بصراحه لذيذه وشكلها راقي وطعمها مثل المطاعم الايطاليه
<<==== كلش 24 ساعه بالمطاعم الايطاليه :o
واول مره سويتها انجنو عليهااهلي وخلصوها كلها ودوخوني فيها
الزبده انها لذيذه وشكلها راقي ومشرف جدام ضيوفج خصوصا اذا قدمتيها في طبق بايركس راقي وزينتيها
المهم مابي اقرق عليكم وايد بس امااااااااانه جربوها وادعولي :23:
مو بس تردون وتعلقون على كلامي ابيكم تجربون وماراح تندمون
بس اللي ماتعرف تسلق اللازانيا بتتوهق شوي
ولايغركم طول الوصفه بس انا دقيقة حيل بالتفاصيل عشان ماتصعب عليكم
=========================
المقادير :
-لزانيا شرايح مستطيله
-صلصة البيتزا الجاهزه ( انا استعمل العلالي )
- قشطة الخفق حجم وسط (كريمه العلبه الحمره) KDD
- كاس صغير جبن كرافت او علبه وسط جبن كرافت ازرق (جبن تشدر مبشور )
- لحم غنم مفروم نص كيلو ( بصله ناعمه.. ثوم .. 2 م ك صلصه طماط .. كزبره ناعمه .. مكعب ماجي واحد .. كزبره ناعمه .. بهارات .. فلفل اسود )
-قليل من جبن مبشور ( موزاريلا )
الطريقه :
اول شي نسوي الحشوه
*نحمس اللحم المفروم بدون دهن ( لان فيه دهن وايد وهذي طريقتي في الحمس مااضيف دهن كلش )
وبعدين بس يتغير لون اللحم نضيف بصل مفروم ناعم ( انا اسوي البصل في خلاطه براون لانها تنعمه حيل واحفظ كميه بالفريزر ) وثوم ونحركه دقيقتين تقريبا
و نضيف كزبره ناعمه وحبة ماجي وبهارات وفلفل اسود و2 ملعقه كبيره من صلصة معجون الطماطم ونحرك ونضيف نص كوب ماي ونخليه حتى ينشف الماي
( لاتضيفون ملح لان حبة ماجي وحده تكفي نص كيلو لحم )
لاتحطون هيل ومسمار ودارسين لانه مايعطيها النكهه الايطاليه
واذا فيه زعتر بري ( اوريغانو ) ضيفوه بعد لانه يعطي نكهه ايطاليه على الاكل
* نسلق المكرونه ( اللزانيا ) بماء مغلي مع الملح وقليل من الزيت .. ثم تصفى وتبرد تحت صنبور الماء ( نسلق 4-6 حبات كل مره حسب حجم القدر وبعدين نطلعهم شوي شوي ونحطهم في مصفاة ونصب عليهم ماي بارد ) والافضل ننفض الماي ونحشيها بالحشوه على طول عشان ماتنشف اللزانيا وتلصق على بعض
*نأخذ كل قطعه من اللزانيا ونضع بها الحشوه ونلفها ونرصها بصينية بايركس
*نغطي اللزانيا بصلصة البيتزا .
* خلطة الوجه :
نسخن قشطة الخفق على النار قليلا .. ثم نرفعها ونضع عليها جبن كرافت او جبن كاس ( انا احب كرفت او امريكانا ) وبصراحه انا اسويها بالشدر بس الطريقه الاصليه بجبن كاس بس ماكان عندي جبن كاس هذاك اليوم .. وانتو جربوها بالطريقتين كيفكم
ثم نضع هذه الخلطة فوق صلصة اللزانيا ..
* ثم تدخل الفرن ربع ساعه تقريبا والنار من اسفل.. ثم تحمر من أعلى ..
وممكن رش قليل من جبن الموزاريلا أعلاها اخر شي قبل ان نطفأ النار بدقيقه .
باختصار
1- الطبقه الاولى : لازانيا ملفوفه
2- الطبقة الثانيه : صلصة البيتزا
3- الطبقة الثالثة : صلصة الكريمه
4- الطبقة الرابعه : جبن موزاريلا مبشور
* وبعدين طلعيها وقدميها .. كل قطعه لحالها ( سهلة الأكل ) ..
وبالعافيه :cook:
وصفة ولاااااااااااا اروع