السلام عليكم
اليوم الجمعة .. و قلت أسوي ريوق سبيشل ...
عاد فكرت في البانكيك من زمان ما سويته ... و قلت اصوره لكم و احط لكم الطريقة على الطريج ...
المكونات :
1 كوب طحين
1 بيضة كبيرة
1 ملعقة بيكنج بودر
نص ملعقة بيكربونات الصودا (و هي تختلف عن البيكنج بودر و لكن تكون بجوارها في السوبرماركت)
1و نص كوب حليب
و 1 ملعقة كبيرة سكر
و رشة ملح
الطريقة
نخلط المكونات كللللها مع بعض .. الحابل بالنابل ... نخلطه سواء باليد او بالخلاطة على كيفكم .. و بعدين نسخن المقلاة و نحط مسحة زيت كلش كلش قليلة عشان ما تتشبع الكيكة بالدهن ..
و بعدين باستخدام ملعقة عميقة نصب الخليط على دفعات كل دفعة بتسوي لنا دائرة هشة و لذيذة .. طبعا اذا استوت من تحت نقلبها على الوجه الثاني لين ما تصير ذهبية ..
و بعدين تحطون الدوائر اللي استوت على بعض و تصير طبقات
و فوق الطبقات على كيفكم تزينونها ..
مثلا آنة هالمرة حطيت عسل و رشيت سكر ناعم و عليهم جوز ..
و ساعات احط فراولة و عسل
و احيانا اناناس
و احيانا صوص الشوكلاتا ..
و احيانا دريم ويب ..
و في أوادم بعد ما يحطون ولا شي ..
على كيفك و الي يعجيكم ..
و بالهنا و الشفا..
مع تحيات أختكم أم كوثر
__________________