زهقتم من الرز المفلفل و نفسكم تغيروا؟؟؟ تعالوا ذوقوا لسان العصفور المفلفل

من كام يوم أكلت فى مطعم طبق من لسان العصفور المفلفل كبديل للرز و بصراحة كان جنان
و أنا من النوع إلى لو عجبتنى حاجة فى مطعم لازم أحاول أن أعمل زيها بأى طريقة لغاية لما أوصل للطريقة الصح
و هكذا قد كان ..... و بعد تجربتين واحدة بائت بالفشل الزريع و الأخرى كانت دون المستوى ( ماهو برضه الواحد يقول الى له و الى عليه) أخيراً توصلت للطريقة و طلع تمام زى الى أكلته فى المطعم

المقادير
كوب كبير لسان عصفور(مج)
بصلة كبيرة مقطعة مكعبات
ربع فلفلة حمراء و ربع صفراء و ربع خضراء مكعبات ( لو مفيش استخدمى فلفل أخضر و ريحى دماغك ):23:
فلفلة حامية أو بدون لومش بتحبى الحامى
حوالى ربع كوب زيت نباتى
ملح - فلفل - فص مستكة
الطريقة

1 - نحمر لسان العصفور فى مقلاه واسعة بدون أى مواد دهنية حتى يصبح متدرج الألوان بين البنى الفاتح و الأبيض
2 - نضعه حبه حبه فى إناء به ماء يغلى وذلك لأن لو وضعناه مره واحدة و هو ساخن فى الماء المغلى سيفور الماء و يبهدلك البتوجاز (عن خبرة سابقة ) و نتركه يستوى بنسبة 80% فقط (ألادانتى) ثم نشطفه جيداً بالماء البارد و نصفيه تماماً
3 - أثناء غليان لسان العصفور نضع الزيت على النار و عندما يسخن نضع المستكة و الفلفل الأسود ثم نضع البصل و بعد 3 دقائق من التقليب نضع الفلفل الأخضر( أو الملون) و نقلب حتى يطرى الفلفل ثم نضع لسان العصفور و الملح و نقلب على نار متوسطة دقيقتين و يقدم ساخنا كبديل للرز مع الخضر السوتيه و الدجاج أو اللحم أو حتى بدون أى شىء فطعمه لوحده كفايه

:21: