زوجة أخوي وسخة وش الحل !!

هلابكن ياحلوات ..

الصراحة اخوي الأوسط يشكي لي همه ويقول وش اسوي ..

في البداية اعطي نبذة عن الزوجين اخوي عمره 28 موظف مرتبته ممتاز وسيم ونظيف ومسوس بالنظافة يعني يروح من راتبه مايقارب 1500 شهريا بالعطور والعود والفواحات واللوشنات وغيره , اذا شم ريحة مقرفة يستفرغ على طول , كنا نحسبه يستهبل او يدلع ومرة كان يمسك على اخوي الثاني الذبيحة قاعدين يصلخونها وفجأة ( كرمكم الله ) استفرغ كل اللي في بطنه على الذبيحة .. وبعدها عرفنا انه مايستهبل وهذا طبعه ..

المهم هو وبصراحة وربي شاهد علي مدلع زوجته وموفر لها كل الأمور اللي تتمناها البنت من الأمور المادية والإسرية والعاطفية وكل شي والله شاهد علي ... الا شي واحد رافضه بتاتا ( الشغالة ) لانه يقول ابي العب مع زوجتي في اي مكان واشيلها وابوسها و و و في اي مكان مابي اتقيد بغرفة النوم وثاني سبب الخادمات ريحتهم مخيسة ( عقدة ) :)

المهم بلاه ربي ببنوته ( كسوولة ) حلوة وكيوت ودلوعه وحركات ونظيفة في جسمها ولبسها وطفلها بس في بيتها كسووووولة ,,, واسمحو لي وسخة في بيتها

الرجل مل من الموضوع كل مرة يجي يهاوشها ويطلع من البيت متضايق من ريحة المطبخ او حوسة الغرفة
كذا مرة هاوشها وكذا مرة زعل عليها ولا كلمها ... مرة من المرارير :)

جا معصب خلقة من العمل ودخل البيت واذا بالبيت ريحته تعج من الوسخ وطفله موسخ وريحته تقرف ويبكي
وزوجته نايمة طبعا الساعة 1 وشوي الظهر وهو راجع على ابو انه مصدع ويبي مساج حلو وينام ... تفاجأ بالوضع القبيح هذا ,,,

قوم البنت وفي نفسه يقول الله يستر لا تكون ميته لان الطفل كان يصارخ ,,, وقامت البنت وقالها خير ان شاء الله ماتسمعين الولد ,, قالت اسمعه بس متكسله اقوم له استغرب وتضايق وقال طيب ليه البيت ريحته تقرفه قالت يوووووه تعال نام لاحقين على التنظيف العصر ,,

ومن غير شعوووور ارتفعت وكف على وجهها ( وللمعلومية والله ماقد ضرب فينا احد من خواته ولاهوب شرير ولا احد يتوقعها منه ) بس كل شي الا النظافة عنده ...

المهم البنت بكت وقامت ونظفت وهو طلع واخذ له فندق ونام هذيك الليلة فيه ,,
وقص علي القصة ويقووول افكر اتزوج عليها ابي وحدة نظيفه ...

مدري وش اسوي مع هالخبلة وزوجها المسوس نظافة .