روحي بقايا انسان !! ادخلو الله يخلييكم

السلام عليكم ورحمة الله وبركاته

صباحكم ومساؤكم مخلوط بالعسل الدوعني

بداية أعرفكم عن نفسي.. حضرمية ولدت وعشت وتربيت بالامارات عمري 27 سنة

الحمدلله خلصت بكالاريوس رياضيات .. وبإذن الله سأقدم على الدراسات العليا لكن مدري متى !!:35:

كل اعمامي واخوالي عندهم جنسيات ماعدا ابوي وامي ههههههههههههه

طبعا اخواتي متزوجات عيال عمي .. فأخذوا الجنسية الاماراتية ..

الحمدلله حالتنا المادية ممتازه .. ابدا ماحسيت بالفرق بيني وبين بنات عمي او بنات خالي

بالعكس انا كملت دراساتي الجامعية واغلب بنات عمي ماكملو !!

المشكلة مو هنا .. المشكلة بمسألة الزواج ..

صحيح ان الزواج قسمة ونصيب وكلها مقادير ..

لكن مدري كل ما يجينيا خاطب انا واختي ويروح احزن على نفسنا اكثر !!!

كل الي يجون يحسبون ان عندنا جنسية اماراتية بحكم ان كل اعمامي واخوالي عندهم

فتيجي الام وخلاص كل الامور ماشية تمام التمام

فجأه تسأل مااشاء الله فلتكم ملك ؟ طبعا لأن المنطقة الي احنا فيها كلها اراضي موزعة ويبنون فيها

امي تقولهم لا ايجار .. الحرمه تسغرب كيف وليش ووين ارضيتكم ؟!

امي تقولها ماعندنا جنسيه .. تلقين الحرمة وجهها انقلب وكل تعابير الدنيا بوجهها

احنا على بالنا متجنسيين .. نعرف عمكم فلان وفلان أوخالكم فلان .. أو بنتك فلانة ..

امي تقولهم ايوا صح بس احنا لا ؟؟؟

تجي تقول ولدي مايريد وافده !! ( ترى ابوي ما يزوج الا الي اصله حضرمي قبيلي كان متجنس ولا لا )

طيب ياخي كان ممكن تسكتين وتطلعين بدون تجريح !! وتقولين مافي نصيب ..

تعرضنا انا واختي لهالموقف اكثر من 6 مرات ..

نفس الحكاية يجون على اساس متجنسات ولما يعرفو ان ماعندنا جنسية يروحو ولا نشوفهم ..

لو يطلعو لنا عيب بالطول بالشكل او بأي شي ثاني ماراح اتأثر..

لكن لانهم مو قادرين يطلعو عيب خلقي فينا.. الحمدلله خشوم وشكل وبياض وغيره ..

قلت اشتغل بالتدريس وألهي نفسي شوي ..

المدارس الخاصة استنزاف بمعنى الكلمة للمدرسة وبالاخير راتبي أكثر من راتب سواق الباص ب 500 درهم بس

قلنا معليش نقضي وقت فراغنا مو مسألة فلوس..

والله كنت اصغر مدرسة بالمدرسة .. حتى كانو يسموني الكتكووته ..كلهم حريم كبار كل ماتكلمت كلمه

ماتعجبهم لأني أصغرهم .. رايهم هم الصح ورايي دايم الغلط لأني بنت أمس !!

تحملت وقلت اركز على طلابي أحسن من قرقرة الحريم :mad:

كنت الوحيدة الي استخدم الاب توب والداتا شووو بالمدرسة ..

والحمدلله على مدى سنتين كان تقديري امتياز :27:

لكن جيت على السنة الثالثه و فجأة حسيت اني خلاص ما أقدر اعطي ولا اشرح لاي طالب

كنت اروح لأني موقعه عقد سنة جديدة بس ...استخرت و بديت اعطي المديرة خبر ابغي استقيل

وهي رافضة الفكرة بقوة .. اقولها يا مس انتي ع العين والراس لكن عيال الناس امانة

حرام اجي وانا مالي نفس ادرسهم وانا ماصرت اعطيهم واشرح زي قبل .. راح استقيل

قعدت ابكي لها كل يوم .. لين ماقالت خلاص .. الي تشوفينه صح سوييه :44:

استقلت من الفصل الاول وعلى طول رحت عمرة وارتاحت نفسيتي كثير..

وجالسة من السنة الماضية كل ماحصلت وظيفة اتحمس حماس الدنيا كلها ..

استخير واجلس طول الليل فيني ضيق ابكي مااريد اداوم بأي مكان

وآخرها امس ... مديرة نفس المدرسة اتصلت علي تعالي وبدنا اياكي وووووو

رفضت بالبداية .. وجات لعندي بالبيت تكلم امي .. بنتك وبنتك وحرام هيك تعمل بحالها

اقنعتني ووافقت وتحمست وجهزت اوراقي وجهزت اوراق العمل الي سويتها خلال السنتين والنص

لانها اعطتني نفس المنهج ..

امس بالليل صليت استخارة مرتين ..

وجلست طول الليل ابكي مابغي اداوم مع اني تحمست واشتقت اني ادرس

بس الصراحة سالفة الزواج مأثره على نفسيتي كثير :44:

ماهي سالفة استعجال بالزواج .. لكن المواقف الي ننحط فيها قاعده تكسر في داخلي كل يوم والثاني

احس بضيق الدنيا كلها بداخلي .. مع اني من النوع الكتوم .. ولا مبينة لأي حد اني متأثرة من هالناحية

كل ما جو خطبو وراحو ..اقولهم هم الخسرانيين مو احنا هههههههههههه

الله يخليكم .. أرجووكم اخواتي الكريمات

الي اطلبه منكم ان تدعولنا انا واختي
الله يرزقنا انا واختي الازواج الصالحين والرزق الحلال عاجلا غير آجل:27:
ويبعد عنا هالمواقف مره ثانية :44: :44: