زوجة اخوي واللي سوته 😭😭😭

السلام عليكم
صباح الخير ❤
دائما اقرا مواضيع هنا عن زوجات الاخوان واللي يسوونه وانا من ضمنهم بس ماقد ذكرنا الايجابيات ؟؟ ابي كل وحده تذكر بس الشي الايجابي لزوجات الاخ مانبي اي شي سلبي وشي فاجئوك فيه وماكنتي متوقعته او كلمه طيبه منهم وجبر خاطر !!!
تذكرت موقف توني وشفت الصور والفديوهات جتني بذكريات السناب وحده من زوجات اخواني قبل العام بالشتاء كانوا ابوي وامي مسافرين وجلست تزن علينا الا تجوني الشرقيه واحنا نتعذر منها ومن هالكلام ونقول مافيه حجز ومين يودينا
اليوم الثاني ماخذين راحتنا في البيت مافيه الا احنا البنات ومتسدحين بالصاله شوي الا اخوي زوجها يقول يالله تجهزوا بكره ماشين !!! اخذ اجازه من شغله وطبعا وظيفته بصعوبه ياخذ اجازه دائما يقولنا مايعطوني شركه معروفه وماتعطي اجازات بس مسكين جاء عشانا ياخذنا ومسكنا عنده اسبوعين ومره انبسطنا بشكل مو طبيعي ( طبعا زوجته لها الفضل بعد الله )
هي هنا الحين جت بدون اخوي مع عيالها امس قالت تعالي معاي ابي مشوار قلت لها اخوي موجود يودينا قالت طيب ورحنا مطعم تعشينا وسوبر ماركت وربي ماخلتني ادفع الريال حتى اغراض السوبر ماركت هي اللي دفعتها بعد ماخذت كل اللي ابيه تضاربنا عند الكاشير ( هي دائما كذا معانا والحين حالفه ماترجع الشرقيه الا واحنا معاها )
وعندي موقف جماعي اتفقوا ٣ منهم وهذي نفسها معاهم وصلحوا لي حفلة تخرج في بيتنا وقتها ع اساس جمعه عندنا عاديه بالويكند بس دخلوا وقفلوا عليهم قلت بكيفهم يمكن شي بينهم شوي فتحوا الباب حصلت كيكه وشموع وحطوا لي زفة تخرج واختي كانت مجهزه لبسي ولبسته وهدايا وحركات مع اني ماكنت مفكره ابد اسويه قلت يكفي حفل الجامعه بس ماقصروا 👌
بعطيكم كمان مواقف معاهم ان شاء الله بس عطونا مواقفكم ومثل ماقلت لكم نبي بس الشي الايجابي 👌👍
واذا كانت مدعمه بالصور بعد ياسلام 😍