ارجو انك ماتزعلي من كلامي يا اختي..

اقدر شعور الوالدة وحبها ومزحها وعفويتها الله يخليها لكم....

ولكن مرة اخوكم.... بنت ناس تظل غريبه عليكم وما تعرف اطباعكم وتبغى منكم الاحترام والتقدير والمعاملة الرسمية بحب وليس بكراهيه ولا نفاق...

حتى لو تعاملت الوالده معاها بعفوية وبساطه علشانها حرمه كبيره...برضه هذي بنت ناس لازم نقدرها زي مانقدر الضيف...وما نضحك معاها طول الوقت...يمكن ما تتقبل المزح او النقد...يمكن تكون حساسة...

وحده تسولف لي عن ناس... يوم تزوج ولدهم.... الا بالطيب والبطال يكسرون الحواجز مابينهم وبين مرة ولدهم ...من الضحك الكثير معها والتعليقات الكثيرة. والدفاشة في التعامل....وكل وحده ونفسيتها...

ولما يجي اخوهم لو الود ودهم يطبون في حضنه علشان يعلمونها انهم يحبونه ويموتون عليه وطبعا يزودونها حبتين..وهي ساكته

غير الدق بالكلام ان انتي مهما كنتي تضلين مرة اخونا وحنا اخواته اصل منك...ويصرحون هالكلام في وجهها..يعني ان كان فيك جني طلعيه...

شوية شوية كشروا عن انيابهم يوم شافوا اخوهم يموت بزوجته ومتمسك فيها ولا يفتح معاهم طاري اي مشكله لانه يقول لزوجته اذا تحبيني سكري اذنيك ولا تسمعين لاحد مانبغى مشاكل مع اخواتي وابشري بعزك معي..

...عيفوها عمرها..بكل الوسائل علشانها ساكته وما تتكلم.....ابسط شي تسويه الام ترمي فنجال القهوة على الطاولة بطريقة مهينه علشان تقول لمرة ولدها لا تصبين ما ابغى قهوة

واذا زارتهم مرة ولدها وجت تسلم علي ام زوجها وتحب راسها .....في كل مره تقوم بقوة تبعد وجه زوجه ولدها بيدها وبقوة ماتبيها تحب راسها..بطريقه ماهي كويسه

اما البنات كل وحده وتعاملها اللي تقول بزوج اخوي وراك ما حملتي الى الان...والثانية تسولف مع اخوها عن صحباتها اللي ماتزوجت واللي تطلقت وهو مندمج علشان تحر مرته..

واللي تقول انتبه لفلوسك مهوب تقعد تنثرها على حياتك ومطاعم... كانه بزر ويحتاج نصايح

والا اللي ماتزوجت تقول لاخوها قدام اهلها...يافلان لما تكون على جنابه انت ومرتك لا تقعدون تروشون تالي ها الليول ..لا يدخلكم جني..خلوها للصباح

من المفترض ان تكون علاقة اهل الزوج بمرة الولد..علاقة رسمية اساسها الود والاحترام بدون زيادة ولا نقصان...

انا لو عندي اخوان في حياتي والله لاحب لزوجات اخواني ما احبه لنفسي...وش عندنا اغلى من الاخوان والخوات

لاحول ولا قوة الا بالله
اللهخ يهديها يارب
وتحس بامكم وتقدر تعبها في عيالها
وين بيروح مصيره يرجع لامه مهما طالت المده

والله ياانتم معطينهاا وجه
اصلا ليش انتم كذا يااختي انتم عليكم بخوكم شفتوها كذا وحساسه من اي كلمه
خلاص الوجه من الوجه ابيض
سلام وعليكم السلام ومع السلامه بسس وانتهت الحكايه

الله يعينكم على مابلاكم
انتو البنات انتبهوا لامكم لا تجيها جلطة او شي لان الكبير يكتم في صدرة مايتكلم ومرة اخوكم طنشوها ماكنها موجودة اللي مافيه خير تركه ابرك اهم شي امك داروها