ريــولج بيـضه وصااافيه ونظيفة وبدون تشققات والشحاطه تهبل عليها>مزيونه وشقره (كويتيات)

بسم الله ارحمن الرحيم

شلونكم كويتيات شخباركم اليوم بقولكم سرررر لا مو سر الا اسراااار

عشان تخلين ريولج بيضه نظيفة وناعمة وتهبل وتلبسين شحاطتج بثقه وتحطين ريل على ريل بعد

يبتلكم الحل والطريقة

وكالعادة ما اييبلكم شي الا مجربتة وشايفه نتايج عجيبة ومضمونه إن شاء الله

1- تشققات الريول من تحت:
إذا ريولج من تحت مشققه وناشفة ومبططه اخذيلج فكس ومع اشويه فازلين ( يعني كمية الفكس اكثر من الفازلين ) ودهني فيهم ريولج عدل مدل بكميه راهيه ولبسي دلاق متين ويفضل صوف وخليه عليج طووول الليل واستمري لمده 3 أيام حتى بتشوفين نتيجة حلوه وعقب هالثلاث أيام إذا تمت هناك تشققات استمري يوم وترك

2- بياض ونظافه ونعومه:
كل يوم فركي ريولج في ماي وصابون عدل مدل بفرشة بودي شوب الكبيرة وبصابون سائل فركي وفركي وفركي لحد ما تحسين ان ريولج انظفت من كل الغبره والوصخ المتعلق فيها بعدين نشفيها عدل وحطي عليها كريم جولسليد او كريم جلسرين انزين ولبسي دلاق وهالطريقه سويها بليل او اذا قاعدة بالبيت واذا كنتي راده من بره لاتنسين تنظيفين اول شي بالاسكينول بعدين هالطريقه

3- سويلج ساعه خاصة للريول مره بالأسبوع
بعد ما تنظفينهم بماي وصابون نقعي ريولج بماي دافي واشوية ديتول وصابون وخليهم نص ساعه وبعدين غسلي ريلج وفركيهم بليمون واشوية ملح فركيهم المدة اللي تقدرين وبعدين سنفريهم والسنفره واهيا على ريلج اخذي ليفه خشنه او ليفه مغربيه وفركي السنره عالريول عدل مدل وفركي ريلج من تحت بالحجر

والحين عندي نصايح مهمه وااااااااايد


*- لا تطلعين الدوام والسوق الا بجوتي مسكر ودلاق نصيحه حتى بالصيف لانهم اكثر مكانين فيهم غبره ووصخ وخلي الشحاطات للكشخه والمناسبات

*- دهني ريولج ليل نهار استخدمي كريم جلسرين وجولسليد وفازلين واتركس وفير اند لفلي وزيت اللوز المر

*- ولا تحطين كريم وانتي قبل جم ساعة حاطه كريم يعني إذا بتحطين كريم غسلي ريولج بعدين حطيه لان شي فوق شي يصير جلد ميت وكريمات وما منه فايده ويتكون وصخ وسواد .

*- اذا بتلبسين جوتي ودلاق لمده طويله والحين توه بادي الشتا حطي بودرة اطفال بين اصبع ريولج عن الفطريات وعشان تبتعدين عن اي روايح كريهه

وسمعوني عدل مو تسوون هالاشياء مره وحده وتقولون ماكو شي وما كو نتيجة لا استمري وبظرف أسبوع بتلاقين نتيجة إن شاء الله

اوكي

ها اشرايكم

انطر رايكم وتجاربكم وردودكم ...

وما ابي غير دعواتكم لي ولعيالي 

مع تحياتي يا حياتي

مزيونه وشقره م (كويتيات)