زمـــــاااان الحيـاااه كانت أسهل😭😭😭

زمان الحياة كانت اسهل ، كل شي كان على طبيعته ، كان اللي يغيب نسأل عنه وينك ويش فيك مختفي يفرح بسؤالنا عنه ..الحين ماأحد يسأل عن أحد وصرنا نبعد عن بعض اكثر حتى واحنا محتاجين بعض !
صرنا نحتري كل واحد يدق باب الثاني والنتيجه ؟ تباعدوا البشر وبقت البيبان !!!
كنّا نطلع " للحوش او للسطوح " وناخذ قهوتنا وشاهينا ونرجع واحنا بأفضل حال ونقول الله يازين الحياه ،،، الحين لا لازم نسافرعلشان مانمل ومايروح الملل الا اذا سافرنا وطلعنا ونرجع واحنا نقول أوووف مررره ملل سفر يجيب الهم !!! ،،،
زمان كنّا نجتمع بالسطوح ونلعب حكم شيبه او حقره بقره او طارالطير او كيرم العاب بسيطه ماكانت تحتاج غير قلوب صافيه وصادقه .. ونحسّ بسعاده مافي اطعم منها
والحين بلاي ستيشن واجهزه ذكيه كل واحد ماسك جهازه لاروح لانبض ولاحتى حياه
متجمعين لكن بقلوب شتّى ، وزياده على هذا علمتنا هالألعاب كيف تخرب اخلاقنا !!!
زمان كانت الحياة بسيطه ،، كنّا اذا نبغى نروح لجيراننا بملابس البيت نروح ونزورهم وكل شي بسيط وسهل ومافي تكلّف والحين لا لازم نلبس ونتكشخ وكأنه رايحين لعزيمه !!! وهي من الصباح تطبخ وتنفخ حلا وفطاير و و و. ،،، غصب صرنا نكره نزور بعض تعب من هنا ومن هناك ...
زمان كان الجارالى بغى يشوف جيرانه عند دكة بابه يفرش فرشته ويحط ثلاجة القهوه والشاي وصحن التمر ويالله حياكم الله ياجماعة الخير وكانت البيبان حلوه فيها حياه حقيقيه وكانت مفتوحه ،، الآن البيبان تزينت والدكات اختفت والبشر ماعادوا هم البشر والبيبان تسكّرت !
زمان اولادنا كانوا كلهم اخوان اذا زعّل واحد صاحبه .. ولد الجيران .. ولد عمه .. او ايا كان ، الكل كان يقولهم عيب انتم اخوان ! ، والآن مين هو حتى يمدّ ايده عليك كسّر يكسر ايده اضربه لاتخليه يلعب عليك وتفرّقوا الأخوان وبات الكل غريب ...
زمان كانوا الكل يجتمعوا عند الكبير سواء أب او أخ أو حتى قريب وكانت النفوس حلوه ، الآن لا ايش معنى هو وانا لا ، الكل صار كبير ويوم صارت كل البشر كبار راحت الأشياء الحلوه بالرجلين !!
زمان كل الكبير له قدره وهيبته ، له احترامه لو نقدر نفرش له الأرض ورد. وألحين صار الصغير يتطاول على الكبير بحجة احترام الفكر وحريّة وجهات النظر ،،، وجتنا الحريه على طبق مقلوب وضاعت الهيبه والوقار !!!
كثير أمور نفتقدها كااانت زمان موجوده ،، التفاصيل الصغيره ، طبيعتنا ، قلوبنا ، الأشياء اللي ماتحسسنا بتكلّف ولا انه احنا محتاجين نتعب عشان نوصل
محتاجين نرجع زي زمان ،، محتاجين نرجع لكل شي بسيط ضاع بزحمة الحياه وفقدناه وفقدنا حتى انفسنا معاه ،،،
نبي حياتنا بدون بروتوكولات لاتودي ولاتجيب !!😭😭😭😭