زوجة اخوي تغيرت علينا

اول شي لا تقولو احسدها انا كمان متزوجه المهم احنا زوجنا اخوي بنت صغييره بالسن حقت 17سنه تعتبر طفله بالنسبه لاخوي بس حبيناها وأصرينا عليها وقلنا هذي لاخونا بالبدايه كنا مخدوعين فيها من اول ماملكت من اخوي حبته واخوي ما شاء الله عليه كامل مكمل يعني لؤطه بس من طبعه البرود والهدوء مع ان البنت حلوه وتوقعنا يطيح عند جمالها ويطير فيها بس سبحان الله هي اللي تحبه مووت بالذات بعد الزواج تراكض وراه كااااااااانت كتاب مفتوح تعبرله حبها بكل الطرق ماتحب تفارقه وبس اسمه على لسانها وكانت تلجأ لنا دايما واحنا على نيتنا قلبنا يتقطع عليها نوقف معها ونمسح دموعها لدرجه كنا نحس بالذنب عشانه اخونا ومعذب هالبنت البريئه وهي تموت فيه تخيلو كانت معتبرتني صديقتها واختها كوني قريبه من عمرها وتقوللي كل شي يحصل مع زوجها وتجيني تصيح تشكي لي منو كانت خبله بشكل قسم تبكي عنده وتقوله ليه ماتحبني والا لما تنشب له قول لي احبك قولي لي اني حلوه وهو يقوللها اللي تبغى تسمعه يسايرها يبغى يفتك ويمكن شفقه منه ووترجعلي تشكي وانا بتجنن مادري كيف كنت متحملتها كانت مزعجه بشككل وكنا كلنا نلاحظ اخوي مايطيق دلعها ويتضايق من حركاتها وصياحها والا لما نتوسط لها عنده وهي جالسه بيننا زي البزره وبعيونها العبره
بس سبحان اللي يغير ولا يتغير اﻵن لو تشوفوها وحده ثاااااااانيه وصار معاها بنوته وهي تاخرت بالحمل
دحين ماتعرفوها مو من شكلها لا شخصيتها تغيرت تمااااااااما صارت وحده شايفه نفسها وتكلمنا من خشمها واحنا كنا مثل اهلها واكثر وانا بالذات كنت لها اخت وصديقه من جد كلنا مستغربين وهذا ماصار بين يوم وليله لا بالتدريج وكل مره كنا نشوف فيها
تغيير لين صارت ع هالحال اللي عليها ياجماعه لو اوصف واحلف ماتصدقوووو هذيك البزره الهبلا والدلوعه راحت دحين حتى الكلام معانا بالقطاره كلمه ورد غطاها بالعافيه تبتسم زياراتها لاهل زوجها مره بالشهر غير باقي حريم اخواني ممكن اعطيها عذر انها كانت صغيرره وكبرت وعقلت بس مو لهااااادرجه تنكرنا! واللي كانت مقلقتنا وقالبه عيشتنا بمشاكلها صارت ماااااااااااااااتقول ولا حرف عن حياتها تسمع اخبارنا وسااااااااكته ماتتكلم عن نفسها او تتكلم عن بنتها بالقليله يعني هذا اقل الايمان احنا مو اغراب احنا اهل بنتها عماتها وجدتها ام ابوها!!!!!
مو هذا وبس...... اخوي اللي كان يفضلنا احنا اهله على كل شي حتى على زوجته وبااالعافيه كان يعطيها وجه....... دحين مدلعها بشكل يقهرر كريم بزياااااااده وياويل من يقرب زوجته ويقوللها كلمه ويتغير وجهه لما يشوف وجه زوجته متضايقه او يحس احد عكر عليها يشيلها ويرجعو بيتهم بدري.... مره سالته من باب المزح ليت زوجتك القديمه ترجع تذكرها كانت ياحلوها وتغير وجهه وسود وكشر وقال لي خلي زوجتي بحالها وخلك بحالك وعيالك قهرني اخوي ويكلمني كاني غريبه واتدخل بحياته وهو عارف زوجته زمان كيف كانت تطلع منها بلاوي وفضايح وتدخلنا بكل شي خاص بحياتها وتخلينا واسطه بينهم عشان نرقق قلبه عليها ودحين يقولي هالكلام! امي المسكينه على نيتها طيبه تقول اهم شي ولدي مبسوط وتدعي لهم بس احنا اخواته مانقدر تجاهل يعني شي يحز بالخاطر تشوف الناس تاخذ مصالحها منك وتتغير وتنسى الجميل وتنسى الماضي
واخونا نسي مواقفنا مع زوجته لما كانت بحاجتنا وناخذها بالاحضان يوم كان مو معبرها ومهملها
حسبنا الله ونعم الوكيل بس