روتين ما قبل النوم

السلام عليكم يا امهات المنتدى

اليوم يايبتلكم موضوع قلت لازم اكتب عنه خصوصا عقب ما شفت شكثر في امهات يشتكون من سالفة نوم عيالهم

عشان الياهل ينام لازم يكون عنده روتين .. عموما اليهال يحبون الروتين في كل شي .. نوع من الامان لانهم عارفين شو بيصير .. المفاجآت يمكن تضايقهم أو ما تريحهم

القوا نظرة على هاي الخطوات .. ممكن اطبقونها اذا انتوا ما تسوونها اصلا .. او ممكن تستفيدون بعد بمجرد قرايتها
تفضلوا :

1- تحديد ساعة معينه للنوم
مثلا الساعة 7:30 لازم يكونون في فراشهم .. كل يوم مثل ها الوقت .. بعدين ساعة الجسم البيولوجية بتتعود على ها الوقت و بيصير سهل تنويم الطفل في هاذيج الساعة

2- تنبيهم لموعد النوم
يعني مب الياهل قاعد و تقوليله ياللا يا وقت النوم ياللا نروح نرقد .. لا .. مثلا حمام قبل النوم يعلمهم ان وقت النوم قرب .. طلب الام من الطفل ان يرجع الالعاب مكانها بعد ينبه الياهل ان وقت النوم قرب

3- وجبة خفيفة
مزيج من الكربوهايدرات و البروتين .. مثل جبن على خبزه .. الكربوهايدرات فيها عامل يساعد على النوم و البروتين يعدل مستوى السكر في الدم يلين الصبح

4- حمام دافي قبل النوم
رفع حرارة الجسم شوي ترخي الجسم و تساعده على النوم

5- ملابس مريحة للنوم
ما تكون ثجيله او خفيفه وايد عشان ما يحر جسم اليهال او يبرد و بالتالي ما يتضايق اثناء النوم

6- قراءة قصة او كتاب للطفل
القراية قبل النوم ترخي الجسم و تهيأه للنوم .. بس كل ما يكبر الياهل كل ما يطلب قصص زيادة

7- القرآن
سواء قراءة الام .. او انكم تحطون مسجل يقرا بصوت واطي .. تراه يريح

8- قللوا من رضعات الحليب
اذا كان الياهل ما ينام الا بالرضاعة مالته ، حطوا في الرضاعة ماي اذا ممكن ، لان الحليب يسبب تسوس الاسنان عند البيبيات

9- "تصبحون على خير"
مختصرة و صارمة .. يعني بوسي الياهل و قوليله تصبح على خير و خلاص سكري الباب عليهم .. صحيح شويه قاسية بس اذا تعلم الياهل ان كل ما يناديج تين ، بيقعد يناديج طول الوقت و لا بينام. لازم الام تبين لولدها انها صارمة يعني ما يقدر يقص عليها .. لأن في يهال اذكياء يعتقدون انه عندهم اسلوب يقصون فيه على الام .. و ما شاء الله عليهم وايدين و الامهات مساكين على نياتهم

ملاحظة
ها الروتين ممكن تطبيقه على اليهال من ست شهور و فوق