكن ضرب عن ضرب يختلف
لأن بعضهم ضربه بشكل عنيف جدا




نصيحة اتركي هذا الشخص ( من ترك شيئا لله عوضه الله خيرا منه )


المدمن حتى لو تعالج فيه احتمال كبيييير يعود للمخدرات كما نسمع عن كثيير من القصص
ونفسيته تكون غير مضبوطه حتى لو تعالج




ولاتخلين للشيطان مجال عليك ويجلس الشيطان يلعب عليك ويقولك لان اهلك كانوا قاسيين عليك كلمي شاب وخليه يعوضك عن حنان اهلك
الشاب مب مدور الا عن شهوته حتى لو لعب عليك بكلمتيين
فأصحي يالغالية وتزوجي في أسرع وقت بزوج صالح ترضين عنه خلق ودين

اسأل الله. ان يعوضك خير.
لا نعرف الحقائق. ولاتعرف الحقائق بسطور. ولكن. انتي أمراءه ناضجه فكرياً. وتمتلكين اُسلوب راقي ف الحديث.
أتوقع. ان أمراءه تكافحين حتى النهايه لاتستسلمين أبداً
هذه صفه حسنه.
ولكنك. اوظفتيها في غير محلها. ارى ذلك. و يحتمل رائي الصواب والخطاء


وأخيراً تستحقي قبله ع جبينك. ان لم تغضبي اهلك بلاسبب مبرر
ولو انك استخدمتي طاقتك. ف الصبر لأهلك. لكان خير لك. في جميع الامور

انا على قناعة انه الحكمة والاتزان الي تظهر لي غالبا في بعض الردود ماتولدت في حواء الا بعد ماتجرعت انواع من المرارة وشافت الوان مختلفة من الظروف وعاشت وسط اكوام من الهموم وغرقت مرات ومرات في دوامات من المشاكل وعصفت فيها الحياة يمين ويسار فوق وتحت
وبقدرة القادر ينجيها الله لحكمة يعلمها سبحانه
فشخصيتها تتبلور وتتشكل وتطلع لنا امثلة كعواطف تركي وغيرها
اخذت منك مالامس مشاعر مدفونة وخرج مني ما ارجوه ان يطيب بعضاً من جراحك ويعيد دفنها
دمتي بحفظ الله ..

الله يجزاكم خير كلكم

الحمدلله الامور طيبه وكل شي بخير والنفسيه مرتاحه

كانت سحابه عابره وعدت على خير شاركتكم فيها جزء من حياتي ووجعي

فعلاً الكلمه الطيبه لها مفعولها ومشاركة الناس الهموم مفعوله مثل الفورمات والتحديث يخفف وينظف ويجدد النفسيه 😂


نجي لاستفساراتكم

وضعي مع اهلي مستقر وسامحتهم وعفيت عنهم وألتمست لهم الاعذار مو عذر واحد فقط ، ولازلت احسن لهم واعتبر صبري من البر فيهم هذا الكلام من زمان مو من اليوم ، ولو يدوسون على رقبتي برجولهم يبقون اهلي وراح اصبر .

والحمدلله لازلت اعيش مستقله وشايله نفسي وهذا من فضل ربي ان يسر لي هذا الشي والوظيفه .

وبالنسبه لـ ( حبيبي ) ببساطه سهل اقطعه ما اكلمه بسجنه ولا اشوف طلباته واقدر اسحب على اهله ما ارد عليهم ولا اتواصل معهم مثل ماقطعنا قبل سالفة السجن واقدر اصبر واجاهد نفسي لو اتقطع وانحرق مثل ماتعبت قبل لكن مارميت نفسي عليه ولا جريت وراه انسحبت وصبرت والروح كنت احسها بتطلع مني .


لكن صدقوني اللي في القلب له مايمحيه بعد المسافه ولا انقطاع المواصيل وهذا اللي يخليني اقول لنفسي ان هذا ابتلاء لازم اصبر عليه ، يمكن هذا الشي صعب تتفهمونه لكن انا راضيه الحمدلله على كل حال امر الله خير .

وماحد يعلم باللي يخبيه له الغيب ، مثل ماتقلبت بي الاحوال من الضيق الى الفرج وفي طرفه عين وبدون مقدمات لعل الله يغير امور اخرى في حياتي .


ومثل ماوضحت انا ما انتظر من الرجال شي ولا مقابل لوقفتي معه ومع اهله الله يفرجها عليه ويصلحه ويهديه ويتقبل توبته .. لكن ماقدر اشوفهم بأزمه وما اساعده حتى لو كان ماضيه مبتلي بالخرابيط امره لربه انا سويت اللي يمليه علي ضميري وقلبي .


وموضوع انه يخطب ويتزوج اذا كان جاد هو فعلاً كان وده اليوم قبل بكرا وحتى امه قبل تتوفى الله يرحمها كانت تكلمني بالموضوع لكن برايكم في عاقل بيوافق يزوج شخص مثل وضعه ؟ الموضوع كبير ماودي اتطرق لتفاصيله .

هذا غير ان انا ما اشوف رجال يستحق كلمة رجال بعيوني ، وما اقدر اثق في أي شخص ، وما عندي رغبه اربط حياتي واقيدها بزواج ومسؤليه واجيب ضحايا في الحياه انا عايفه هذا الشي ونفسي مو متقبله الزواج واهرب منه هروب الفار من الحرب والمعركه .

اذا على العيال ربيت اخواني وسهرت عليهم وداريت وراعيت .... الخ

خلاص النفس عايفه ما ابي زواج ولا ابي بطيخ

الوظيفه هي السلاح في زماننا والباقي يهون ونصبر عليه

وبس كلمه اخيره للاخوات اللي قالوا مجاهره بالمعصيه انا ما افتخرت بهذا الشي و ما انكر ان اللي حصل شي غلط ولا انكر ان معرفتي فيه بدون رباط شرعي غلط لكن انا بشر وقعت في هذا الغلط وابتليت نسأل الله العفو والعافيه والمغفره ..

وتفكيري قبل3 أو 4 سنوات مو مثل تفكيري اليوم وانا عمري فوق العشرين سنه

اذا رب العالمين يغفر ويسامح تجون انتوا يالبشر يالعباد تبون تحكمون علي وتهاجموني بعذر مجاهره بمعصيه ، ليش ماقلتوا هذا شي يستفاد منه ؟ ليش ماقلتوا يمكن في أم تاركه بنتها او تعنفها وتسيء له تشوف كلامي وتنتبه لبنتها لا تضيع وانا قلت ترى الشارع مفتوح ويستقبل كل بنت مجروحه وناقصها اهتمام

وانا اكبر مثال وقعت بشخص يعاني ويتألم ومبتلي بطامه المخدرات لا تتركون بناتكم يشوفون اللي شفته ويتعذبون .


وترى الاسلوب والرفق في النصيحه يجذب اذا تبون الاجر ومرت عليكم قصه تشبه قصتي لا تخسرون الاجر بسبب اسلوبكم وهجومكم الشخصي والتشفي والتشمت

بتشمتين فيني ساعه وراح انساها واكمل حياتي لكن راح تبقى في صحيفتك ليوم الحساب تجازين فيها اما حسنه او سيئه ، فا اخلصي القول .

وانا اعرف ان كلنا فينا عيوب مافي انسان كامل وانا اولكم ماني كامله

في الختام الله يسامح الجميع

احبكم في الله

والله يجزاكم الجنه بكل حرف كتبتوه وكل كلمه واسيتوني فيها الله يجعل الخير في طريقكم والشر بعيد عنكم .