زوجة عمي بتتطلق فجأة ...... ابي حلوووووول بسررررعه/ استوفى الرد

السلام عليكم ورحمة الله وبركاته
انا عضوة قديمة هنا بس من زمان ما دخلت لاني صار عندي قناعة طالما عندك ام وأخوات وأهل وصديقات مقربات مو مجبورة تكتبين مشاكلك وتفاصيل حياتك في منتدى وتنجبرين تقرين كلام جارح من بعض العضوات الله يهديهم يارب ليش كل هذا بس لو مشكلة ما لها حل ع الاقل عندي وش تسوين انا قلت اكتب هنا وأخذ حلول بإذن الله واطلب من المشرفات حذف الموضوع بعدين بدخل في الموضوع

السالفة صارت في استراحة جدي كلنا مجتمعين فيها وخلاص عمي بيطلع وقال لزوجته بقرب السيارة وأدق تطلعين سبحان الله الموضوع كله صار بعشر دقائق صدق ما بين لفتة عين وانتباهها يغير الله من حال الى حال المهم مشينا انا وهي جلسنا مع الباقي عند المراجيح وعيالها معاهم اللي صار جوا بنات مراهقات بالمتوسط وحدة بنت عمتي والثانية بنت جدي (عمتي) بيلعبون الأولى قومت أخوها الثانية عيا ولد عمي اللي كتبت عنه عمره 3عيا يقوم الولد شالته جلس قدامها سحبته من جاكيته وابعدته وهو يصيح طبعا لفت بتروح ضربها من ورى شالت تراب بييدها الثنتين ورمتها على وجهه صار ينتفض ونركض له طلعنا التراب من خشمه وفمه الحمد لله

البنت رجعت تلعب وفجأة تركض ام الولد وتمسك المرجوحة وترفع البنت فوق لآخر شي وتتركها والبنت تصيح بصوت عالي وكم مره ترفعها وتتركها وصار صياح طبعا وهواش لين اطلعوا الرجال من داخل وآخر شي البنت طارت وطاحت طيحة قوية على قدام وجدي وصل عند بنته وطاح على ركبه وهو جالس عندها وماله داعي اكتب التفاصيل واللي صار بعدها المهم عمي وقف قدامهم وقالها يا بنت الناس أخذي عيالك وأطلعي برا عند زوجك وهي تصيح وترتجف اللي صار ان البنت يدها انكسرت كسر مضاعف وجدي يقول يطلقها يطلقها وحالف لو ما طلقها ما يرضى عليه طول عمره ولا يبي يشوفه أبدا وكل اعمامي وعماتي معاه معصبين

لا تفكرون جدي ظالم والا متسلط عليهم لا والله بالعكس هذا أغلا عياله عنده لانه أصغر عياله من جدتي الله يرحمها والوحيد اللي كان عايش معاه قبل ما يتزوج جدي وغلا زوجته وعياله من غلاته ويحب عياله ودايما يميزهم عن الباقي وزوجة عمي كانت متأخرة 5 سنين في الحمل وكان يمزح عمي ويقول بتزوج وجدي يسكته انك ما بتلقى مثلها وانا ما أخطب لك ولو كفؤ سوها المهم حتى بالمزح ما كان يرضى عليها وكلهم كانوا يغارون منها لانها المفضلة عنده ويقول وحدة من بناتي وللعلم مراجعات المستشفى وتكاليف العملية على حساب جدي وجابت ثلاث توأم ...كتبت كل هذا عشان ما تجي وحدة وتقول انه متسلط وظالمها بس جدي يخاف على زوجته وعياله تفكيره كله فيهم لو صار فيه شي الله يطول بعمره ودايما اشوف يراقب تصرفات عياله الكبار معاهم وشايل همهم وهو من رأيه أنها ما تستاهل وانه أكرمها وما قصر معاها واعتبرها بنته وطلعت مو كفؤ وما تستاهل ومن السالفة وهو يقول وانا حي وعندي واكسرت يدها وشلون كسرتها ومو مصدق للحين اللي صار ويقول بكره لو مت وش تسوي فيهم .... وللحين مقهور عليها وخايفين يصير فيه شي والحرمة بصراحة مهيب راعية مشاكل وحبيبة كلنا انصدممنا من اللي سوته مو طبعها أبدا أبدا المهم اللحين جدي مصر على رأيه والحرمة وداها عمي عند اهلها ويقول لي انا من صدمتي باللي سوته ما كلمتها ولا سويت لها شي ليتها عندي اللحين ما ابي شي بس ابي تطيح بيدي ما قصرت معاها احبها ومحترمها ولا مره غلطت عليها وآخر شي تسوي فيني كذا ويقول انه قايل كم مره ما تتدخل بين الصغار ....،يعني احسه للحين مصدوم من اللي سوته وهي كلمتني كسرت خاطري تبكي بنحيب انا هديتها مع اني ما بيدي شي وتقول ما ادري وش اسوي

انا ما كتبت الموضوع ابي تقولون لي مين الغلطان لاني انا برايي ما احد غلطان البنت هذي تربيتها دلع من الكل ودايم مدارين خاطرها لو احد مره قالها شي كان ما سوت كذا بالطفل وجدي اللي سواه ردة فعل طبيعية ولكل فعل ردة فعل مساويه له وهو شاف بنته يدها مكسورة كسر مضاعف وهذا الشي الوحيد اللي يقدر يسويه يعني يضربها والا يكسر يدها ؟؟ وزوجة عمي شافت ولدها كذا والحريم يتفرجون عليها ما قدرت توقف عاجزة بصراحة انا لو اني مكانها ما أتحمل بس لو لو في طرف غلطان هي كان تحملت كلها 10 دقائق والبنت مو عايشة معاها ومجبورة تتحملها وتحط لها حد ولا ام البنت ام زوجها ومجبورة تزورها وتكرمها كان صبرت وتحملت وهي تعرف البنت وتعرف عواقب اللي بيصير ومع هذا سوته ..هذا رأيي ومقتنعه فيه بس ما توصل للطلاق مره وحده يخليها عند اهلها يادبها اي شي بس مو طلاق والله كاسره خاطري وراحمتها عشان عيالها ولأنها ماهي راعية مشاااكل الله يصبرها يارب ما تستاااااهل والله

اللحين اللي ممكن ياثرون على جدي وكلمتهم مسموعة عنده اكثر شي ثلاث ام البنت بس مستحيل بالسالفة ذي لانها من صار اللي صار وهي بس تبكي وتتحسب وللأمانة هي إنسانه ذربة وسنعه وعمرها ما طلعت منها عيبه على صغر سنها تاخذين منها آراء لحياتك ( اعترف اني فترة أثرت علي وحدة من زوجات اعمامي وكرهتني فيها وخلتني اكتب مواضيع عنها هنا وأنها طمعانه بجدي وكنت مو مقتنعه وحتى وانا اكتب بمنتدى وعالم افتراضي ومحد عارفني كنت استحي اكتب عن جدي كذا وكنت ببعض المواضيع اكتب انه ابو زوجي والآن ندمانة يمكن كنت صغيرة واللحين جالسة اطلب من المشرفات يحذفون مواضيعي ) والشخص الثاني عمي القاضي وهو بمنطقة ثانية وللحين ما درى وما ندري وشي ردة فعلة لو عرف السالفة والثالثة عمة ابوي اخت جدي الكبيرة يحترمها ويسمع كلمتها ..... بناااااااات رجااااااء انا مثل ما قلت انا مو مع الكتابة في منتدى و راح اطلب حذف الموضوع بعدين عشان كذا انا ابي حلووووووول وبس واراح اقرى الحلول وارد على الحلوووول اللي فيها استفسارات واللي ما عندها حل ادعوا لها ربي ييسر لكم حياتكم ويسخر لكم أزواجكم يارب وآسفه ع الاطاله