زعلااااانه حيل. حيل. حيل. حيل. حيل.

السلام عليكم ورحمة الله. اخواتي الحبيبات.

أنا اكتب موضوعي هذا وأنا زعلاااااااانه حيل من بعض المواضيع.

اللي مضمونها شكاوي من الأم والأب.

اقسم بالله حسيت الدنيا مافيها خير من الردود قبل صاحبة الموضوع.
صار تقديس الزوج يفوق بر الوالدين ،،،،،

الحين مالك سنه والا سنتين وطلعتي من خير ابوك وجالسه تشتكين ابوي غثني يبيني شغاله عندهم بالبيت ؟؟!!!!!!!!
من دفع دم قلبه عليك من وعيتي ع هالدنيا لين صار لك لسان تشكين من ابوك وخدمته،،،
طالما ابوك يصلي ويصوم وماتحرش فيكم ولاهو مدمن فاتقي الله في كلامك ولا تحطين نفسك مظلومه. ترى ابوك الي رباك وتعب عليك لحد ماتزوجتي هالفارس المغوار الي خايفه يطير من يدك وهو مادرى عن هوى دارك وقايم بأهله وامه وابوه وممكن يرميك بالشارع اذا اهله طلبو منه. وانتي حضرتك حاسده ابوك الفرحه بشوفتك او مساعدتك.

مهما كان ابوك لسانه طويل او معقد يبقى ابووووووك. السند التاج الي ع راسك تفتخرين فيه لو انه اسوأ رجل بالعالم.
والا تجيك شكاوي من الام ،، عشان تنزعج من عيالكم. او تدلع عيالكم بزياده. احمدن ربكم لييييل نهار ع نعمة الام. الي عندها ام تاخذ رايها وتسولف عليها حتى لو تهزأني بس اهم شي بعقلها وصحتها تحمد ربها مية الف مره ع النعمه ولا تقعد تشكوى ،،،،

اكيد بتقولون ماحسيتي وامك حنونه والا ابوك حنون.

الا أنا عشت طفولتي بدون حنان ام. امي ماتعرف الحنان داااايم عصبيه.كنت مراهقه احسبها تكرهنا بس لما دخلت الجامعه فهمت انها امي وقعدت اشوف الخفايا الي ماقد شفتها. أمي طلعت يتيمه أم وعاشت عند مرة ابو ظالمه. كيف بالله اطلبها الحنان؟؟؟؟ ماتعرف مسكينه.
ماحد رباها بحنان. زوجوها ع 12 سنه. أي حنان بتفهمه. اي حب بيجيها بعد ماحرموها طفولتها.

لا والله ماراح ازعل عليك يامي لو تذبحيني بس ابي ترجعين لصحتك. امي الحين ماعادت بعقلها وتصارخ وزي البزر صعبه. صعبه لابعد حد. لكن والله كل اجازه اول ما افكر اروح عند امي وابوي.
ابوي يتضايق من الازعاج وداااااايم يهزأنا انا وخواتي ع صجة بزارينا ويقول يلا انقلعوا كل وحده لزوجها. اذا طفح معه الكيل. بس والله والله زي العسل على قلبي. ونروح نطلع الحوش ونفطس ضحك انا واختي ع التهزيء. ما نزعل. هذا ابووووي حبيبي. الي وصلني للي انا فيه. من علم والحمدالله.

صرف علي وتعب علي حتى لو ماعبر بحبه وحنانه. لكن يكفي ربانا وخلانا بنات صالحات نخاف الله وزوجنا واحنا رافعات راسه ماعمرنا شوهنا سمعته.
يااازين شيباتك يبه حتى لو ترميني بالنار بأقولك حاااضر.

الله يخليكم لا عاد تشكون من امهاتكم وابواكم. انقهرررر احس فعلا مافيكم خير. ونكران جميل.

الاخ والاخت تجي منهم الغلطات ولاتنسون قصة يوسف عليه السلام مع اخوانه.
بس امك وابوك لاااااا منطقه محضوره. والزمن دوار وبكره عيالكم بيسوون فيكم نفس الشي.
عيالكم الي الحين اول مايطيح تقعدين تبكين من خوفك عليه. ترى امك كانت مثلك. فلا تنكرين الجميل.

انا مو باره انا نفسي اكون باره. لكن احب لكم الخير وابي انصحكم لوجه الله.
وبالوالدين احسانا.

شكراً للي سمعتني واسفه للي ازعجتها. :(